Roma 6
6
Ánti pohintuwuꞌtaꞌ hai Iesu, tekábáhámokeꞌ hangko i kuasaꞌ dósá (6:1–8:39)
Kitaꞌ to mepoinálái, tiꞌarapokeꞌ mohintuwuꞌ hai dósá, agáiáná mohintuwuꞌrakeꞌ hai Kerisitu
1Apa mani to peisá ina tauliꞌ? Ane Pueꞌ Ala moámpungi dósántaꞌ ánti kabulána laluNa i kitaꞌ, ba maroꞌa ane mobábehikeꞌ oaꞌ dósá bona katetátámbáiá kabulána laluNa moámpungikeꞌ? 2Tongawaꞌ tiꞌara maroꞌa! Tauna to mate tiꞌara piꞌi peisá mokale. Noꞌonoꞌ woꞌo, ane matekeꞌ hingkakani hai Kerisitu, lempóna: peundeꞌána laluntaꞌ mobábehi dósá hangaa-ngaa mate woꞌo, hai tiꞌara piꞌi makuasaꞌ i kitaꞌ. Ane matemokeꞌ i dósá, noumbá haneꞌi peisákeꞌ tueꞌ i kamadósá? 3Tiꞌara paꞌi niꞌisá, kitaꞌ rariumokeꞌ i lalu hangaꞌna Kerisitu Iesu, hai karariuntaꞌ iti molempónga kamohintuwuꞌtaꞌ miꞌi hai Kerisitu Iesu i kamateNa. 4I karariuntaꞌ iti, kitaꞌ nodokeꞌ tauna to mate hai ratawu hingkakani hai Kerisitu. Hai nodo Kerisitu rapatueꞌ huleꞌ hangko i kapate ánti kuasaꞌna Pueꞌ Ala Umántaꞌ, noꞌonoꞌ woꞌo kitaꞌ ina mouláꞌkeꞌ rárá to woꞌu.
5Mewaliꞌ, ánti pohintuwuꞌtaꞌ hai Iesu i lalu kamateNa, Pueꞌ Ala ina mopatueꞌkeꞌ woꞌo huleꞌ hibali hai Iesu, 6láwiꞌ taisá, i tempóna Kerisitu rapapate i kau mombehape, nodo rárá katueꞌtaꞌ hangkoia rapapate woꞌo hingkakani hai Ia. Mewaliꞌ kuasaꞌ dósá i lalu katueꞌtaꞌ magero, álána tiꞌarapokeꞌ napohawiꞌ dósá. 7Láwiꞌ heáná peá to mate hingkakani hai Kerisitu, tekábáhá miꞌi hangko i kuasaꞌ dósá. 8Mewaliꞌ, láwiꞌ matemokeꞌ hingkakani hai Kerisitu, tapoinálái ina tueꞌkeꞌ woꞌo hingkakani hai Ia. 9Láwiꞌ taisá, Kerisitu rapatueꞌ huleꞌ, hai roo onoꞌ, tiꞌara piꞌi ara kuasaꞌ to peisá mopapate Pueꞌ Iesu, láwiꞌ Ia tueꞌ oaꞌ duuꞌna i rue-ruena. 10Ia hangkani peá mate monangi kuasaꞌ dósá duuꞌna i rue-ruena. Deꞌe-deꞌe Ia tueꞌ oaꞌ hai mampeuláꞌi peundeꞌána Pueꞌ Ala. 11Noꞌonoꞌ woꞌo kitaꞌ, hangaa-ngaa tauliꞌ i laluntaꞌ: “Mateaꞌ hingkakani hai Kerisitu Iesu; tiꞌarapoꞌ mohintuwuꞌ hai dósá, agáiáná tueꞌaꞌ bona mouláꞌaꞌ peundeꞌána Pueꞌ Ala ánti pohintuwuꞌkuꞌ hai Kerisitu Iesu.”
12Onoꞌ miꞌi haneꞌi kuweꞌikou laluita, halalu-halalu: ineeꞌ nipatodáhi dósá mokuasaꞌi katueꞌmi i duniáꞌ deꞌe; ineeꞌ nipeuláꞌi peundeꞌána lalumi to kadake. 13Wátámi ineeꞌ nipakeꞌ mobábehi dósá hai bábehiá to kadake. Rángina miꞌi nipaisarenga katueꞌmi i Pueꞌ Ala, láwiꞌ tekábáhámokou hangko i katueꞌmi hangkoia hai nilámbiꞌ miꞌi katueꞌ to woꞌu. Hangaa-ngaa nihuhuꞌ wátámi i Pueꞌ Ala bona wátámi nipakeꞌ mobábehi bábehiá to maroꞌa.#6:13 Básá woꞌo Roma 12:1-2; 13:12. 14Láwiꞌ kómu, tiꞌarapokou nakuasaꞌi dósá, hai tiꞌarapokou mehárungá i Paturoꞌna Musa bona molámbiꞌkou katehómpóꞌ, agáiáná mehárungákou i kabulána laluna Pueꞌ Ala.
Hangaa-ngaa mewaliꞌkeꞌ hawiꞌna Pueꞌ Ala
15Mewaliꞌ, ane tiꞌarapokeꞌ mehárungá i Paturoꞌna Musa, láwiꞌ mehárungákeꞌ i kabulána laluna Pueꞌ Ala i kitaꞌ, apa to hangaa-ngaa tabábehi? Ba peisá manikeꞌ oaꞌ mobábehi dósá? Tiꞌara! 16Niꞌisánto, ane rápáꞌna, mengkoruꞌkou i hadua tauna hai nipeuláꞌi hawaꞌna, kómu mewaliꞌkou hawiꞌna tauna iti. Noꞌonoꞌ woꞌo hai dósá: ane nipeuláꞌi oaꞌ peundeꞌána lalumi to kadake, ina mewaliꞌkou hawiꞌna dósá. Kahópóꞌána ina molámbiꞌkou kapate to mogáákikou hangko i Pueꞌ Ala duuꞌna i rue-ruena. Agáiáná ane mampeuláꞌikou peundeꞌána Pueꞌ Ala, mewaliꞌkou hawiꞌNa, haneꞌi mohintuwuꞌkou hai Ia.
17Hangkoia, hangko tiꞌara manikou mepoinálái i Iesu, napohawiꞌ manikou dósá. Agáiáná kuꞌuliꞌ handaꞌ kamaroꞌana i Pueꞌ Ala, láwiꞌ deꞌe-deꞌe mengkoruꞌkou i Pueꞌ Ala hangko i lalumi ntepuꞌu hai mouláꞌkou paturoꞌ to rapahaweꞌákou. 18Mewaliꞌ tekábáhámokou hangko i kanapohawiꞌmi dósá, hai mewaliꞌmokou hawiꞌna Pueꞌ Ala to mampeuláꞌi peundeꞌáNa. 19Pándiriꞌ deꞌe kupakeꞌ bona poloꞌ niꞌisá tunggáiána paturoꞌkuꞌ. Hangkoia napohawiꞌkou dósá, láwiꞌ wátámi nipatodáhi mouláꞌ peundeꞌána lalumi to kadake hai to tiꞌara hintotoꞌ, álána mantámbái riꞌi kakadakena bábehiámi. Mewaliꞌ deꞌe-deꞌe, hangaa-ngaa nihuhuꞌ wátámi i Pueꞌ Ala bona mewaliꞌkou hawiꞌNa, álána manótó ntepuꞌu bábehiámi hai magasaꞌ katueꞌmi.
20Hangkoia, tempómi mani napohawiꞌ dósá, tiꞌarakou mampekiri mokana i peundeꞌána Pueꞌ Ala. 21Pewátiꞌ apa paꞌi to nilámbiꞌ hangko i katueꞌmi to hangkoia iti? Upu-upuna iti mopaꞌara peá kamahilimi deꞌe-deꞌe, láwiꞌ kahópóꞌána bábehiámi iti moántikou i kapate to mogáákikou hangko i Pueꞌ Ala. 22Agáiáná deꞌe-deꞌe, tekábáhámokou hangko i kuasaꞌ dósá, hai napohawiꞌmokou Pueꞌ Ala. Iti to moánti pewátiꞌ i kómu, álána magasaꞌ katueꞌmi, hai ina molámbiꞌkou katueꞌ to maroꞌa duuꞌna i rue-ruena. 23Háwángina dósá ia miꞌi kapate, agáiáná ánti kabulána laluna Pueꞌ Ala, katueꞌ to maroꞌa to tiꞌara mokahópóꞌá Naweꞌikeꞌ mbero-mbero moliu Kerisitu Iesu Pueꞌtaꞌ.
Currently Selected:
Roma 6: NTBEP
Highlight
Share
Compare
Copy
Want to have your highlights saved across all your devices? Sign up or sign in
Bahasa Behoa Shorter Bible © Indonesian Bible Society, 2015.
