RASUL-RASUL SALITANO 6
6
Pitu komian potombonii
1Yesus Napololaing-pololaing pololokon malumbit pololokon sosuungi badaang. Doiya kosinggatoo ko Yahudi miano mobasilingan Yunani, teali aki nasanaang doi Yahudi mian-mianoo motuleng. Komo basilinganoo Yunani bantile, “Kombai boi-boine mo lapamo balu aki namalaat obos onggos samba-samba kooloyo mo inobos-obos doi mian.” 2Tobikon doiya, do rasul-rasuloo mosongulo lua pototongikene sasaibino kona pololaing tukon bantile doi yanila, “Aki namonondok kalu kami tade mobabilitakanggene ko Mian Bisa nabantilan, sabab sio mongurus soal-soal kinaan. 3Jadi, tadukai Utus-utus komuyu pomolilik pitu komian mo monondok kona sipat tukon kinuasaimo Mian Bisa Na Roh tukon pandoi, mo moola kami parentayo mouluse nasoal-soal nia; 4sabab kami yase sambeang tukon babulitakanggene ko Temeneno nabantilan.”
5Sasaibino do mianoo yase do rasul-rasuloo nagalal. Maka yanila piliyo Stepanus, meeng komian mo mangangga tuuno doi Yesus tukon kinuasaimo Mian Bisa Na Roh. Koidan toliliko: Filipus, Prokorus, Timon, Parmenas, tukon Nikolaus doi Antiokhia; yana bolikon Yahudi miano bai yana usoko agama Yahudi. 6Do mianoo mopitu inusulkanggon doi rasul-rasuloo, maka dopai rasul-rasuloo sambeango tukon mangkabi balakaat doi Temeneno motuuk doi yanila.
7Bunomo doiya kobilita moluwedoi Mian Bisa pololokono tololongol tukon Yesus Napololaing-pololaing doi Yerusalem pololokono koidan tosuungi badaang. Tukon badaang koidan koimam-imam mo mangangga doi Yesus.
Stepanus linako
8Stepanus Mian Bisa balakaatiyo tuuno, tobikon yana mongkubai badaang kokuasa mominasaindinggon tukon langge-langge mobolikon langge doi antara masarakat. 9Bai daano ko mian-mian mo lawane yana; yanila daano anggota-anggota bonua kaledaan mo sinombuikon Bonua Kaleda Mian-mian mo Bebas. Anggota-anggota bonua kaledadoo daano Yahudi miano doi Kirene tukon Aleksanderia. Yanila tukon Yahudi miano doi Kilikia tukon Asia ponggeeleki tukon Stepanus. 10Bai yanila aki namoola bantayo oila komo Stepanus bantile, sabab ko Mian Bisa Na Roh beenamo yana pandoiyan mobasilingan. 11Tobikon doiya yanila matambo moimoiya komian sulano nabantile, “Kami lengele do mianoo totulaiyo Musa tukon Mian Bisa!” 12Bunomo kai doiya yanila natuduwano komian tukon pamarenta-pamarenta Yahudi, tukon guru-guru agama. Maka yanila ampakono molakoyo Stepanus, doibundu yanila babayomo Stepanus mo mangadap doi Pangadilan Agama. 13Tukon yanila mangadapene kosakisii-sakisii mo mebee katalangan-katalangan mo aki nabisa doi Stepanus. Sakisii-sakisiidoo bantile, “Mian nia sidutu totulaiyo ko Temeneno Na Bonua mo moliyous tukon totulaiyo ko Mian Bisa naparenta-parenta Musa mo pelenggene. 14Kami lapamo lengele yana mobantile, baikon Yesus doi Nasaretoo naikon lepeyo naiya Temeneno nia Na Bonua, maka naboliiyo sasaibino koadat-istiadat Musa mo obulusene doi kita!” 15Sasaibino komian mo daano mopototongi doi lapatoo Pangadilan Agama mbalenge Stepanus. Tukon doiya kosinggatoo Stepanus tokita koduduso buno malaekat duduso.
Currently Selected:
RASUL-RASUL SALITANO 6: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
