SADEONG 135
135
Laguno pujian
1Nggaalano ko Temeneno!
Ponggaalekai ko Temeneno sambuno,
eh komuyu Kona pele-peleleani
2mo kaleda doi Temeneno Na Bonua
doi nda Mian Bisa nadungolan.
3Ponggaalekai ko Temeneno, sabab Yana monondok,
ponggaalekai kosambuno, sabab Yana monondok konoano.
4Yana piliyo Yakub tuuk doi butongo,
ko Israel miano Yana tealikene naumat.
5Sabab yaku toiyo tutuu ko Temeneno babasal tuuno,
Konakuasa nababasalan liisiyo sasaibino kodewa.
6Moola nalakukanggene oilamo Kona iniyas,
doi timbu tukon doi buta,
doi tobun tukon doi dapang motatandak.
7Yana olubatene kobunom luwedoi dunia bunduno,
tukon tealikene kodidip moolubatene koudan.
Maka naparentayo kombombuul
sulano natobuat luwedoi natangabosan.
8Doi Mesir Yana akateyo sasaibino kopau langgongo
moluwedoi manusia pauno maukai doi iyayon pauno.
9Indaa badaang kolangge minasaindinggon tukon paloosan Yana mokubaiyo
tuuk naukumano kotomundo tukon sasaibino konapagauwe.
10Badaang kobangsa Kona inakate kabus,
tukon akateyo kotomundo-tomundo motambongan tukon barani:
11Doiyamo Sihon tomundo Amori tukon Og tomundo Basyan,
tukon sasaibino kotomundo doi Kanaan.
12Maka konapo lipu Yana beekenemo
teali Naumat, Israel miano nalipu.
13Oh Temeneno, Ikoo naikon tataap mobinabotilanggon,
tukon sasaibino kokatulunan tataap neneeke kosambumu,
14sabab Ikoo beena kaadilan doi Muumat,
tukon Ikoo seseange Komu pele-peleani.
15 #
Sad. 115:4-8; Ink. 9:20 Konapo uuno luwedoi mosoni tukon suasa,
banggapi limano komo kubaiyo.
16Kobabanoila daano, bai aki namoola basilingan,
daano komatano, bai aki namoola mokita oioila.
17Daano kotolingainoila, bai aki namoola molongol oioila,
konapo ansaang aki natobuat doi babanoila.
18Boliisi nabuno doiya kona nasib komian mokubaiyo,
tukon mo maangga doiyana.
19Eh komuyu ko Israel miano, ponggaalekai ko Temeneno,
eh komuyu ko Mian Bisa Naimam-imam, ponggaalekai Yana!
20Eh komuyu ko Lewi miano, ponggaalekai ko Temeneno,
tukon komuyu sasaibino komian mo taat, ponggaalekai Yana.
21Ponggaalekai ko Temeneno doi Sion,
doiyamo doi Yerusalem Kona tampat dungolan.
Ponggaalekai ko Temeneno!
Currently Selected:
SADEONG 135: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
