AYUB 42
42
Ayub
1-2Ayub napotimbili doi Temeneno,
“Yaku toiyo, oh Temeneno, baikon Ikoo Balakuasa;
Ikoo oila kolanggeno mosanggupe lakukene.
3 #
Ayb. 38:2
Ikoo masadai bulaando yaku mobarani aki namaangga Mumontoiyan
baanggokai yaku susuunggu aki kumongotoi.
Yaku basilingan kaliangano langge-langge moaki kumangalati
langge-langge kaliangano motodudul minasaindinggon tuuk yaku nia.
4 #
Ayb. 38:3
Ikoo sumboliiyaku momondongolii salataa Ikoo basilingan,
tukon mebee potimbili kalu Ikoo masadai.
5Looluk, kupandoiyan kaliangano Ikoo tolongo kulengele luwedoi mian tolong,
bai diabudodoo yaku tingoniiyomo Ikoo sabab kita pososuungo.
6Tobikon doiya yaku mammaa moneneeke sasaibino dakubantilan
maka tukon manasal yaku osulang doi ambata tukon abu lalomo.”
Potutup
7Sambuno lapa basilingan doi Ayub, Temeneno bantile doi Elifas, “Yaku nggimal doikoo tukon doi tulamu lua, sabab komuyu aki pobantile komobisa butong-Ku kaliangano. Bai Ayub Kupeleleani aki nabunodoiya. 8Nah, diabudodoo mangalamo pitu kosaapi langgilo tukon pitu kodomba langgilo, tukon tauso doi Ayub. Doibundu sosubakene sasaibinodoo salaku sosubakon mosinua tuuk butomu. Ayub naikon sambeang tuuk komuyu tukon konasambeang naikon kutalimayo. Aki naikon kuokimaayo komuyu, maukai pobisa matalima ukuman. Komuyu aki ponyatakanggene komo bisa butonggu kaliangano, sabeakai Ayub bantilemo.”
9Elifas, Bildad tukon Zofar lakukene oila ko Temeneno nasinumboliikon, tukon ko Temeneno talimayo Ayub nasambeang.
10 #
Ayb. 1:1-3
Doibundu sambuno lapa Ayub sambeang tuuk tulano toluila, Temeneno kubaiyo yana abali konakaasaan tukon beekene doiyana lualuunggon paku luwedoi sasaibino konatinotooli looluk. 11Sasaibino koutuso langgongo tukon Ayub utuso moluko, tukon sasaibino konasobat momalumbito, lubat moduutiyo maka balamean posinggat-singgat yana doi nabonua. Yanila nyatakanggene tulut poloonggene doi sasaibino kokasusahan molapamo Temeneno lubotiikene doiyana, tukon hibure yana. Doi yaniladoo suwe-suwele beena doy mobadaang tukon meeng kosousolut mosoni doi Ayub.
12Ko Temeneno balakaatiyo Ayub tukon polokono badaang konalangge doi natuboan labino, luwedoi tempo naakiyoonan natoupiyo kosilakaan. Ayub motooli 14.000 kombembe domba, 6.000 kounta, 2.000 kosaapi, tukon 1.000 kokeledai. 13Yana malaat pitu komian kopau mala-malaneno tukon tolu komian kopau molukono. 14Konapau molukono langgongo sinombuikon Yemima, koluano Kezia tukon kopioto Kerenhapukh. 15Doi posaapon kolipu akiyo koboine mopokakana Ayub napau boine motolu konatambonganan. Yanila binee obos doi tamano naoluson pokakana tukon utus-utusoila mala-malaneno.
16Lapa doiya Ayub daano motubo 140 kotaun kona kalumbit, tobikon yana daano mokitayo konatumbu-tumbu tukon yanila napau-pau. 17Maka matemo Ayub doi natuboan momotuamo tuuno.
Currently Selected:
AYUB 42: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
