RASUL-RASUL SALITANO 26
26
Paulus belayo kobutongo doi Agripa salaano
1Agripa bantile doi Paulus, “Ikoo linoason mobasilingan sulano mubelayo kobutomu.” Maka Paulus bingkate kolimano maka pelenggene kona pombelaan buno naiya nia,
2“Ko Mulia Tomundo Agripa! Yaku lasayo untung tuuno sabab yaku moola mopelenggene daku belaano kobutonggu doi Tomundo salaano manganai sasaibino kopangaduan komo inajukanggon doi Yahudi miano motuuk doi yaku; 3toloutama tuuno sabab Tomundo toiyo tutuu koadat istiadat tukon masaala-masaala Yahudi miano. Luwe do sababpoo, yaku kabiyo sanaango kai Tomundo mondongolii daku katalangan tukon sabal.
4Sasaibino ko Yahudi miano toiyo bulaando daku tuboan salataa yaku daano mopaumalanekon. Yanila toiyo baikon salataa yaku teali mian paumalane, yaku tubo doi antara kubangsa susuunggu doi Yerusalem. 5#Kis. R. 23:6; Flp. 3:5 Lapamo malumbit yanila atoiyano tentang yaku. Tukon kalu yanila yase, yanila moola mebee kasaksian baikon salataa doi tumbe yaku lapamo tubo buno Parisi miano tukon loingiyo sasaibino koparaturano komo ketaat tuuno doi mai agama lalomo. 6Tukon budodoiya yaku kokondong naimbaa sulano kupinaresa sabab yaku anggayo naikon koperjanjian komo kinubai luwe Mian Bisa doi tumbunggita. 7Doiya perjanjianoo doiyamo koidan komo minoi-moinikon doi songulo lua kobenseno bangsa Israel, tobikon yanila sambeang doi Mian Bisa oloyo popook. Tukon tobikon yaku anggayo naikon do perjanjianoo, Tomundo mo mulia, yaku inasalakon doi Yahudi miano. 8Bulaando utus-utus Yahudi miano aki namoola anggayo baikon ko Mian Bisa otuboiyo koidan komian momate?
9 #
Kis. R. 8:3, 22:4-5 Loolukonoo yaku susuunggu kai pikikene baikon yaku sio kulakukanggene sasaibino kolangge-langge sulano motantaange Yesus doi Nasaretoo. 10Tukon takainomo doiyamo kai komo lapamo yaku kubaiyo doi Yerusalem. Tukon surat kuasa moluwedoi imam-imam kapalano, yaku lapamo mongusokon doi talunggu lalomo badaang komian komo satia doi Mian Bisa. Yaku malaing koidan mosotujuiyo baikon yanila inotuwongi ukuman mate. 11Badaang luunggon yaku sakisaayo yanila doi bonua-bonua kaledaan, sulano mopakisaayo yanila naotinggale oila yanila nainangga. Buno doiya kona moonasan konoanggu motuuk doi yanila, sulano doi kota-kota bailon kai yaku ampakon molelenggene yanila indaa.”
Paulus basalitakene kona pangalaman
(Kis. R. 9:1-19, 22:6-16)
12“Tukon do makisuutoo doiya koidan yaku mababa surat kuasa moluwedoi imam-imam kapalano tukon ampakon doi Damsyik. 13Tukon doiya kosinggatoo yaku doi loloon tanga, salataa suun kooloyo, Tomundo mo mulia, yaku kitayo komeeng kolangge panano luwedoi timbu mo lobian kona talaangan tukon doi oloyo. Do panadoo talaangiyo potikunggon yaku, tukon potikunggon komian mo ambakon polaing-laing yaku. Kami sasaibino tolubang doi buta. 14Maka yaku lengele koalalo mobantil doi yaku tukon silingan Ibrani, ‘Saulus, Saulus! Bulaandokon ikoo mobanggadudul momeenggon sakisaayo Yaku? Ikoo naikon lasayo masakit susuumu, kalu ikoo banggadudul momeenggon lawane Yana napimpinan mo teali mutuan.’ 15Maka yaku bantile, ‘Indee kai miano Ikoo, Tuan?’ Tukon Yesus timbiliyo, ‘Yakumo Yesus ikoo mo sakisaayo. 16Banguno tukon kokondong! Yaku okitakene kobutonggu doi ikoo tukon makisuut sulano mobingkate ikoo nateali Kupeleleani. Ikoo sio mubabilitakene doi mian bailon oila komo ikoo kitayo doi oloyo nia tentang Yaku tukon tentang oila komo Yaku naikon tudoikene doikoo naikon doi oloyo-oloyo salaando. 17Yaku naikon osodiiyo ikoo doi bangsa Israel tukon doi bangsa-bangsa bailon, mo bolikon Yahudi. Yaku naikon sumboliiyo ikoo ampakon doi yanila sulano mubilate yanila matano, 18sulano yanila natobuat doi kalipookan tukon usok doi madialanan lalomo; sulano yanila natongosodii doi Ibiliis nakuasa, maka kinuasai doi Mian Bisa. Maka tukon mangangga doi Yaku yanila nalalim-lalim tinolos tukon yanila naikon tealimo Mian Bisa namian mo tolilik.’ ”
Paulus jelaskanggene kona limang
19“Tobikon doiya, Tomundo Agripa, yaku sidutu kakaate motaatiyo doi bakitaan mo lapamo yaku talimayo doi Mian Bisadoo. 20#Kis. R. 9:20, 28-29 Tukon terus terang yaku pailukene doi mian baikon yanila sio napo badodoloon doi yanila nalalim-lalim tukon salakanggene kobutongo doi Mian Bisa tukon okitakene yanila natuboan lalomo baikon yanila lapamo badodoloon doi napai lalim-lalim. Yaku pailukene doiya langgedoo tumbe-tumbeno doi Damsyik, doibundu doi Yerusalem tukon doi posaapon ko Yudea tukon doi antara komian mobolikon Yahudi. 21Maka tobikon doiyamo ko Yahudi miano lakoyo yaku doi Temeneno Na Bonua tukon kakaate moakateyo yaku. 22Bai polong budodoiya nia yaku linindungi Mian Bisa, sahingga yaku moola kokondong dimbaa sulano kumebee kasaksian doi sasaibino komian – mobabasal kai mopoipoisik. Oila komo yaku mo bantile nia aki kai nasangalaasan tukon doi oila komo lapamo nabi-nabi tantukene tukon Musa; 23#Yes. 42:6, 49:6; 1Kor. 15:20 doiyamo baikon ko Tomundo Pasalamat do Mian Bisadoo mo perjanjikene sio nasakisaa, tukon teali mian tumbeno mo tubo koidan sambuno lapa mate; sulano tukon doiya yana moola mobabilitakene komadialan – doiyamo kasalamatan – mau doi Yahudi miano mau kai doi mobolikon Yahudi.”
24Daano Paulus moloolukenggene kona pombelaanoo, Festus wookon, “Ikoo lapamo tando Paulus! Komu motoiyanoo badaang lapamo tealikene ikoo tando!” 25Bai Paulus timbiliyo, “Yaku aki kutando, Mo Mulia. Bantilan-bantilan yaku mobantiledoo bisa tukon sumbot doi pikilan mo sehat. 26Tomundo Agripa susuungo toiyo tutuu naikon do langge-langgedoo. Doiyamo kosababpo yaku barani mobasilingan doi Tomundo salaano tukon terus terang. Yaku anggayo akiyo mau meeng moluwedoi langge-langgedoo komo akiyoon Tomundo natoiyo, sabab sasaibino doiya aki nateali doi tampat-tampat mo tosookon. 27Komo Mulia Tomundo Agripa, oilakai Tomundo anggayo naikon oila komo nabi-nabi nabinantil? Yaku pikikene Tomundo anggayo!”
28Maka Agripa bantile doi Paulus, “Ikoo neneeke gambang mokubaiyo yaku teali Salani miano doi tempo nia lalomo mo dudul?” 29“Doi tempo mo dudul kai doi tempo nabulusanan,” Paulus timbiliyo, “Yaku sambeang doi Mian Bisa sulano Tomundo tukon Tuan-tuan sasaibino mo mondongolii yaku doi oloyo nia namoola teali buno yaku nia – kasuali talunggu nia, natantuan!”
30Napupusan tomundo, gubernur tukon Bernike, tukon sasaibino komo bailonggon kokondongo. 31Salataa daano doi tonggulung, yanila pobontiikono pau meeng maka bailon, “Naiya mian nia aki namongkubai meeng kolangge mo moola yana inukum tukon ukuman mate kai tinalunggu.” 32Maka Agripa bantile doi Festus, “Naiya mian nia moolamo nasinodii, kalu andeno yana aki natuntute kona perkara nainulus doi pangadilan Tomundo.”
Currently Selected:
RASUL-RASUL SALITANO 26: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
