Salmos 80
80
1Ruzë́ naguʼ netuʼ, Dios, Nu rapa chiʼi bönachi Israel.
Nacuʼ Nu ruyú yuguʼ zxíʼini xiʼsóëʼ José ca nu ruyú yuguʼ böʼcuʼ zxilaʼ.
Buzeníʼ queë́tuʼ, Liʼ naʼ röʼu rinná bëʼu ga nacuáʼ
nupa nál-lágacatërö quiuʼ lë́gaca querubín.
2Buluíʼi yöl-laʼ huáca quiuʼ lógaca zxíʼini xiʼsóagaquiëʼ Efraín, en Benjamín, en Manasés.
Gudá queë́tuʼ, en busölá netuʼ.
3Ben ga huécjatuʼ quiuʼ Liʼ, Dios.
Buluíʼi netuʼ nadxíʼinuʼ netuʼ, ateʼ ulatuʼ.
4Xantuʼ Dios quéguequi niʼa noʼo guizxi yu,
¿gácaʼxte caz ilenuʼ netuʼ, en bitiʼ yönnuʼ le rulidztuʼ Liʼ?
5Rugaguʼ netuʼ nisa ribödxi queë́tuʼ,
en ruguiʼjuʼ netuʼ sizxöni nisa ribödxi.
6Nunuʼ ga bönachi dzaga yödzö queë́tuʼ tuʼzxidxi queë́tuʼ,
ateʼ nupa bitiʼ taʼléʼe netuʼ dxiʼa tuʼtitaj netuʼ.
7Ben ga huécjatuʼ quiuʼ Liʼ, Dios quégaca niʼa noʼo guizxi yu.
Buluíʼi netuʼ nadxíʼinuʼ netuʼ, ateʼ ulatuʼ.
8Guléajuʼ tu lubá uva le nácatuʼ netuʼ luyú Egipto.
Bulaguʼ bönachi izáʼa yuguʼ lu yödzö luyú ni, en budóʼo lubá naʼ ni.
9Buchiʼu lataj ga guzxö́n lubá naʼ.
Benuʼ ga ben luí ga rëʼ, ateʼ bulí idútë luyú ni.
10Gulúʼu zxul-la lubá naʼ yúguʼtë lu guíʼadoʼ,
ateʼ niʼa nëʼe gulaʼbagaʼ yuguʼ guíʼa zxön.
11Gulaʼtunna niʼa nëʼe ga bidxintë raʼ nísadoʼ,
encaʼ ga bidxintë raʼ yegu Eufrates.
12¿Bizx que buquínnajuʼ yuguʼ lëʼaj gulún chiʼi lubá naʼ,
en ruʼu lataj nupa taʼdö́disö taʼbán le ribía lubá uva naʼ?
13Tuʼlíbigacabaʼ cuchi guixiʼ le,
ateʼ tágubaʼ böaʼ guixiʼ le.
14Buécja queë́tuʼ, Dios quégaca niʼa noʼo guizxi yu.
Ga niʼ zuʼ yehuaʼ yubá buyú ca raca que lubá quiuʼ, en busölá netuʼ.
15Gudá dusölóʼ lubá ni budáʼ cazuʼ,
le naca ca tu lubá huë́ʼëni buxö́n cazuʼ Liʼ.
16Nupa bitiʼ taʼléʼe netuʼ dxiʼa gulaʼchugu niʼa nëʼe lubá naʼ, en buluʼquelaʼ le guíʼ.
Buyú ca tun, en lu yöl-laʼ rilé quiuʼ busuniti léguequi.
17Gúcalen bönniʼ naʼ gurö́ cazuʼ quiuʼ,
netuʼ, bönachi naʼ nuzóa cazuʼ tsaz quiuʼ.
18Caní gaca, bítiʼrö ucáʼanatuʼ Liʼ.
Bunna queë́tuʼ yöl-laʼ naʼbán, ateʼ uzxöni ládxiʼtuʼ Loʼ.
19Ben ga huécjatuʼ quiuʼ Liʼ, Dios quégaca niʼa noʼo guizxi yu.
Buluíʼi netuʼ nadxíʼinuʼ netuʼ, ateʼ ulatuʼ.
Currently Selected:
Salmos 80: zar
Highlight
Copy
Compare
Share
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
