TEALIAN 49
49
Yakub naopusiano konabantilan
1Doibundu Yakub uange kona pau-pau tukon bantile, “Popototongi naimba, kolaniyo yaku. Naikon kupailukene doi komuyu oila naikon kopoo tinoupi oloyo doi bundu:
2Popototongimo, he Yakub napau-pau,
ndongoliiyo Israel, tamamu.
3Ruben, kupau langgongo,
ikoomo daku bukuanan,
saono tumbeno kutambonganan.
Ikoo tambongan tuuno tukon bukuan
doi antara sasaibino daku pau.
4Ikoo gampang tagoda buno paisu,
tobikon bolikon moutama;
sabab ikoo pokooloi tukon kuboloki piala,
ikoo kodikitio tamamu natampat moolowan.
5Simeon tukon Lewi montolutus;
yanila nasinapan lobo momatikas.
6Yaku aki kumalaing doi yanila napomeenggonan lalomo,
koidan aki doi yanila napototongian lalomo.
Sabab yanila mangakate doi nggimalan lalomo,
besange kobanteng tolongo nasanaangan.
7Kinutukimo konapai nggimalan, tobikon napai kulokisan.
Kinutukimo konapai nggimalan, sabab nabaranian.
Yaku naikon pobabandakene yanila doi posaapon ko Israel.
8Yehuda, ikoo naikon sokuwo komu musuh oluno;
koutus-utusomu naikon nggaale ikoo
tukon sosuba doi salaamu.
9 #
Bang. 24:9; Ink. 5:5 Yehuda buno kai singa mongula;
yana akateo kona musuh, maka naabali doi nadungolan;
yana nggeleamon maka banggonggolonggon,
tukon akiyo komeeng komian mobarani siikayo.
10Yehuda naikon taaniyo kotokon batomundoan,
kona katulunan naikon maparentah sidutu-posidutukon.
Bangsa-bangsa naikon mababa lulu,
tukon sosuba maka totuku doi salaano.
11Nakeledai napau yana keetene doi kayung batango,
anggur batango momonondok tuuno.
Yana kumesiyo kona pakean tukon anggur,
anggur memela buno sau.
12Memela komatano sabab monginum anggur,
moute kongolingo sabab monginum susu.
13Zebulon naikon dungol doi mololani kotobun;
kapal-kapal naikon balabu doi bibilo;
polong doi Sidon kona wilayah sipato.
14Isakharoo buno keledai mobukuan
mobanggonggolonggon doi antara soliu baakutan.
15Yana kitayo bulaando kona monondokan dotampatoo
tukon bulaando kona monondokan dolipudoo,
maka yana natotuku inolokiti langge,
tukon pinakisaa balimang salaku ata.
16Ikoo Dan, naikon adiliyo komu bangsa,
ikoo teali benseno buno benseno bailon doi Israel.
17Ikoo buno binda doi loloon bibilo,
binda moupason doi liasan bibilo,
mosokuwo koadalan totunano
polong tasakukon komo lokitiyo.
18Oh Temeneno, kasalamatan ikoo mobeekene, doiyamo daku tino-tinotiili.
19Gad, ikoo naikon parampok lobosikon,
mau kai ikoo naikon abali lambeke yanila.
20Asyer, komu kinaan lobian badaang,
ikoo naikon sadiayo kotomundo-tomundo nakinaan.
21Naftali, bunomo kai donga tosodii,
kona pau-pau tambongan tuuno.
22Yusuf bunokai keledai mongula,
keledai mbosolo lolani kopaisu matano,
obu-obulen doi bunggul bibilo.
23Musuh lobosio tukon akiyo kotempo,
lelenggene tukon pandong tukon panah.
24Mau Yusuf tataap moonggol kobotokono,
tataap bukuan kona panah,
sabab kuasa Pototooli bukuan tuuno,
Yakub na Mian Bisa, Molindungiyo ko Israel.
25Tamamu na Mian Bisa tulungiyo ikoo;
Mo Balakuasa balakaatiyo ikoo
tukon udan luwedoi timbu
tukon paisu doi buta lalomo.
Tukon pau tukon saapi,
26gandum tukon bunga.
Balakaat tamamu na Mian Bisa liisiyo
kokaasaan doi bunggul-bunggul momotua tuuno.
Boliisi naobuluso sasaibino dobalakaatoo doi Yusuf oluno bunggono, doi bonggoto bunggono.
Yanamo komo lobian tuuno doi antara utus-utuso.
27Benyamin doiyamo asulobo mobarani.
Dowa-dowa yana sokuwo kona musuh.
Doi popook oloyono yana ebe-ebese.”
28Doiyamo songulolua ko Israel benseno, tukon bantilan-bantilan yanila tamano mobantile salataa binee salam poalaasan doi yanila suwe-suwele.
Yakub mate tukon kinibul
29-30 #
Tea. 23:3-20
Doibundu Yakub bateteba doi napau-pau, “Naapa koidan yaku naikon matemo buno kumbumbu. Kibulemo yaku tambikon doi yanila bibilo doi leeng Makhpela lalomo, talikon doi tolopot Mamre doi tano Kanaan. Abraham lapamo oliyo koleeng tukon asi doi napokolanikonan luwedoi Efron Het miano sulano nateali bakibulan. 31#Tea. 25:9-10, 35:29 Idoo Abraham tukon Sara, Ishak tukon Ribka nakinibulan; tukon idoo koidan yaku kibule Lea. 32Asi tukon leeng modaano idoo lapamo inoli luwedoi Het miano. Pokibule yaku idoo.” 33#Kis. R. 7:15 Salataa Yakub lapamo bateba doi napau-pau yana ubanggono polaing mate.
Currently Selected:
TEALIAN 49: LAIBGZ
Highlight
Share
Compare
Copy
Want to have your highlights saved across all your devices? Sign up or sign in
