SADEONG 104
104
Nggaalekai doi mapasitakan
1Eh konoanggu, nggaalekai ko Temeneno!
oh Temeneno daku Mian Bisa, tutuu Komu babasalan!
Ikoo bapake pakean babasalan tukon taanggaan,
2tukon kolaango tombukiyo.
Ikoo belekayo kotimbu pokakana kosandung,
3tukon Ikoo bangune Komu Bonua doi timbu paisuno bungkono.
Kobunom-bunom Ikoo tealikene Mukereta,
Ikoo lokitiyo kombombuul kapilo.
4Kombombuul kotealikene Mubito-bito,
tukon kodidip Ikoo tealikene Mupeleleani.
5Tukon moonggol Ikoo abese kodunia doi naluwean,
tobikon doiya aki naunggot tuuk posidutukon.
6Ikoo tombukiyomo tukon tobun dapango babasal,
kopaisuno elembusomo kobunggul-bunggulo.
7Salaata Ikoo nggimoliiyo, dopaisudoo lomba,
lomba makasang sabab alalo Nababasalan.
8Kopaisu lomba loloiyo kobunggul-bunggul doi pepelako lalomo,
doi lipu Ikoo mosadiakene doiyana.
9Ikoo tantukenemo kokalalatan-kalalatano moaki namoola yana loloiyo,
sulano naaki koikoidan nalembuse kodunia.
10Ikoo osumbate kopaisu matanodoi pepelako-pepelako,
kopaisu batango pauno lombadoi na pokakalatanan kobunggul-bunggulo,
11sulano sasaibino koiyayon doi asi namoola monginum,
tukon kokeledai-keledai mosolot nambambul konamolouwan.
12Doi naloolanian kotomisi-tomisi mokubai telea;
yanila mamakala doi kayung-kayung loono.
13Luwedoi timbu Ikoo obuluse koudan doi lipu bungkokon,
moono kodunia tukon Mulimang hasilo.
14Ikoo tubekene kobulung sulano nateali iyayon nakaanan,
tukon sasaibino kolangge motobu tuuk doi banggapi-kobanggapi.
Maka kobangapi moola namasakakon,
15tukon olubatene koanggur paisuno mosanaanggene kobanggapi noano.
Tukon koidan Zaitun lisisono motealikene lambongan koduduso,
tukon kinaan mobeena yana bukuanan.
16Ko Temeneno nakayung-kayung batango mbinotokii udan molobi-lobian
tukon kokauwalu batango doi Libanoon Yana mosakakene susunggu mbinetokii koidan.
17Idoo kotomisi-tomisi mokubai telea,
kotomisi ranggung mokubai telea doi tubono.
18Kobunggul-bunggul motatandak teali mbembe mosolot nadungolan;
koasu labo basookon doi batu nggalanggang.
19Ikoo kubaiyo kobituwon teali paloosan kotempo,
kooloyo matano toiyo kososopan.
20Kalu olubatenemo kokalipookan, kooloyo kaputo,
tukon sasaibino koiyayon mosolot sasabulo.
21Kosinga-singa motabokon ngangaaton moumbolii iyayon nakinaan,
makabi kinaan Mian Bisa mosadiakenemo.
22Kalu kooloyo matano sumbuto, yanila saakono
tukon banggolinggon doi nalipu sapitan.
23Maka tobuatokai kobanggapi sulano nalakukene konalimang,
tukon banggadudul balimang polong pokinobianggon kooloyo.
24Tutuu badaang Komulimang, Temeneno,
sasaibino Ikoo tealikene tukon pandoiyan;
kodunia moono tukon Mulangge pinasitaka.
25Kitayokai kotobuu motebeleaton bebelan,
tukon sasaibino kolangge motubo babasal poipoisik akimo natangait.
26 #
Ayb. 41:1; Sad. 74:14; Yes. 27:1 Idoo talabut kokapal-kapal,
tukon Lewiatan, naga tobun Ikoo mopasitakayo namaemaenan.
27Yanila sasaibino moinikene Ikoo,
sulano namalaat kinaan doi tempono.
28Ikoo beekene, tukon yanila pototongikene,
Ikoo masadiakene,
tukon yanila kaane polong pombambukon.
29Kalu Ikoo totonggulung, yanila teali matakut;
kalu Ikoo alayo konapo ansaang, yanila silaka kabus,
tukon abali teali ambata buno doi tumbe.
30Bai kalu Ikoo beena ansaang, yanila tinealikon koidan,
Ikoo beena tuboan moboolu doi dunia.
31Boliisi ko Temeneno Nababasalan natataap sidutu-posidutukon!
Boliisi Yana nalaba tukon sasaibino komu pinasitaka!
32Yana mbalenge kodunia tukon kubaiyo lolondong,
kobunggul-bunggul Nadumboyo, tobikon sumbot kotibolungo.
33Kalu yaku daanoon motubo
yaku manyanyikene konyanyian motuuk doi ku Mian Bisa.
34Boliisi daku nyanyian napokokoniy doiya-Na,
sabab Yanamo komo kubaiyo laba konoanggu.
35Batadikenemokai komian mobaladosa nalapus doi dunia bungguno,
batadikenemokai komian molokis nakabus silakaa.
Eh konoanggu, nggaalekai ko Temeneno!
Nggaalekai ko Temeneno!
Currently Selected:
SADEONG 104: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
