Surona Pueꞌ Iesu 24
24
Paulu i lindoꞌna Mágáuꞌ Peliꞌ
1Lima alona hangko ionoꞌ, Tadulako Menómbá Mahile Anania hai bahangapaheꞌ tadulakoraꞌ toIahudiꞌ haweꞌ i kótá Kaisarea, hai hadua tauna to mapánde molaluita ara woꞌo. Tauna iti rahangaꞌ Tetulusi. Kahaweꞌraꞌ ionoꞌ, laomoheꞌ i lindoꞌna Mágáuꞌ Peliꞌ mopahaweꞌ pesalaꞌiraꞌ i Paulu. 2Mágáuꞌ Peliꞌ mohuoꞌ miꞌi tauna moánti Paulu i lindoꞌna, hai Tetulusi raweꞌi tempó molaluita. Ia mantepuꞌu mopahaweꞌ pesalaꞌiraꞌ, nauliꞌ,
“Umángkiꞌ Mágáuꞌ Peliꞌ to kibiláꞌ! Kaiꞌ taunámu to handaꞌ, tueꞌangkaiꞌ hangko i kamaroꞌana popárentámu. Ánti kamapándemu mepárentá, maroꞌa miꞌi katueꞌkiꞌ deꞌe-deꞌe i humalele tampoꞌkiꞌ. 3Upu-upuna kitarima, hai iumbá-umbá kipomahilekoꞌ. 4Agáiáná, bona tiꞌarakoꞌ luleꞌ, kipembiáꞌ ahiꞌ bona nupehádingi laluitangkuꞌ to rembe deꞌe.
5Paulu deꞌe to paka mampoposisalaꞌ tauna i humalele duniáꞌ. Iumbá-umbá peá kalaoána, ia mopamaꞌamuꞌ laluraꞌ toIahudiꞌ bona moewaꞌheꞌ topopárentá. Hai ia miꞌi hadua tadulakoraꞌ tauna to mouláꞌ paturoꞌna hadua tauna to hangko i wánuá Nasare.#24:5 Mouláꞌ áturáraꞌ toRoma, tauna tiꞌara peisá mouláꞌ agama to tiꞌara ratarima topopárentá Roma. Tauna to moliungi áturá iti rahuku mate. ToIahudiꞌ manguliꞌ tauna to mouláꞌ paturoꞌna toNasare mouláꞌheꞌ agama to ralaraꞌ. Agáiáná nauliꞌ Paulu (wátiꞌna ka-14 haweꞌ ka-16), agama Sarani mentóáꞌ hangko i agama Iahudiꞌ, mewaliꞌ nakámpái topopárentá Roma. Tetulusi mopakóiꞌheꞌ toSarani láwiꞌ nauliꞌ mouláꞌheꞌ paturoꞌna hadua tauna to hangko i wánuá Nasare i tampoꞌ Galilea. ToIahudiꞌ hangko i tampoꞌ Iudá morekeꞌ toGalilea to i buluꞌ peheꞌ (básá Iohane 1:46). 6Pelumbuꞌna miꞌi, napoinao motitibei Támbina Pueꞌ Ala, onoꞌ miꞌi haneꞌi kihakaꞌ. [Hangkoia ara tunggáiángkiꞌ mohoda-hoda kárá-kárána mouláꞌ áturána ágámángkiꞌ. 7Agáiáná kapalaꞌ tadulako surudadoꞌ to rahangaꞌ Lisia, poloꞌ lao moala hangko i kaiꞌ. 8Hai napahaweꞌ bona heáná to mampoinao mosalaꞌi Paulu deꞌe, hangaa-ngaa mai i hio mágáuꞌ.]#24:6b-8 I surana Lukasi deꞌe (Suro) básá Iunani to sae ntepuꞌu, wátiꞌ iti tiꞌara teukiꞌ, agáiáná teukiꞌ i handaꞌ sura to raukiꞌ huleꞌ i bókóꞌ. Mewaliꞌ ane nupáresáꞌi, ina nuhádi hangko i hia katoꞌuna laluitangkiꞌ deꞌe to mosalaꞌi Paulu.”
9Upu-upu toIahudiꞌ to ara ionoꞌ, mosalaꞌiheꞌ woꞌo Paulu hai mampokana laluitana Tetulusi iti.
Paulu molaluita i lindoꞌna Mágáuꞌ Peliꞌ
10Roo onoꞌ, Mágáuꞌ Peliꞌ moángkáꞌ miꞌi taena, tandaꞌna moweꞌi tempó i Paulu molaluita. Molaluita miꞌi Paulu, nauliꞌ, “Góeꞌ ntepuꞌuaꞌ, mágáuꞌ, láwiꞌ nuweꞌimoꞌ tempó ina mopahaweꞌ i katoꞌu-toꞌuána i lindoꞌmu. Kuisá, i parena miꞌi, io mewaliꞌkoꞌ topobutusi i tampoꞌkiꞌ. 11Mewaliꞌ ane nupáresáꞌ laluitangkuꞌ deꞌe, ina tongawaꞌ katoꞌuna. Hampuloꞌ peá hai rongalo to liu, laoaꞌ i kótá Ierusale menómbá i Támbina Pueꞌ Ala. 12Tiꞌaraꞌaꞌ haweꞌ hangkani ralámbiꞌ mosisalaꞌ ba mopamaꞌamuꞌ laluraꞌ tauna to handaꞌ i Támbina Pueꞌ Ala, i támbi penómbáꞌá, ba iumbá peá i lalu kótá. 13Tiꞌara woꞌo haweꞌ hadua tauna to peisá mopatongawaꞌ katoꞌuna popahaweꞌraꞌ ininá to rasalaꞌiáꞌaꞌ. 14Agáiáná deꞌe miꞌi to kupangákuꞌ i Tuá: menómbáꞌaꞌ i Pueꞌ Ala to rapenómbái toiorungkiꞌ, mouláꞌ Paturoꞌna Pueꞌ Iesu. Paturoꞌ iti rauliꞌ ewálingkuꞌ paturoꞌ to mepakanawoꞌ. Hai bateꞌna kupoinálái mani upu-upu to teukiꞌ i Paturoꞌna Musa hai suraraꞌ nabiꞌ-nabiꞌ. 15Pehárungángkuꞌ i Pueꞌ Ala bateꞌna hibali hai pehárungáraꞌ tauna to moewaꞌaꞌ deꞌe: kupoinálái kaꞌina árána tempó to napakanótó Pueꞌ Ala mopatueꞌ huleꞌ upu-upu tomate, maroꞌa to manótó bábehiáraꞌ, maroꞌa to kadake bábehiáraꞌ. 16Onoꞌ miꞌi haneꞌi kupári-pári mobábehi oaꞌ apa to maroꞌa, bona kuisá i lalungkuꞌ katiꞌárána ara to peisá rasalaꞌiáꞌaꞌ, maroꞌa i peitána Pueꞌ Ala, maroꞌa i peitána tauna.
17Bahangapa miꞌi parena, tiꞌaraꞌaꞌ lao i Ierusale. Roo onoꞌ, laoaꞌ huleꞌ bona moántiaꞌ dóiꞌ petulungi i halalungkuꞌ toIahudiꞌ hai moántiaꞌ woꞌo popenómbángkuꞌ i Pueꞌ Ala. 18Tangaꞌkuꞌ moánti popenómbángkuꞌ iti, láwiꞌ roomoꞌ mopamagasaꞌ mouláꞌ ádá ágámángkiꞌ, ara bahangapaheꞌ toIahudiꞌ to molámbiꞌaꞌ i Támbina Pueꞌ Ala. I tempó iti, tiꞌara handaꞌ tauna to hingkakani hai kódóꞌ, hai tiꞌara woꞌo ara to mohewo-hewo. 19Agáiáná araheꞌ ionoꞌ bahangapa toIahudiꞌ hangko i poropensi Asia. Katoꞌuána, kehira riꞌi to hangaa-ngaa mai mosalaꞌiaꞌ i lindoꞌna mágáuꞌ, ane salaꞌ mpuꞌuaꞌ, 20agáiáná hira tiꞌaraheꞌ ara ieneꞌ. Mewaliꞌ, rángina miꞌi tauna to mosalaꞌiaꞌ to araheꞌ ieneꞌ deꞌe-deꞌe mopahaweꞌ apa bábehiángkuꞌ to kadake to ralámbiꞌ i karapáresáꞌkuꞌ i lindoꞌraꞌ Topepáresáꞌ Mahile i Ierusale. 21Bateꞌna peá laluitangkuꞌ deꞌe to rasalaꞌiáꞌaꞌ, tempóna kuꞌuliꞌ kupasimbuku i lindoꞌraꞌ, ‘Kódóꞌ deꞌe rapáresáꞌaꞌ dehangaloá, láwiꞌ kupoinálái tauna to mate bateꞌna ina rapatueꞌ huleꞌ.’ ”
22Mágáuꞌ Peliꞌ moisá ntepuꞌu apa to rapoinálái toSarani kana i rárá katehómpóꞌ, onoꞌ miꞌi haneꞌi nauliꞌ, “Hangka ieneꞌ miꞌi sieruꞌ pehoda-hodantaꞌ. Kara-kara deꞌe kubutusi rái ane haweꞌ miꞌi kapalaꞌ tadulako surudadoꞌ Lisia.” 23Roo onoꞌ, napohawaꞌá miꞌi tadulako surudadoꞌ mokámpái Paulu, agáiáná ia peisá mani molulumao i lalu tarungku, hai rángána rapaliuheꞌ mampoweꞌi apa to naparaluu.
Paulu i lindoꞌraꞌ Peliꞌ hai Dusila
24Bahangapa alona hangko ionoꞌ, haweꞌ wopiꞌi Mágáuꞌ Peliꞌ hai toinána to rahangaꞌ Dusila. Dusila iti toIahudiꞌ. Napehuoꞌá miꞌi Peliꞌ bona surudadoꞌna moánti Paulu i lindoꞌraꞌ, bona mampehádingiheꞌ Paulu molaluita mokana i pepoináláina i Kerisitu Iesu. 25Paulu mampolaluita i Peliꞌ noumbá rárána tauna hangaa-ngaa manótó laluraꞌ, hai hangaa-ngaa momeeꞌheꞌ peundeꞌána laluraꞌ, láwiꞌ ina haweꞌ Alo Pehukuna Pueꞌ Ala. Kanahádina Peliꞌ laluitana Paulu iti, malááꞌ miꞌi, haneꞌi nauliꞌ, “Gáná miꞌi sieruꞌ! Peisákoꞌ mesuleꞌ! Ina kukióꞌramokoꞌ ane ara logángkuꞌ.” 26Katoꞌuána, nahárungá Peliꞌ kaꞌina napoweꞌina Paulu dóiꞌ sogoꞌ bona rakábáhá. Onoꞌ miꞌi haneꞌi Paulu paka nakióꞌ bona peisáheꞌ molaluita.
27Liu miꞌi rompare, Mágáuꞌ Peliꞌ napaháwángi miꞌi Pekiu Petusi. Ánti kanapoinaona Peliꞌ moala laluraꞌ toIahudiꞌ, onoꞌ miꞌi haneꞌi Paulu napatodáhi peá ratarungku.#24:27 Katoꞌuána, Paulu kehangaa-ngaa rakábáhá láwiꞌ liu miꞌi rompare, hai kárá-kárána tiꞌara mani rabutusi.
Currently Selected:
Surona Pueꞌ Iesu 24: NTBEP
Highlight
Share
Compare
Copy
Want to have your highlights saved across all your devices? Sign up or sign in
Bahasa Behoa Shorter Bible © Indonesian Bible Society, 2015.
