Pangngitanna Yohanes 18
18
Bohto Mahoa' Babel ditallangngi
1Puhanna yatoo, ungngita bumä' mesa malaeka' senga' tuhung yaho mai di suruka. Aha kakuasaang käyyäng di kalaena lambi' lino mendahi mabaya si'da-si'da napobua' kamatandeanna. 2Mekoha napekäyyängngi naoatee,
”Sitale-taleng! Bohto käyyäng Babel sitaleng!
Dinoa mendahing ongeanna setang anna inaha karake.
Naongei tuho sedansiang ang si ungngande bahke,
sedansiang ang nakahi'di' hupatau. #18:2 Yes 13:21; 21:9; Yer 50:39, 51:8
3Aka' tau di ingkänna bohto puha asammi umbabe katasampa'anna Bohto Babel.
Pampemalanna mepamalango sinnoa tau ang ungngenu' maho angkoro'.
Setomarayaang di lino membabe tasampa' sibaha
anna setopa'buleleang di lino mendahi to makaka napobua' yato pampemalanna ang liba' maho.” #18:3 Yes 23:17; Yer 51:7
4Mane unghingngiä' kamaha senga' yaho di suruka naoatee,
”Oa' petauangku, sohongkoa' yaling mai! Laokoa' pelleii!
Daumponialaii pembabena andana nahoa toukoa' dio kamasuhsaang tamahamu' sinnoa ang nasa'ding! #18:4 Yes 48:20; Yer 50:8, 51:6, 45
5Aka' dosannaii ma'toro'-toro'mi lambi' dai' di langi' tandana mai'di,
anna nainsammi Puang Alataala pembabe karakenaii. #18:5 Kej 18:20-21; Yer 51:9
6Babe toinne' sinnoa ang puha nababe.
Bala'ine' pendoang luhpi' samai ang puha nababe.
Pangngihsiing ang masahhu' enu'anna,
pendoang luhpi' kamasahhu'anna yato ang puha napatokaing tau senga' naenu'. #18:6 Mzm 137:8; Yer 50:29
7Padahiing kamadahhaang sibaha kamasuhsaang
ang sinsamaang mai'dinna kamatandeang anna kasuki'ang ang napaaha toboe'.
Aka' si naoate didiona kalaena, ‘Kodi' inde tomaraya bahine ang ma'pahenta.
Tadiaä' balu bahine; dä' la ungngolai kamasuhsaang!’
8Dianto suhunna anna la sangngalloi supu napihsangngi nahoa inde kamadahhaang,
dianto kamasuhsaang, kabuhohangang anna kamateang.
Kalaena la naämpu'i api,
aka' ang la mampahehsa dianto Puang Alataala ang ma'kuasa.” #18:7-8 Yes 47:7-9
9Setomarayaang di lino umbabe katasampa'ang sibaha anna tuho taumpuha aka-akanna. Dinoa la sika ungngumbuing yato bohto mahoa' ke ungngitang hambu mapulu' ang mengkalao yato di api ang mangngämpu'i. 10La sika nakahaoi aka' mahea' nahoa kamadahhaanna. Sika naoatee,
”Bendo' bulangngete' indo bohto ang kainsangang, Bohto Mahoa' Babel ang matoho.
Pake yaling supu di mesa tehte' anna tallang tubung nei'!”
11Setopa'buleleang di lino mumbu asang toe' anna ma'tomate napobua' yato bahine, aka' dang aha ang la mangngalli balu'naii. #18:11 Yeh 27:31,36 12Dang aha mangngalli ang nabalu' noanna: bulahang, pera', belo-belo masuli' ang malehke' noanna mutiara; noa toi kaing balatung, kaing malahtu, kaing pahuhellu', anna kaing malea; ma'kahupa-hupa kayu ang dai sadilambi'na, kayu bomammi' ang masuli', ma'kahupa-hupa ang toha masuli' dipapia, ma'kahupa-hupa ang tembaga anna bahsi ditampa anna batu pahuhellu' ang mabusa hupanna; 13koli'na kayu bomammi', rampa-rampa, lohpo-lohpo bomammi' noanna mur anna kemenyang, angkoro', minnä', tahpung mainnä' anna gandum, saping, domba, arahang, bendi, sabua' anna to disahka.
14Ingkänna to pa'balu' ungngoainte yato bahine, ”Samai ang umpemala ungngala dante' aha, anna ingkänna ang keangka' anna ang maleke pa'da asammi di kalaemu anna dang aha la dilambi' salake'.” 15Ingkänna to pa'balu' ang suki'mi, aka' ma'balu' yato di bohto mahoa', la le'ba' makahao aka' sika mahea' nahoa kamadahhaanna. Sika mangngumbui, 16laona siang ma'kara naoatee,
”Bendo' bulangngete'
katallanganna indo bohto mahoa' ang kainsangang!
Si mekaya' palansinang, kaing malahtu anna malea.
Si napunnoi belo-belo bulahang ang kebelo masuli' anna malehke' noanna mutiara.
17Ampo' yaling supu di mesa tehte' anna pihsa' pa'dang katomakakaanna.”
Ingkänna to pampalao kahpala' le'bo' sibaha to pa'bulele anna samai tau ang aha yaling mangkahaoi asang. #18:17 Yes 23:14; Yeh 27:26-30 18Tahpana ungngita hambu mapulu' sohong di hoi' mai di api ang ungngämpu'i yato bohto mahoa', sika kohang naoatee, ”Daete' aha bohto mahoa' senga' ang nasinnoaing indo bohto.” 19Tahpa sika umpensahu'ming bunging dai' di bää'na anna sika mangngumbuii laona siang naoatee,
”Bendo' bulangngete' indo bohto ang kainsangang!
Kasuki'anna tapotomakakangnga' samaingkea' ang kekahpala' le'bo'!
Pake yaling supu di mesa tehte' anna tallang tubung nei'!” #18:19 Yeh 27:30-34
20O ingkänna ang aha di suruka, penau-naukoa' ungngita indo bohto mahoa'!
Oa' ingkänna petauanna Puang Alataala, rasul anna nabi penau-naukoa'
aka' natallangnging Puang Alataala bala'na yato ang puha nababeingkoa'! #18:20 Ul 32:43; Yer 51:48
21Puhanna yatoo, ahang mesa malaeka' ang matoho ungngängkä' mesa batu käyyäng liu mane napensaleba'ing tama di le'bo' anna naoaitee,
”Dipanoanto inde dipentibeing Bohto Mahoa' Babel ang kainsangang
anna malai dang aha diita, pa'da liung. #18:21 Yer 51:63-4; Yeh 26:21
22Dang aha la kahingngiang yaling oninna to pokatapi sibaha to penani,
to posuling anna ang umponi terompe'!
Datung aha dilambi' to manähäng kababe-babe
anna datoi aha kahingngiang kilingang pahe. #18:22 Yes 24:8; Yeh 26:13; Yer 25:10
23Dang aha la diita pansillo'na lampu yaling,
anna datung aha kahingngiang pa'rame-rameanna to kabeng.
To pa'bulelemu dianto ang handang keangka' di lino,
anna to pa'ihsammuntoo umpasähsä' lalang ingkänna bohto di lino! #18:23 Yer 7:34; 25:10
24Bohto Babel ditallangngi aka' mai'ding yaling haha titähhä',
dianto hahana nabinna Puang Alataala,
hahana petauanna,
poko'na hahana ingkänna tau ang dipatei di lino.” #18:24 Yer 51:49
Currently Selected:
Pangngitanna Yohanes 18: ATQ
Highlight
Copy
Compare
Share
Want to have your highlights saved across all your devices? Sign up or sign in
LAI 2004
