ROMA 16
16
Selamat atakam
1Me Febe, dajoo taot. Are era kota Kengkrea Yesus basitim bajarisiap owe, karai aetamum. Era taot, ere akot. 2Are Tuhan ataot. Erarawa armat taot bataeray— dare Yesus bamesem owe, owe bataer emes awara. Armat taot ere, pi owe tanane ajate. Anom pi dera ajaten. Emesare, are pak apok aemapto, pak afaafetamay.
3Tare selamat atakam Priska anama Akwila, baesimtamay. Araye deraye Kristus Yesus karai takan aetamemarom. 4Are, dera bajortaer, asan pota aemapes. Emesare, dere terima kasih atakam era owe akorommin. Me, de taka apok. Era Yahudi apok Yesus basitim bajarisiap owe takesam terima kasih atakam era owe akorommas. 5Tanom selamat atakam Priska anama Akwila tame Yesus basitim bajarisiap owe baesimtamay. Emesare, Epenetus dejoo ipit. Dere era ipit afaimmin. Are Asia tapirmi owe damon, Kristus bonak ajamkaie ipit arare. Tanom selamat atakam armat ipit baesimtamay. 6Tanom selamat atakam Maria baesimtamay. Armat taot karai fiak tara aetamen. 7Tanom selamat atakam Andronikus anama Yunias, baesimtamay. Are desaman owe. Are buji tame bomon takan aemapom owe arare. Era Yesus atakam bakoretam bamirimemom owe, era owe amsamnak. Are Kristus bonak ajamkaies. Derarawa asep ajamkaio.
8Tanom selamat atakam Ampliatus baesimtamay. Armat ipit Tuhan bajamkai ipit. Erarawa dere armat ipit afaimmin. 9Tanom selamat atakam Urbanus baesimtamay. Armat ipit, dare Kristus karai takan aetamemarom. Tanom selamat atakam Stakis baesimtamay. Denom armat ipit afaimmin. 10Tanom selamat atakam Apeles baesimtamay. Armat Ipit Kristus bajamkainak aporom. Tanom selamat atakam Aristobulus atame owe baesimtamay. 11Tanom selamat atakam Herodion baesimtamay. Armat ipit desaman ipit. Tanom selamat atakam Narkisus tame Kristus ajamkaimas owe baesimtamay.
12Tanom selamat atakam Trifena anama Trifosa baesimtamay. Are Tuhan karai aetamemas owe arare. Tanom selamat atakam Persis baesimtamay. Dere armat taot afaimmin. Are Tuhan karai fiak aetame. 13Tanom selamat atakam Rufus baesimtamay. Armat ipit Tuhan karai akotnak aetamum. Tanom selamat atakam arsoot baesimtamay. Are dersoot tamen. 14Tanom selamat atakam Asinkritusam, Flegonam, Hermesam, Patrobasam, Hermasam, era owe takan aemapmas Yesus bajamkai oweam, baesimtamay. 15Tanom selamat atakam Filologusam, Juliaam, Nereusam, Nereus arpitam. Olimpasam, era owe takan aemapmas owe turuam, baesimtamay.
16Tanom tarmamon batir ajamjipiramay. Era asan takes Yesus basitim bajarisiap owe selamat atakam tara akoromman.
Wan ataane baowe atakam
17Dejoo owe akotnak! Dere ataane fiak tara aoweommin. Tare era apapantaamas owe turuar. Era owe, wan owe Kristus bajamkai akoromporemas. Are aememaarukum atakam aoomas. Tare era owe beaksos asotamay. 18Era owe, Kristus daTuhan, karai baetam apok. Are ajak basenomem pak jipu karai aeemas. Era owe atakam afaimemas. Are era owe, owe akot, emes atakam akoromemas. Ere, bwea atakam taka. Me are era pota pak amsam apok owe, pote atakam akoromemas. 19Owe takes, tare Allah Akot Atakam ji aemakam pak, jane etejies. Emesare, tare dejak akot aememommankum. Dere tare era akot pak baporkorom, akot ajimin. Tanom era dosa pak basamo bata apok, emes, akot ajimin. 20Allah ere, dare ji baem jak batetam Ipit. Armat Ipit, Bii Kapar Ipit, tabai bomon danais fef aemtiitamteman. Me daTuhan Yesus, asan akot, tara batetamtan.
21Timotius dere karai takan bae ipit. Armat ipit selamat atakam tara akoromman. Lukiusam, Yasonam, Sosipateram, desaman owe. Are selamat atakam tara akoromman.
22Emesare, dere Tertius. Dere, Paulus akoremar atakam, surat aeapomtammin. Denom tare Tuhan takan bajamkai ipit. Dere selamat atakam tara akorommin.
23Ara asan ere, dere Gayus tame ajamememo. Era asan Yesus basitim bajarisiap owe armat ipit tame bomon ajarisiapemas. Me armat ipitam selamat atakam tara akoromman. Ara kota pemerintah uang banamek batai ipit juas Erastus selamat atakam tara akoromman. Dare takan Yesus bajamkai ipit juas Kwartus selamat atakam tara akoromman.
24Me Yesus Kristus daTuhan, asan akot tare takes batetamtan. Ara atakam, ere atakamnak
Ara surat ajiire baemtii atakam
25Allah tere baeomaartas! Are Ara bajamkai fiak, emes jak tara batetam fiak pak aemommar. Era akoretammin Allah Akot Atakam, ere Yesus Kristus atakam are. Era atakam. Allah bomonnak atakam. Tarainak, owe era bomonnak atakam amsam apok. 26Waa ere, Allah era atakam baso aporomum. Oweam, Allah atakam bakoretam owe aeapomes atakam, jane ajies. Emesare, jiinenak aptam Allah, samane takes, era atakam jane bajie, atakam asakamtame. Ere, era owe takes Kristus eemnak bamesemkorom are. Anom owe takes, Allah atakam ji bae atakam. 27Allah, ere taka. Armat Ipitam bimak binip baso anakotnak Ipit. Dare Yesus Kristus aeme pak apormarom. Erarawa dare Allah tere daytinak baeomaar. Ara atakam, ere atakamnak.
Currently Selected:
ROMA 16: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
