TEALIAN 33
33
Yakub pososuung tukon Esau
1Yakub kitayo Esau molubat tukon sangkap kosakato kona mian. Tobikon doiya yana ebese kona pau-pau doi antara Lea, Rahel tukon namoluwe lua. 2Yana abese kona boloki piala lua polaing yanila napau-pau doi salaano, doi bundu Lea polaing kona pau-pau, maka Rahel tukon Yusuf doi bundu tuuno. 3Yakub ampakon doi yanila sasaibino salaano, tukon koolaniyo koutuso langgongo, yana sosubaiyo polong pitu luunggon. 4Bai Esau obulen nalaate Yakub, maka yana lebeke tukon umayo. Tukon domianoo molua pokokiilimo. 5Salataa Esau kitayo sasaibino koboine tukon napau-paudoo, yana masadai, “Indee yanila namupolaingan nia?”
“Yanila kupau-pau,” Yakub timbiliyo, “Mian Bisa lapamo kaluniakanggene pau-paudoo doi yaku.” 6Lapa doiya sasaibino bolokidoo piala madumo tukon yanila napau-pau, maka sosuba. 7Doibundu lubato Lea tukon napau-pau, tukon kopangabisano Yusuf tukon Rahel bakolanikon maka yanila sasaibino sosuba.
8Esau masadai, “Oila komu maksud tukon lombongan-lombongan yaku mopososuung budodoo?”
Yakub timbiliyo, “Sulano sanaanggene utusonggu langgongo noano.”
9Bai Esau bantile, “Daku buat sukupo, akimo napalaluu ikoo beena yaku palaseeng.”
10Yakub bantile, “Inai! Kalu yaku lapamo sanaanggene utusonggu langgongo noano, talimayomo daku sosubakon nia. Doi yaku, kukitayo koutusonggu langgongo duduso pokakana mokitayo ko Mian Bisa duduso, sabab utusonggu langgongo monondok doi yaku. 11Yaku kabiyo, talimayomo kososubakon yaku molapamo babayo nia. Mian Bisa monondok ko konoano doi yaku tukon beekene sasaibino kolobo yaku palaluuwo.” Yakub banggadudul desaake polong doi bundu Esau talimayomo kona bineekon.
12Maka Esau bantile, “Maimo kita basa-basadia tuuk lengget, yaku naikon ampakon lolukiyo ikoo.”
13Yakub timbiliyo, “Utusonggu langgongo toiyo baikon pau-pau nia miuk, tukon yaku sio ndadaga-dagaiyo sasaibino koiyayon modaano kona pau. Kalu kabayo mosoisobit, mau natongo meeng kooloyo kasi, maka sasaibino iyayonoo tambuno naikon mate. 14Ampakon lolukon, yaku tuundu tukon poipoiniak. Yaku naikon ampakon mosoisobit tukon iyayon tukon kupau-pau nia tuundu doi Edom.”
15Esau bantile, “Kalu buno doiya, monondoko yaku tinggale doi koo bubula daku potombonii.”
Bai Yakub timbiliyo, “Inaimo basusah-susah, yaku tolongo yase sananggene koutusonggu langgongo noano.” 16Bunomo doiya doi oloyodoo Esau lengget abali doi Edom. 17Bai Yakub taus doi Sukot, maka mokokondong bonua tuuk yana tukon tampat soopan kona iyayon. Doiyamo kosababpo tampatoo sinombuikon Sukot.
18Doi ampakonan lalomo luwedoi Mesopotamia, Yakub polongo tukon salamat doi kota Sikhem doi tano Kanaan, maka kekendenge kona sandung doi meeng kopadang lolani kokota. 19#Yos. 24:32; Yoh. 4:5 Padang tampat basandunganoo yana oliyo luwedoi mian katulunan Hemor, Sikhem tamano, koolino sakat kodoy perak. 20Doibundu yana kekendenge idoo tukon sombuikene “El, Mian Bisa Israel”.
Currently Selected:
TEALIAN 33: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
