GALATIA 1
1
1-3Utus-utus jemaat-jemaat doi lipu Galatia, Yaku, Paulus, tukon sasaibino utus Salani mo polaing yaku, moini sulano ko Mian Bisa Tamanggita tukon Temeneno Yesus Kristus beena balakaat tukon namonondokan doikoo.
Yaku teali rasul bolikon tukon lolo doi banggapi kabai sabab banggapi komo bingkate, baimo Yesus Kristus tukon Mian Bisa Tamanggita mo lapamo otuboiyo Yana abali doi namatean. 4Loloiyo Mian Bisa Tamanggita namongiasan, Kristus salakanggene kobutongo teali sosubakon tuuk kita nalalim-lalim, sulano kita sinalamaton doi loonudoo mo lokis nia. 5Nggaale ko Mian Bisa sidutu-posidutukon! Amin.
Tolongo meeng ko Bilita Monondok
6Yaku heran tentang Utus-utus! Komuyu Mian Bisa uange tobikon Kristus namaasi, bai diabudodoo komuyu buno mosobit mototonggulunge ko Mian Bisa tukon mololoi “bilita monondok” mo bolikon Bilita Monondok mo luwedoi Mian Bisa. 7Kona bisaan akiyo ko “bilita monondok bailon”. Tongo daano komian badaang popitoikene doi komuyu “bilita monondok” tentang Kristus yanila poibalike tobikon nanggabute komuyu. 8Mian mo babotilanggene “bilita monondok” mo sangalaasan doi Bilita Monondok mo lapamo kami babotilanggene, sodiiyomo yana Mian Bisa naukume – mau kai mianoo kami susuungo kabai malaekat doi surgaa! 9Kami lapamo bantile loolukon, diabudodoo yaku bantile koidan: Mian mo babotilanggene doikoo “bilita monondok” mo sangalaasan ko Bilita Monondok mo lapamo komuyu talimayo doi kami, mianoo sio Mian Bisa naukume!
10Oilano tukon doiya natokitaan yaku kabi-kabi moini doi banggapi naakuiyo? Tutuu aki! Yaku tongo moinikene pangakuan doi Mian Bisa. Oila yaku daano kakaate mangala noa doi banggapi sulano nasinanaanggon doi mian? Kalu yaku daano mokubaiyo buno doiya, yaku bolikono Kristus napeleleani.
Bulaando Paulus natealian rasul
11Utus-utus sio potoiyo baikon Bilita Monondok yaku babotilanggenedoo aki naluwe doi banggapi. 12Yaku aki mantalima bilitadoo doi banggapi, tukon akiyo komeeng komian mootunggukene doi yaku. Yesus Kristus susuungo komo popitoikene Bilita Monondokoo antoko doi yaku.
13 #
Kis. R. 8:3, 22:4-5, 26:9-11 Tantu komuyu lapamo molongol tentang daku tuboan looluk buno meeng komian mangangga agama Yahudi. Komuyu toiyo bulaando daku baranian kubaiyano Mian Bisa najemaat tukon bulaando daku motikasan kakaate momanase. 14#Kis. R. 22:3 Doi mangampakongganan agama Yahudi, yaku lobioniiyo ko Yahudi miano mo pokakana tukon yaku. Yaku molole tuuno doi langge-langge tentang adat tumbunggami.
15 #
Kis. R. 9:3-6, 22:6-10, 26:13-18 Bai sabab Mian Bisa noano namonondokan, Yana lilike yaku akiyoon kusinuung tukon uange yaku sulano leleaniyo Yana. 16Mian Bisa okitakene kona Pau doi yaku sulano Bilita Monondok tentang Na Pau namoola yaku babotilanggene doi mian badaang mobolikon Yahudi. Doiya kosinggatoo yaku aki kutaus doi meeng komian sulano mangkabi otinau. 17Yaku koidan aki kutaus doi mian badaang doi Yerusalem mo lapamo mantailukon doi yaku teali rasul. Bai yaku taus doi lipu Arab, maka idoo abali koidan ke Damsyik. 18#Kis. R. 9:26-30 Tolu kotaun doibundu yaku taus ke Yerusalem sulano potoikon tukon Petrus. Yaku dungol tukon yana tongo songulo lima kooloyo kona kalumbit. 19Yaku aki kuposuung tukon rasul-rasul bailon, tongo Yakobus, Temeneno utuso.
20Oila daku tinulis nia bisa. Mian Bisa toiyo baikon yaku aki kubakala-kala!
21Lapa doiya yaku taus doi lipu-lipu Siria tukon Kilikia. 22Polong naiya kotempono jemaat-jemaat Salani doi Yudea daano komo akiyoon natingoniiyo yaku tukon tontong. 23Yanila tolongo molongol mian mobantile, “Mian mo looluk lokis-lokise kami, diabudodoo babotilanggene manganggaan molooluk yase nainakiyonggon.” 24Maka yanila nggaale ko Mian Bisa sabab yaku.
Currently Selected:
GALATIA 1: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
