ROMA 2
2
Allah, owe takes adosa, atakam asakamtiitem
1Tare owe dosa atakam asakamtiimakam owee! Tare owe adosa atakam asakamtiitakam, tare, “Dere dosa apok,” emes atakam baemekoreteter asan apok. Tare owe adosa atakam asakamtiitakam, me, emes dosaam aemtakam, ere, tare tadosa atakam asakamtiimakam. 2Allah, emes pak baem owe, adosa atakam asakamtiito, Are atakamnak akoretem. Dare emes apormarom. 3Tare ere, owe adosa atakam asakamtiimakam, emes dosaam aememakam. Me tabimak binip ere, “Allah, dare dosa atakam basakamtii apok aemtemaro.” Tare emes bimak binip apaye? 4Allah owe soro Ipit. Are owe bajurusum fef apok Ipit. Are jak jirao Ipit. Emes apormakam ere, tare Armat Ipit bifane apaye? Allah ere, tare dosa bamekemteter akot ajim. Erarawa Are soro tara ajiomeman. Emes tamsam apokane? 5Asep bare ere, Allah, dosa jak ambap aememtem. Are, owe adosa, atakamnak asakamtiitem. Era pak aemto bare, Armat Ipit bajurusum daytinak tara aemteman— tare jane sake aporman are. Tanom dosa bamakem pota aporman are. 6Allah, ere, owe takes aemaaris pak biti ajitem. 7Wan owe, akot pak aemaaremas. Era owe, Allah, are owe akot atakam bakore, akot ajiemas. Are, Allah ara basitim, akot ajiemas. Are Allah jiinenak baememaar pak, ara batetam, akot ajiemas. Allah, ere, era jiinenak baememaar pak era owe atetamtem. 8Wan owe ere, apak bimak binip taka ajanimomemas. Are era akot pak awotapemosomemas, wanam era pota pak ajamkaimas. Emesare, Allah jak ambap aptam, era owe ajurusumtem. 9Era jaos pak baem owe ajirisemtemas. Are damo asesa aemaptemas. Me Yahudi owe era pak bonak aemtemas. Me Yahudi apok oweam era pak aemtemas. 10Allah ere, era akot pak baem owe takes, atemtemtem. Are era owe asitimtem. Are ji baem jakam era owe atetamtem. Are era pak Yahudi owe bonak aemtem. Are era pak Yahudi apok oweam aemtem. 11Allah, owe takes awar aporem.
12Me wan owe ere, Musa Basakamtam Atakam baemomem apok. Era owe dosa aememas, wanam danais aemaptemas. Emesare, are era Basakamtam Atakam baemomem apok. Me wan owe ere, era Basakamtam Atakam aemomememas. Era owe dosa aememas, wanam Allah, era owe dosa, era Basakamtam Atakam jipu, atakam asakamtiitem. 13Allah, abasakamtam atakam jane bambi bajie owe, turu owe atakam basakamtii apok. Me, Are abasakamtam atakam ji bae owe, turu owe atakam asakamtiitem. 14Yahudi apok owe, Musa Basakamtam Atakam baemomem apok. Me, are era Basakamtam Atakam jipu pak baem bimak binip amba atetaramemas apaye, are era akot pakam, era pota pakam, baem amsam, emes aporomemas. 15Era owe aememas pak era basakamtam atakam ajak bomon asinta, emes aporomemas. Wan bare era owe bimak binip ere, “Era aemey pak akot,” emes bimak binip atetaramtetermas. Wan barerawa, “Era aemey pak pota,” emes bimak binip atetaramtetermas. Erarawa era owe jak bomonam, “Era basakamtam atakam era owe jak bomon asinta,” emes aporomemtetermas. 16Me Allah, asamot owe tiruu bimak binip atetaramemas pak, dosa apaye atakam asakamtiitem. Ere emes atakam asakamtiito bare, emes taka aemtem. Emesare, Allah Kristus Yesus, emes atakam basakamtii aeremtaere. Era akoremin Akot Atakamam, emes atakam are.
Yahudi owe Musa Basakamtam Atakam aooes atakam
17Tare ere, wama tamenem? “Dare Yahudi owe. Dare Musa Basakamtam Atakam ban ten are. Allah das,” emes atakam aesimemakam. Tare tamba aemetemtememakam. 18Emesare, tare Allah akot apormar pak tamsam. Tanom era Basakamtam Atakam pak aemekem. Erarawa tare era akot pak baeremtaer tamsam. 19Tanom emes bimak binip atetaramemakam: “Dare banamek kapie owe ban bakimomat owe emes tamen are. Dare era bimak binip jiiti owe bimak binip baso batetam owe darare. 20Dare era janda owe baemapom owe darare. Dare era baememtam apok owe baememtam owe darare. Dare Musa Basakamtam Atakam aemomemmarom. Erarawa dare atakam takes damsam. Era akoremarom atakam, ere anakotnak.” Emes bimak binip atetaramemakam. 21Tare owe aememtamemakam. Tare ere, tamba tapeemememakam? Tanom akoretamemakam, “Wosom bas,” emes atakam aesimemakam. Tare ere, wosom ape? 22Tare atakam akoremakam, “Tani tamane bajamdamat bas.” Emes atakam aesimemakam. Tare ere, emes baem ape? Tare eto bifane afeomemakam. Tare ere, era eto tame pak wosom ape? 23Tare atakam akoremakam, “Dare Musa Basakamtam Atakam aemomemmarom,” emes atakam aesimemakam. Tare ere, era Basakamtam Atakam aooemakam. Erarawa, owe Allah pota atakam akoremas. 24Alkitabam, “Era aememakam pak pota. Erarawa era Yahudi apok saman, Allah pota atakam akoremas.” Emes atakam akorem.
25Tare Musa Basakamtam Atakam ji aeemakam apaye, era Yahudi owe pak tai tamane pitini asakamosomekem, ere akot. Tare ere, Musa Basakamtam Atakam aooemakam apaye, era tamane pitini asakamosomekem ere, bambi taka. 26Era Yahudi owe pak tai tamane pitini basakamosom apok owe ere, Musa Basakamtam Atakam ji aetas, Allah, era owe, tamane pitini basakamosom tair owe tamen aportem. 27Me tare Yahudi owe, Musa Basakamtam Atakam Buku aemomemmakam. Tanom Yahudi owe pak tai tamane pitini basakamosom tair. Tare ere, Musa Basakamtam Atakam aooemakam. Era Yahudi owe pak tai tamane pitini basakamosom apok owe ere, Musa Basakamtam Atakam ji aetas 28Emesare, Yahudi anakot owe, Yahudi owe tamen baemem apok. Era tamane pitini basakamosom anakot, damo pitini basakamosom pak apok. 29Era Yahudi anakot owe ere, jak bomon Yahudi owe. Are jak bomon basakamosom owe. Emesare, Allah Jip, owe, Yahudi owe anakot aemapomum. Era Musa Basakamtam Atakam Buku ere, owe, Yahudi owe anakot baemeemapom asan apok. Allah era Yahudi owe anakot asitimum. Asamot owe ere, era owe basitim apok aememas.
Currently Selected:
ROMA 2: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
