Surona Pueꞌ Iesu 27
27
Paulu raꞌánti lao i Roma
1Roo onoꞌ, rapakanótó miꞌi hangaa-ngaa pohuꞌangkaiꞌ moduanga i tahiꞌ lao i tampoꞌ Italia. Paulu hai bahangapa tauna ntániꞌna to ratarungku rapehuhuꞌá i Iuliu, hadua tadulako surudadoꞌ to motadulakoi hangatu surudadoꞌ toRoma. Hira rauliꞌ “surudadoꞌna Datu Mahile”. 2Duanga tahiꞌ to kipengkaheꞌi iti, ia miꞌi hambuaꞌ duanga mahile hangko i kótá Adamitiu, hai ina mehupeꞌ-hupeꞌ i wánuá-wánuá to i wiwi tahiꞌ i poropensi Asia. Hadua rángángkiꞌ to meuláꞌ i poduangangkiꞌ ia miꞌi Aritaku, to hangko i kótá Tesalonika i tampoꞌ Makedonia.
3Hangaloá miꞌi polumaongkiꞌ, mehupeꞌangkaiꞌ i kótá Sido. Maroꞌa ntepuꞌu laluna Iuliu i Paulu, onoꞌ miꞌi haneꞌi Paulu naweꞌi tempó moweoꞌ rángána i lalu kótá iti, bona apa to naparaluu peisá raweꞌi. 4Hangko ionoꞌ, kipaliliu poduangangkiꞌ. Ánti karumihina wui hangko i lindoꞌ, duangangkiꞌ menánáꞌ peá i puló Sipuru tándáꞌ i mata alo bona teháláꞌangkaiꞌ hangko i wui to rumihi iti. 5Roo onoꞌ, moduangaꞌangkaiꞌ i tahiꞌ moliuangkaiꞌ poropensi Kilikia hai Pampilia, duuꞌna haweꞌangkaiꞌ i kótá Mira i poropensi Likia. 6I Mira iti, tadulako surudadoꞌ Iuliu molámbiꞌ hambuaꞌ duanga tahiꞌ hangko i kótá Alesandaria to ina lao i tampoꞌ Italia. Onoꞌ haneꞌi napopelimbaꞌangkaiꞌ i duanga tahiꞌ iti.
7Bahangapa alona kamaruena, maole-ole peá duanga tahiꞌ iti, hai maꞌángkárá ntepuꞌu mohungkuki kótá Kinidu. Ánti karumihina wui hangko i lindoꞌkiꞌ mai, tiꞌara kipaliliu poduangangkiꞌ nodo tunggáiángkiꞌ rungu-runguna. Onoꞌ miꞌi haneꞌi duangangkiꞌ menánáꞌ peá i puló Kereta moliu i wuntu Salamone, bona teháláꞌangkaiꞌ hangko i wui. 8Maꞌángkárá ntepuꞌu poduangangkiꞌ menánáꞌ i puló Kereta iti. Kahópóꞌána, haweꞌangkaiꞌ i pehupeꞌá duanga tahiꞌ to rahangaꞌ Pehupeꞌá Mababe, to hungkuꞌ i wánuá Lasea.
9Ánti kamawewena poduangangkiꞌ, liu miꞌi alo mahile popuasaꞌraꞌ toIahudiꞌ. Ina haweꞌ tempó lengiꞌ, tempó to melááꞌ-lááꞌi i tahiꞌ,#27:9 Melááꞌ-lááꞌi ntepuꞌu moduanga tahiꞌ wulá kahahioꞌ, hai tiꞌaraheꞌ peisá moduanga wulá kahampuloꞌ haweꞌ wulá kaduá. Alo mahile popuasaꞌ ia miꞌi alo to raposusai ntepuꞌu toIahudiꞌ. Mopuasaꞌheꞌ alo iti, hai Tadulako Menómbá Mahile mampopenómbáheꞌ binataꞌ bona dósáraꞌ tauna rawehángi (básá Áturá Menómbá gáláꞌna ka-16; 23:26-32; Poimbaꞌ 29:7-11). Alo iti mantepuꞌu raposusai hangko i kahópóꞌána wulá kahahioꞌ haweꞌ i pantepuꞌuána wulá kahampuloꞌ. onoꞌ miꞌi haneꞌi Paulu mopaingáꞌiheꞌ topobágóꞌ i duanga, nauliꞌ, 10“Halalu-halalu, mouláꞌ polámbiꞌkuꞌ, ina hurewuꞌkeꞌ ane tapaliliu poduangaꞌántaꞌ. Ina handaꞌ kamarugiꞌántaꞌ. Tiꞌara peá duanga tahiꞌ deꞌe hai inánti to ina marugiꞌ, agáiáná ara woꞌo to ina mate.” 11Agáiáná tadulako surudadoꞌ iti tiꞌara mampehádingi laluitana Paulu, láwiꞌ napehádingi mani laluitaraꞌ topoánti duanga hai pueꞌna duanga iti. 12Mewaliꞌ, ánti katiꞌárána maroꞌa mampegiá kaliuna tempó lengiꞌ i pehupeꞌá iti, onoꞌ miꞌi haneꞌi handaꞌ tauna membiáꞌ bona pohuꞌangkaiꞌ. Rahárungá peisáꞌangkaiꞌ haweꞌ i kótá Peniꞌ, mampegiá kaliuna tempó lengiꞌ. Peniꞌ iti ia miꞌi pehupeꞌá duanga tahiꞌ i puló Kereta to maroꞌa rapehupeꞌi i tempó lengiꞌ, láwiꞌ teháláꞌ hantóiꞌ hangko i wui to hangko i katámpuá alo tándáꞌ i wóiꞌ hai tándáꞌ i wongko.
Wui to rumihi i tahiꞌ
13I tempó iti, maroꞌa hantódiꞌ pewuina hangko tándáꞌ i wóiꞌ, onoꞌ miꞌi haneꞌi rauliꞌ ripaꞌi topobágóꞌ i duanga tahiꞌ, peisámongkaiꞌ mopaliliu poduangangkiꞌ. Mewaliꞌ besiꞌ popotahana duanga tahiꞌ#27:13 besiꞌ popotahana duanga tahiꞌ - Básá Indonesia: jangkar ba sauh. iti raoreꞌ miꞌi, hai moduangaꞌangkaiꞌ menánáꞌ i puló Kereta. 14Agáiáná, tiꞌara marue hangko ionoꞌ, kipohidupaꞌá miꞌi wui to rumihi hangko i lore tándáꞌ i mata alo, to rauliꞌ “Wui Mata Alo”. 15Ánti katiꞌárána nabuku duangangkiꞌ molindoꞌ wui, onoꞌ miꞌi haneꞌi kipatodáhi peá napotió wui. 16Poliungkiꞌ i puló to kókóiꞌ to rauliꞌ Kauda, teháláꞌangkaiꞌ hangko i wui. I tempó iti, kipári-pári modiiꞌ sikotiꞌ hangko i taleuꞌ duanga tahiꞌ, 17haneꞌi kihumpádá i wongkona duanga hai kitakaꞌ kipakaróhó. Roo onoꞌ, duangangkiꞌ ratakaꞌ hai gulaꞌ bona maróhó. Malááꞌheꞌ topobágóꞌ, duanga iti ina tehumpádá i wungi i kahadengkeána uwai to hungkuꞌ i tampoꞌ Libia.#27:17 tampoꞌ Libia - I lalu básá Iunani: Sirtis. Ia miꞌi hanggáláꞌ hangko i tampoꞌ Libia i Afrika tándáꞌ i wongko. Ara wungi to melááꞌ-lááꞌi ntepuꞌu láwiꞌ modiiꞌ apa peá to meángkáꞌ ba tehumpádá ionoꞌ. Onoꞌ miꞌi haneꞌi tendana duangangkiꞌ rapopendáulu hai rapatodáhi napotió wui.
18Ánti angi to rumihi iti, kahalona mantepuꞌumoheꞌ motibe inántina duanga bona manangkoꞌ. 19Kahalona wopiꞌi, párewána duanga to ratibe i tahiꞌ. 20Bahangapai alona, tiꞌaraꞌangkaiꞌ manginta wangkaꞌna alo ba betue, hai angi tiꞌara mengkaroo. Kahópóꞌána, tiꞌara piꞌi ara pehárungángkiꞌ ina tueꞌ.
21Ánti kahandaꞌna pobágóꞌraꞌ topobágóꞌ i duanga tahiꞌ iti, bahangapa alona tiꞌaraheꞌ nampakaꞌ mandeꞌ, onoꞌ miꞌi haneꞌi Paulu meángkáꞌ i oloꞌraꞌ, nahángáꞌáheꞌ, “Halalu-halalu, ane kenipeuláꞌi laluitangkuꞌ iaꞌo bona ineeꞌkeꞌ pohuꞌ hangko i puló Kereta, ketiꞌarakeꞌ nodeꞌe. 22Agáiáná deꞌe-deꞌe kuhángáꞌákou: nipakaróhó lalumi láwiꞌ tiꞌara haweꞌ hadua to ina mate. Bateꞌna peá duanga tahiꞌ deꞌe to ina marugiꞌ. 23Kuisá noꞌonoꞌ láwiꞌ iakáindi, Pueꞌ Ala to kupenómbái hai to mokádipuráꞌaꞌ, mohuoꞌ malaꞌekaNa mai i kódóꞌ. 24Nauliꞌ malaꞌeka iti node: ‘Paulu, ineeꞌkoꞌ malááꞌ, láwiꞌ bateꞌmu ina lao molindoꞌ Datu Mahile i Roma. Hai ánti kamaꞌahiꞌna Pueꞌ Ala i hio, tiꞌara ara haweꞌ hadua i duanga tahiꞌ deꞌe to ina mate.’ 25Onoꞌ miꞌi haneꞌi halalu-halalu, hangaa-ngaa nipakaróhó lalumi, láwiꞌ kupoinálái apa to nahángáꞌáꞌaꞌ Pueꞌ Ala, bateꞌna ina mewaliꞌ. 26Agáiáná duanga tahiꞌ deꞌe hangaa-ngaa tehumpádá i hambuaꞌ puló.”
27Hampuloꞌ miꞌi hai iba wengina, duangangkiꞌ napotió oaꞌ wui to rumihi i tahiꞌ Adaria. Tangaꞌ káindi, topobágóꞌna duangangkiꞌ moisá babilaꞌ katiꞌárána piꞌi karaoꞌ hangko i lorena láwiꞌ mohádimoheꞌ bálumbá, 28onoꞌ miꞌi haneꞌi hambuaꞌ watu popehukáꞌ raulu i tahiꞌ bona raisá kakaladuna. Kakaladuna iti, rekeꞌ-rekeꞌna iba puloꞌna mete. Roo onoꞌ, raulu wopiꞌi duuꞌna tóá, tálu puloꞌna peá mete kakaladuna. 29Malááꞌmoheꞌ topobágóꞌna duangangkiꞌ láwiꞌ rapekiri ina tehámpádáꞌangkaiꞌ i watu rangka. Onoꞌ miꞌi haneꞌi iba wuaꞌna besiꞌ popotaha raulu i lalu tahiꞌ i taleuꞌ, bona duangangkiꞌ tetaha. Kihárungá bona hawiáꞌ miꞌi mabaa. 30Hangko ionoꞌ, topobágóꞌheꞌ i duangangkiꞌ mampoinaoheꞌ pohuꞌ ngkábuni mopálehi duanga iti. Mampe to laoheꞌ moulu besiꞌ popotaha i lindoꞌ duanga, mole mampopendáuluraheꞌ sikotiꞌ. 31Agáiáná naita Paulu apa to rabábehi iti, onoꞌ miꞌi haneꞌi nahángáꞌáheꞌ tadulako surudadoꞌ hai surudadoꞌna, “Ane topobágóꞌ iti mopálehi duanga tahiꞌ deꞌe, tiꞌarakou ina tueꞌ!” 32Mewaliꞌ surudadoꞌ iti modepuki miꞌi popetóena sikotiꞌ álána manawoꞌ i tahiꞌ.
33Ina mesupaꞌ miꞌi alo, nahángáꞌáheꞌ Paulu, “Hangaa-ngaa mandeꞌkou upu-upu! Hampuloꞌ miꞌi hai iba alona, nipegiá peá apa to ina mewaliꞌ, hai tiꞌara mani nipoinao mandeꞌ. 34Mewaliꞌ deꞌe-deꞌe, kuhángáꞌáꞌákou, hangaa-ngaa mandeꞌkou sieruꞌ bona maróhókou, láwiꞌ tiꞌarantokou ina moapa-apa.” 35Karoona Paulu molaluita noꞌonoꞌ, ia moala miꞌi rótiꞌ hai mekakae i Pueꞌ Ala i lindoꞌraꞌ upu-upu. Rótiꞌ iti nagáláꞌ-gáláꞌáheꞌ, hai natepuꞌu miꞌi mandeꞌ. 36Karahádina tauna iti laluitana, maróhó miꞌi huleꞌ laluraꞌ, haneꞌi mandeꞌheꞌ woꞌo. 37Upu-upuangkaiꞌ to ara i duanga tahiꞌ iti, kahandaꞌkiꞌ rongatu pitu puloꞌna hai ini. 38Karoona topobágóꞌ mandeꞌ, bailoꞌ to raꞌánti duanga iti ratibe i tahiꞌ. Tunggáiáraꞌ, bona manangkoꞌ hantóiꞌ duangangkiꞌ iti.
Duanga tahiꞌ tetuhu i wungi
39Mabaa miꞌi, topobágóꞌna duanga tahiꞌ moitaheꞌ lorena, agáiáná tiꞌara raisá hangaꞌna tampoꞌ iti. Moitaheꞌ woꞌo kaꞌaraꞌá to teháláꞌ hangko i bálumbá láwiꞌ natolelingi lorena, hai wiwina kewungi. Onoꞌ miꞌi haneꞌi ratunggái, mole ba peisái ina mopatetuhuheꞌ duangangkiꞌ ionoꞌ. 40Upu-upu gulaꞌ besiꞌ popotaha radepuki, hai besiꞌ popotaha iti rapálehi i lalu tahiꞌ bona duangangkiꞌ tiꞌara piꞌi tetaha. I tempó iti woꞌo, gulaꞌ to motakaꞌ peguli duanga rakekehi, hai tendana duangangkiꞌ raꞌángkáꞌ i lindoꞌ bona raꞌántiangkaiꞌ wui manoroꞌ lao i lorena. 41Agáiáná duangangkiꞌ tetuhu i wungi i kahadengkeána tahiꞌ, hai wuáꞌna tetaha ionoꞌ. Palona duanga iti marupuꞌ narokaꞌ bálumbá tahiꞌ to mahile.
42Hangko ionoꞌ, surudadoꞌ motunggái ina mopapateheꞌ upu-upu tauna to ratarungku to raꞌánti, bona tiꞌaraheꞌ ara to meluꞌu lao i lorena haneꞌi melangka. 43Agáiáná tadulakoraꞌ mokóntóheꞌ, láwiꞌ naundeꞌ bona Paulu ineeꞌ rapopoapa, onoꞌ miꞌi haneꞌi mohuoꞌ tauna to moisá meluꞌu mentimboꞌ ioru i tahiꞌ hai meluꞌu lao i lorena. 44Roo onoꞌ, nahuoꞌheꞌ tauna to tiꞌara moisá meluꞌu moala pata ba kapengkáꞌána duanga tahiꞌ bona rapakeꞌ lao i lorena. Noꞌonoꞌ miꞌi iti kahaweꞌkiꞌ upu-upu i lorena i kamaroꞌa-roꞌa.
Currently Selected:
Surona Pueꞌ Iesu 27: NTBEP
Highlight
Share
Compare
Copy
Want to have your highlights saved across all your devices? Sign up or sign in
Bahasa Behoa Shorter Bible © Indonesian Bible Society, 2015.
