Surona Pueꞌ Iesu 14

Paulu hai Baranaba i kótá Ikoniu

1Apa to mewaliꞌ i kótá Antiokia, mewaliꞌ wopiꞌi i kótá Ikoniu.#14:1 Kótá Ikoniu ara i Turki deꞌe-deꞌe. Paulu hai Baranaba lao i támbi penómbáꞌáraꞌ toIahudiꞌ hai mopahaweꞌheꞌ Ngkóráꞌ Marasa i tauna to hirámpu ionoꞌ, álána handaꞌheꞌ toIahudiꞌ hai tauna to tiꞌara toIahudiꞌ mepoinálái i Iesu. 2Agáiáná toIahudiꞌ to tiꞌara mepoinálái, mopamaꞌamuꞌheꞌ laluraꞌ handaꞌ tauna to tiꞌara toIahudiꞌ, bona mokáhihiꞌheꞌ tauna to mepoinálái i Pueꞌ Iesu. 3Marue ntepuꞌuheꞌ Paulu hai Baranaba toroꞌ i kótá iti. Tiꞌaraheꞌ malááꞌ mopahaweꞌ bámbári kana i Pueꞌ, hai Pueꞌ moweꞌiheꞌ kuasaꞌ mobábehi tandaꞌ kuasaꞌ to metingkáráki bona tongawaꞌ i upu-upu tauna katoꞌuna Ngkóráꞌ Marasa to rapahaweꞌ. Ngkóráꞌ Marasa iti mokana i kabulána laluna Pueꞌ Ala to moweꞌi katehómpóꞌ i tauna.

4Agáiáná tauna to toroꞌ i kótá iti, tiꞌaraheꞌ hampepekiri. Araheꞌ to tándáꞌ i toIahudiꞌ, hai araheꞌ woꞌo to tándáꞌ i surona Pueꞌ Iesu to rodua iti. 5Kahópóꞌána toIahudiꞌ hai tadulakoraꞌ, hai tauna to tiꞌara toIahudiꞌ, moliwoheꞌ bona Paulu hai Baranaba rapopeahiahiꞌ hai rawatui. 6Agáiáná i karaisána Paulu hai Baranaba tunggáiáraꞌ iti, melangkaheꞌ lao i kótá Lisitera hai Debe i roboꞌ Likaonia hai kótá-kótá ntániꞌna to hungkuꞌ ionoꞌ. 7Ionoꞌ mopahaweꞌheꞌ woꞌo Ngkóráꞌ Marasa.

Paulu rawatui i kótá Lisitera

8I kótá Lisitera, ara hadua tobaleilo to paluꞌ hangko i karapoánákana. Ia mehoda peá oaꞌ, tiꞌara nabuku molumao láwiꞌ tiꞌara maróhó bitina. 9Topaluꞌ iti mehoda hai mampehádingi polaluitana Paulu. Paulu motótói topaluꞌ iti, hai napailalu kamaróhóna pepoináláina, mewaliꞌ naisá kapeisána rapakauriꞌ. 10Onoꞌ miꞌi haneꞌi nauliꞌ Paulu napasimbuku i hia, “Meángkáꞌmokoꞌ!” To paluꞌ iti meángkáꞌ ngkásárá haneꞌi liliu molumao.

11Karaitána tauna to handaꞌ tandaꞌ kuasaꞌ to nabábehi Paulu, molaluitamoheꞌ i lalu básáraꞌ, básá Likaonia, rauliꞌ, “Mendáulumoheꞌ ánitu mai i duniáꞌ, nodoheꞌ lenggeꞌ tauna!” 12Baranaba rahangaꞌ Seu, {hangaꞌna datu ánituraꞌ}, hai Paulu rahangaꞌ Heme, {hangaꞌna ánituraꞌ to moánti tewái}, láwiꞌ Paulu to biásá molaluita. 13I rawa kótá iti, ara támbi penómbáꞌá i ánitu Seu. Tadulako menómbá ionoꞌ moánti bahangapa báꞌána gapiꞌ laki hai bungaꞌ lao i babaꞌá bente kótá, hai handaꞌ ntepuꞌu tauna to meuláꞌ. Tunggáiáraꞌ mosambale gapiꞌ iti, ina rapenómbá i Paulu hai Baranaba.

14Agáiáná i karaisána suro iti, ia miꞌi Paulu hai Baranaba, apa tunggáiáraꞌ tauna to handaꞌ, mohepaꞌ-hepaꞌmoheꞌ waruꞌraꞌ {tandaꞌ katiꞌárána rapokana tunggáiáraꞌ iti}, hai melangkaheꞌ lao i tangaꞌraꞌ tauna to handaꞌ, mongangaheꞌ rapasimbuku, rauliꞌ, 15“Apa riꞌi to nibábehi? Kaiꞌ deꞌe, tauna biásá peangkaiꞌ nodo woꞌo kómu. Maiangkaiꞌ moánti Ngkóráꞌ Marasa i kómu, bona nikábáhá penómbámi i ánitu to tiꞌara mobunduꞌ hai menómbá pekou i Pueꞌ Ala to tueꞌ, láwiꞌ Ia miꞌi to mampopewaliꞌ langiꞌ, duniáꞌ, tahiꞌ hai upu-upu óntóꞌna. 16Hangkoia Pueꞌ Ala mopaliu tauna menómbá mouláꞌ peá peundeꞌáraꞌ haduduáraꞌ. 17Agáiáná Napoweꞌikeꞌ oaꞌ tandaꞌ to mopakanótóákeꞌ kaheánáNa. Ia mobábehiákeꞌ apa to maroꞌa: rápáꞌna, Naweꞌikeꞌ udá hangko i langiꞌ, Napopowuaꞌ tudaꞌ-tudaꞌtaꞌ i tempóna, Naweꞌikeꞌ pandeꞌ, hai Naweꞌikeꞌ woꞌo kagóeꞌ lalu.”

18Agáiáná kehapiꞌ noꞌonoꞌ polaluitaraꞌ Paulu hai Baranaba i tauna to handaꞌ, maꞌángkárá mani mokóntóheꞌ bona tiꞌaraheꞌ moánti popenómbáraꞌ i hira.

19Tiꞌara marue hangko ionoꞌ, bahangapaheꞌ toIahudiꞌ hangko i kótá Antiokia hai Ikoniu haweꞌ i kótá Lisitera. ToIahudiꞌheꞌ iti mopamaꞌamuꞌ laluraꞌ tauna to handaꞌ i Lisitera bona laoheꞌ mowatui Paulu. Karoona rawatui, wátána radiiꞌ soso lao i rawa kótá hai rapálehi ionoꞌ, láwiꞌ rauliꞌ ripaꞌi mate miꞌi. 20Agáiáná tangaꞌraꞌ toSarani i Lisitera meángkáꞌ motolelingi, mearó miꞌi Paulu, hai liliu mesuaꞌ i lalu kótá. Kahalona, pohuꞌmoheꞌ Paulu hai Baranaba lao i kótá Debe.

Paulu hai Baranaba mesuleꞌ lao i Antiokia i tampoꞌ Siria

21I kótá Debe, Paulu hai Baranaba mopahaweꞌheꞌ woꞌo Ngkóráꞌ Marasa, álána handaꞌ tauna mepoinálái i Iesu. Roo onoꞌ, mesuleꞌheꞌ lao i kótá Lisitera hai Ikoniu, haneꞌi liliuheꞌ lao i kótá Antiokia i roboꞌ Pisidia. 22I upu-upu kótá to rapoliui, Paulu hai Baranaba mopakaróhó laluraꞌ tauna to mepoinálái i Iesu hai mopaturoꞌheꞌ bona maróhó oaꞌ pepoináláiraꞌ. Rahángáꞌáheꞌ, “Kitaꞌ hangaa-ngaa molámbiꞌkeꞌ handaꞌ pákáꞌna kapári hangko tiꞌara manikeꞌ mesuaꞌ i popárentána Pueꞌ Ala.” 23I polumaoáraꞌ iti i upu-upu jemaꞌa, Paulu hai Baranaba mampileꞌi tauna to mewaliꞌ pinátuá. Mopuasaꞌ hai mekakaeheꞌ, membiáꞌ bona Pueꞌ mokádipuráheꞌ láwiꞌ Ia pentóáꞌána pepoináláiraꞌ.

24Roo onoꞌ, Paulu hai Baranaba mopaliliuheꞌ polumaoraꞌ moliu roboꞌ Pisidia haweꞌ i poropensi Pampilia. 25Hangko ionoꞌ, moántiheꞌ ngkóráꞌna Pueꞌ Ala i kótá Pega, hai mendáuluheꞌ lao i wiwi tahiꞌ haweꞌ i kótá Atalia.

26Hangko i kótá Atalia iti, mengkaheꞌheꞌ i duanga tahiꞌ haneꞌiheꞌ mesuleꞌ lao i kótá Antiokia i tampoꞌ Siria. Kótá Antiokia iti ia miꞌi kótá pantepuꞌuána polumaoraꞌ moánti Ngkóráꞌ Marasa. Iaꞌo, kaꞌina pohuꞌraꞌ hangko i Antiokia iti, toSarani ionoꞌ mampekakaeáheꞌ hai membiáꞌ bona nakámpáiheꞌ Pueꞌ Ala hangko i kabulána laluNa i pampopolumaoraꞌ bágóꞌraꞌ.#14:26 Básá Suro 13:3. Hai roo mpuꞌu miꞌi bágóꞌraꞌ iti. 27Mewaliꞌ i kahaweꞌraꞌ huleꞌ i Antiokia, Paulu hai Baranaba morámpuheꞌ upu-upu tauna to mepoinálái i Pueꞌ Iesu, hai mampodaritaheꞌ apa to nabábehi Pueꞌ Ala i lalu polumaoáraꞌ. Rapodarita woꞌo noumbá Pueꞌ Ala mampobungkáhiáheꞌ rárá bona tauna to tiꞌara toIahudiꞌ mepoináláiheꞌ woꞌo i Iesu. 28Roo onoꞌ, Paulu hai Baranaba marueheꞌ toroꞌ i kótá Antiokia iti hingkakani hai tauna to mepoinálái.

Currently Selected:

Surona Pueꞌ Iesu 14: NTBEP

Highlight

Copy