YESAYA 31
31
Ko Mian Bisa lindungiyo ko Yerusalem
1Silakamokai komian motaus doi Mesir sulano napo makabi bantuan! Yanila moinikene ko Mesir miano nasuludadu nabukuanan yanila momolokiti adalan tukon konapo adalan mobuku-bukuan tuuno tukon konapo kereta mobadaang. Bai aki napo maangga doi Temeneno, Israel miano na Mian Bisa moliyous tukon aki napo makabi Nabantuan. 2Ko Temeneno pandoi tukon toiyo oila Kona linakukanggon. Yana lubatene kobalaa tukon laksanakanggene Kona nggimalan tuuk mohukume komian molokis tukon komian motulungiyo yanila. 3Ko Mesir miano tongo manusia, bolikon Mian Bisa. Konapo adalan tongo mahluk biasa, akiyo kona sipat moilahi. Kalukai ko Temeneno mokubai tindakan, dobangsadoo momotulungi maukai yanila tataap talalaing tukon dobangsadoo motinulungi naikon tuwong. Jadi looluwakon mate kabus.
4Ko Temeneno bantile doiyaku, “Pokakana kosinga ngaaton tuuno sabab yana pertahankanggene kona iyayon kinaan tukon aki namatakutene kowookonan tukon nggeleamonan moluwedoi meeng kotambuno kopototooli iyayon yanila moiyase lawane iyana, bunomokai doiya yaku naikon polobosi tukon pertahankanggene ko Sion Bunggul bunggono. 5Pokakana komeeng kotomisi mokiyap-kiyape kokapilo doi nateleya bunggono sabab nadagaiyano konapau-pau, bunomo doiya koidan Yaku, ko Temeneno Mobabasal Konakuasa naikon lindungiyo, belayo tukon salamatene ko Yerusalem.”
6Ko Temeneno bantile, “Ko Bangsa Israel, komuyu lawanakumo tukon komuyu baladosamo doiya-Ku. Bai budodoiya poabalimokai doiya-Ku! 7Naikon kalu laate kotempono sasaibino komuyu sakukene kopo pilogot timba-timbango moluwedoi suasa tukon mosoni komuyu mokubaiyo tukon moono dosa. 8Ko Asyur naikon inakate kabus doi polobosian lalomo, bai bolikon manusia nabukuanan. Ko Asyur miano naikon bulen doi polobosian lalomo molawane, tukon konapo tabo-tabo naikon tinealikon ata. 9Konapo tomundo dambas sabab matakuto, tukon sasaibino konasuludadu talengano ngginggim tuuno, sampe yanila otinggale konapo panji-panji poolobosian.” Ko Temeneno lapamo bantile, Temeneno mosinosubai tukon moinodotii tukon sosubakon mosinua doi Yerusalem.
Currently Selected:
YESAYA 31: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
