TEALIAN 47
47
Yakub mangadap tomundo Mesir
1-2Doibundu Yusuf babayo koutuso limaila mangadap doi tomundo. Nabantilano, “Ata tamano tukon utus-utuso lubato doi Kanaan tukon mbembe domba tambuno, saapi tukon sasaibino yanila nalobo. Diabudodoo yanila daano doi Gosyen lipuno.” Maka yana tudoikene doutus-utusodoo doi tomundo. 3Tomundo masadai doi yanila, “Oila komu limang?”
Yanila timbiliyo, “Ikami nia pototooli iyayon buno tumbunggami. 4Ikami lubat sulano dungol nailipu nia, sabab doi Kanaan butano hebato tuuno komalaalan, tobikon akiyono kobulung tuuk komai mbembe domba tambuno. Pataikene mai dungol doi Gosyen lipuno.” 5Maka tomundo bantile doi Yusuf, “Diabudodoo Tama tukon utus-utusomu daanomo dimbaa. 6Anggenemo kolipu Mesir salaku mulipu susuumu. Sobiyomo yanila nadungolo tataap doi Gosyen lipuno, lipu momonondok tuuno nai lipu nia. Tukon beena limang komian mopandoi balimang sulano nauluse daku iyayon-iyayon piniala.”
7Yusuf perkenalkanggene kotamano doi tomundo. Yakub balakaatio tomundo, 8tukon tomundo masadai doi yana, “Bulaamo Tama naumur?”
9Yakub timbiliyo, “Ata lapamo tubo sakat tolukolono kotaun salaku lausala. Ata natuboanoo moono sakisaawan tukon aki namalumbit kalukai pinokanakon tukon daku mbumbu naumur salaku lausala.” 10Lapa doiya Yakub palamisimo tukon beena balakaat poalaasan. 11Yusuf tomboniiyo kotamano tukon utus-utuso motataapo doi Mesir. Yanila bineemo buta yanila mohaakiyomo obos momonondok tuuno doi lipudoo, loolani kokota Rameses, pokokonoi tukon tomundo naparentah. 12Tukon Yusuf osukupiyo kopalasadiaan kinaan tuuk tamano, utus-utuso, tukon sasaibino kona montolutusan, polong doi momongula tuuno.
Tempo malaalan
13Malaalanoo todudulo hebat, tobikon doi yayaa akiyono ko kinaan koidan. Korayat Mesir tukon rayat Kanaan miuko tukon akimo nabukuan sabab malaal. 14Samba-samba luunggon yanila mongoli gandum, Yusuf pototongikene kodoy pebeal gandumoo, maka yana abese doi tomundo nakamali. 15Salataa kabus kodoy doi Mesir tukon doi Kanaan, Mesir miano lubat doi Yusuf tukon bantile, “Beena kami kinaan! Inai mosobiiyo kami mate. Komai doy kabuso.”
16Yusuf timbiliyo, “Kalu kabuso komu doy, beena komu iyayon, yaku naikon beena kinaan doi komuyu.” 17Maka yanila beekene kona iyayon piniala doi Yusuf, tukon yana beena kinaan doi yanila salaku posobolino adalan, domba, mbembe, saapi tukon yanila nakeledai. Dotaunoo doiya Yusuf beena kinaan doi yanila tukon yanila beale tukon iyayon piniala.
18Doi taun molubat yanila lubat koidan doi yana tukon bantile, “Kami tulus talaang doi Tuan baikon komai doy kabuso tukon komai iyayon lapamo teali Tuan kotumbuno. Ikami akiyono komai oioila koidan momoola kami beekene doi Tuan kalu bolikon butonggami susuungo tukon komai buta. 19Inai mosobiikene kami mate! Inai mosobiikene komai asi-asi teali motuul. Oliyo kami tukon komai buta tukon gandum salaku pebealo. Ikami tukon komai buta naikon tealimo tomundo koona. Beenggami gandum tuuk natosuungian komai tuboan tukon koidan kolibuang tuuk motinipas doimai asi!”
20Maka Yusuf oliyo sasaibino kobuta doi Mesir tuuk tomundo. Samba komian doi Mesir tapakisaa balukene kona buta, sabab tempo malaalan motodudulo hebat tuuno; maka sasaibino kobuta doi Mesir tealimo tomundo nabuta. 21Sasaibino korayat doi Mesir tabalimo Yusuf naata. 22Komeeng-meengo buta moaki Yusuf naoliyo doiyamo imam-imam nabuta. Yanila aki napalaluu balukene yanila nabuta sabab tomundo beena tambo tataap tuuk yanila nakapalaluuan tuboan. 23Yusuf bantile doi narayatoo, “Kitayomo, komuyu tukon pobuta lapamo kuoliyo tuuk tomundo. Naiyamo kolibuang moola komuyu tipase doi poasi. 24Doi tempo bapupuiyan, komuyu sio pobeekene lima koobos koasilo doi tomundo. Kolabino moola komuyu pakeyo tuuk kolibuang tukon tuuk kinaan doi komuyu tukon mukaluargaa.”
25Yanila timbiliyo, “Tuan lapamo salamatene kami tukon kami bakinatauwan. Kami yase teali tomundo naata.” 26Doibundu Yusuf tealikene langgedoo undang-undang doi tano Mesir, doiyamo baikon lima koobos doi bapupuiyan hasilo nateali tomundo koona. Polong diabudodoo undang-undangoo daano mopinake. Tolongo imam-imam nabuta komo aki nateali tomundo koona.
Yakub nakakabi doi bundu
27Bunomo doiya Israel miano namanataapan doi Mesir, doi lipu Gosyen. Yanila teali kaasa tukon mosuung pau tumbu badaang idoo. 28Yakub daano motubo songulo pitu kotaun doi Mesir polong kona umur teali sakat sangkapolono pitu kotaun. 29#Tea. 49:29-32, 50:6 Salataa lolanimo kotempono naikon momate, yana uange Yusuf, napaudoo, maka bantile doi yana, “Binggakene kolimamu doi bananggu leoso tukon batotopi baikon ikoo aki naikon mukibule yaku doi Mesir nia. 30Yaku yase kukinibul doi tampat kumbumbu; babayomo kobajanku luwedoi lipunia tukon kibule doi yanila nakinibulan lalomo.”
Maka Yusuf timbiliyo, “Yaku naikon lakukene oila Tama nabinantiloo.”
31Yakub bantile, “Pobatotopimo baikon naikon molakukanggene.” Yusuf batotopi, tukon Yakub bakinatauwan doi natampat moolowan.
Currently Selected:
TEALIAN 47: LAIBGZ
Highlight
Share
Compare
Copy
Want to have your highlights saved across all your devices? Sign up or sign in
