RASUL-RASUL SALITANO 28
28
Doi Malta
1Sambuno polong doi buta tina tukon salamat, maka nasodo kami toiyo baikon do togongoo kosambuno Malta. 2Kotumbuno do togongoo monondok tuuno doi kami. Yanila talimayo kami sasaibino tukon monondok tukon okoitiyo koaung tuuk kami sabab tambuuno lubat koudan tukon kodapang kai kumelon. 3Paulus mangatambun kayung, tukon abese do kayung-kayungoo doi aung bungkono. Daanoon yana mokubaiyo doiya, komeeng kobinda mosumbot, sabab namoonasan do aungoo, maka nakakate tukon nakaleyo kolimano. 4Salataa do togongoo tumbuno kitayo do bindadoo motongulur doi Paulus limano, yanila pobotiiyonggon meeng tukon bailon, “Naiya mian nia tantumo pangakate, sabab mau kai nalapamo luput luwe kosilakaan doi tobun, Dewi Keadilan aki nabatadikene yana natubo.” 5Bai Paulus tipasene do bindadoo doi aung lalomo, tukon aki nalasayo masakit mau nabaino soisik. 6Yanila pikikene naapa doiya Paulus limano naikon boboongano kai sosinggoton yana naikon tuwong mate. Bai salataa montotiili moimoiya kolumbito tukon akiyo kolangge meeng moluar biasa komo teali doi yana, yanila napikiran tobolii maka yanila bantile baikon Paulus daano kai dewa.
7Aki naodoon doi tampatoo daano kobuta Publius koona, pamarenta mobabasal doi togongoo. Tukon sanaang konoano yana talimayo kami buno natamu tolu kooloyo kolumbito. 8Doiya kosinggatoo kotamano daano momasakit, kanakon maligoot tukon masakit kotiano. Paulus ampakon duutiyo do langgaidoo momasakit maka sambeang tukon abese kolimano doi bungkukono sahingga yana tangalin. 9Tobikon kadadianoo sasaibino komian mo seselon doi togongoo lubat doi Paulus, tukon yanila tinangalinggon. 10Yanila mebeekon doi kami badaang kotambo, tukon salataa kami naikon talabut, yanila mababa doi kapal sasaibino komo kami palaluuwo tuuk doi mai ampakonan.
Luwedoi Malta ko Roma
11Sambuno lapa tolu kobituwon indaa, kami lengget luwedoi togongoo lakit komeeng kokapal moluwedoi Aleksandria komo po pupuson kotempo tolopot balabu doi togongoo. Doiya kapaloo mapake lambang, “Dewa Pinga Kastor tukon Poluks”. 12Kami balabu doi kota Sirakusa tukon dungol idoo tolu kooloyo. 13Luwe idoo kami talabut koidan manisikiyo kotape polong doi kota Legium. Modoakon kombombuul tambuuno puul doi lalom, sahingga tolongo lua kooloyo kami polongo doi kota Putioli. 14Idoo kami pososuung komoimoiya komian mo manganggamo doi Yesus, tukon luwe yanila naundangan kami podungoli tukon yanila meeng kominggu kolumbito. Maka kami ambakono doi Roma. 15Utus-utus doi Roma mo manganggamo doi Yesus ndongoliiyo kobilitano tentang doi kami, sahingga yanila lubat polong doi Labotan Apius tukon Tolu ko Bonua Sambuan sulano natalimayo kami. Salataa Paulus pososuung tukon yanila, yana mangkabi kinatauwan doi Mian Bisa tukon konoano teali moonggol.
Doi Roma
16Salataa polong doi Roma, Paulus minoolakon nadungol susuungo tukon natinotooli doi meeng kosuludadu.
17Sambuno tolu kooloyo, Paulus uange kotokoh-tokoh Yahudi miano. Tukon sambuno lapa yanila pototongi, yana bantil doi yanila, “Utus-utus! Yaku aki kusalakene oioila motuuk doi nda bangsa, kai lupaiyo koadat kabiasaan komo kita talimayo luwedoi tumbunggita. Mau kai nabuno doiya yaku linako doi Yerusalem tukon sinalakanggon doi Roma miano. 18Salataa daku perkara pinaresamo, yanila yase bebaskanggene yaku, sabab tokita yaku aki kumongkubai meeng kokasalaan komo pantas inukum tukon ukuman mate. 19#Kis. R. 25:11 Bai sabab ko Yahudi miano tantaange, tapakisaa yaku tuntute daku perkara nainadili doi pengadilan Tomundo Roma. Yaku kubaiyo doiya bolikon sabab yaku daano kolangge meeng kuinadukanggon motuuk doi kubangsa susuunggu. 20Tukon doiyamo kai kosababpo yaku kabiyo kupososuung tukon komuyu sulano basa-basalita; sabab yaku tinalunggu, tobikon Pasalamaton mo minoi-moinikon doi bangsa Israel.”
21Maka yanila bantile doi yana, “Kami akiyoon mai mantalima meeng kosurat luwedoi Yudea manganai doi Utus. Tukon akiyo komeeng koutus kai moluwe indaa komo lubat mababa bilita manganai Utus kai babisala mo lokis manganai Utus. 22Bai kami yase koidan molongol tentang Utus namanganggaan, sabab kami sasaibino lapamo lengele komian mototulaiyo kootunggul Utus mo taaniyodoo.”
23Maka yanila tukon Paulus matantukon meeng kooloyo sulano napososuung. Doi oloyodoo badaang komian molubat doi Paulusoo natampat dungolan. Luwe dodowa polong kinobian Paulus jelaskanggene tukon babilitakene doi yanila kobilita tentang bulaando ko Mian Bisa namaparentaan pokakana ko Tomundo. Tukon momapake ayat-ayat moluwedoi Musa na Buku tukon Buku Nabi-nabi, Paulus kakaate mokubaiyo yanila mangangga tentang Yesus. 24Daano komo mangangga naikon oila komo Paulus nabinantil, bai daano koidan komo aki namangangga. 25Tukon napoo palaat mo posasala yanila tinggalemo do tampatoo, sambuno Paulus bantile doi yaniladoo, “Takainomo kana tuuno oila ko Mian Bisa Na Roh nabinantil moluwedoi Nabi Yesaya doi tumbumuyu!
26 #
Yes. 6:9-10
Mian Bisa bantile,
‘Ampakono bantile doi bangsa nia:
Komuyu naikon banggadudul molengele, bai aki pomangalati;
komuyu naikon banggadudul mopalatikanggene bai aki potoiyo oila komo teali.
27Sabab nabangsa nia napikiran lapamo teali mokisul,
kopai tolingaino tealimo bongol
tukon kopai matano lapamo inopiit.
Naiya teali sulano yanila matano inai namokita,
yanila tolingaino inai molongol,
yanila napikiran inai namangalati,
tukon inai naabali doi Yaku,
maka Yaku naikon tangalinggene yanila.’ ”
28Doibundu Paulus bantile, “Utus-utus sio potoiyo baikon bilita tentang kasalamatan mo luwedoi Mian Bisa budodoo lapamo pinolonggon doi bangsa-bangsa bailon mo bolikon Yahudi. Yanila naikon tulutiyono!” [ 29Sambuno lapa Paulus bantile buno doiya, ko Yahudi mianodoo tinggalemo do tampatoo tukon pogagai meeng maka bailon.]
30Lua kotaun kona kalumbit Paulus dungol doi Roma, doi bonua mo sabele susuungo. Yana sanaang momantalima sasaibino komian komo lubat duutiyo yana. 31Tukon barani yana pailukene doi yanila tentang bulaando ko Mian Bisa namaparentaan pokakana ko Tomundo tukon tentang Yesus Kristus. Paulus kubaiyo doiya tukon bebas, tukon aki nasinembang-sembang.
Currently Selected:
RASUL-RASUL SALITANO 28: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
