ROMA 10
10
1Dejoo owe akotnak! Dere Yahudi owe bajorem, jak aseserommin. Dere emes atakam Allah ajanimmin. 2Era owe, karai Allah baetam, akot aeemas. Dere eteporo. Me, era karai baetam pak amsamnak apok. 3Are Allah turunak owe basakamtii atakamam, amsam apok. Are turunak owe amba baemem aempores. Erarawa are, Allah, turunak owe atakam basakamtii pak, awotapemes.
Jiinenak baememaar, ere owe takes aapak atakam
4Kristus ere, Musa aeapome Basakamtam Atakam, akarimtiie. Erarawa Allah Kristus eemnak ambesemkorommas owe takes, turunak owe, emes atakam asakamtiim. 5Owe era Basakamtam Atakam ji aetas, Allah era owe, turunak owe, emes atakam basakamtii apaye? Apok apaye? Emesare, Musa era pak buku aeapomen. “Era Basakamtam Atakam ji baekorom owe, jiinenak aememaartemas.” Emes atakam aeapomen. 6Alkitab ere, Allah Kristus eemnak ambesemkorommas owe, turunak owe, emes atakam basakamtii, ere, emes atakam akorem: “ ‘Era wonamo oup tao tametto?’ emes bimak binip batetaram bas.” Emes atakam akorem. (Emes bimak binip, Kristus ara aemansa tapirmipu batoomdae bimak binip.) 7Wanam: “ ‘Era dambir owe asan tao daeto?’ emes bimak binip batetaram bas.” Alkitab emes atakam akorem. (Emes bimak binip, Kristus bajaoromwasumtum bimak binip.) 8Me, Alkitabam: “Allah aatakam, ere wore setep aemansa. Wonom era atakam ir pitina. Wonom era atakam jak bomona.” Emes atakam akorem. Emes atakam, Kristus eemnak bamesemkorom akoretammarom atakam are. 9Wore atakamnak akoretem, “Yesus, ere Tuhan. Are owe baomep Ipit,” emes atakam aesimtem, wanam wore, Allah, Yesus ajaoromwasumtume, emes atakam eemnak aportem ere, Allah wora ajortaerteman. 10Emesare, owe Yesus eemnak ambesemkoromtas, Allah, era owe, turunak owe, emes atakam asakamtiitem. Wanam, Are emes atakamnak akoretas, Allah era owe ajortaertem. 11Me Alkitabam: “Armat Ipit eemnak ambesemkorommas owe takes, damke apok aememtemas.” Emes atakam akorem. 12Era Yahudi oweam, era Yunani oweam, ere awar. Ere takes aTuhan, takakor, Armat Ipit, era atakam Ara ajanimtas owe takes, asan akotnak atetamtem. 13Emesare, owe atakam Tuhan ajanimtas, Armat Ipit era owe ajortaertem.
14Me Armat Ipit bamesem apok owe ere, atakam Armat Ipit wama emejanimtas? Wanam, Armat Ipit atakam jane bajie apok owe, Armat Ipit wama emebesemtas? Wanam era atakam bakore owe apok emtas, are jane wama emejitas? 15Wanam, owe, atakam bakoretam owe bamirimemom apok aemtas, owe, Armat Ipit atakam wama emekoretas? Ere Alkitab atakam jipu: “Owe, Allah Akot Atakam atoomjinaotas, ere akotnak!” Emes atakam akorem.
Israel owe Tuhan eemnak bamesemkorom apok atakam
16Wan owe ere, Allah Akot Atakam, ji bae apok. Yesayaam: “Tuhan! Era akoremarom atakam, tao owe besemtas?” Emes atakam aesimen. 17Emesare, owe Kristus atakam akoretas, owe era atakam jane ajitemas. Wanam are Kristus eemnak ambesemkoromtemas. 18Dere ere, bajatepora. Era owe, era atakam jane bajie apok apaye? Emesare, jane emejies. Alkitabam:
“Owe, era atakam, era tapirmi owe takes etekoromes. Owe takes era atakam jane etejies.”
Emes atakam akorem. 19Denom bojatepora. Era Israel owe era atakam amsam apok ape? Are amsam. Me Musa, era ajatepormin atakam atep bonak ajiten. Are Allah atakam akoromen:
“Dere, deowenak apok ajortaertemin. Tararawa, itim akemtemakam. Dere janda owe ajortaertemin. Tararawa, jak ambap aememtemakam.”
Allah emes atakam aesimen. 20Yesayaam jak fiak aptam, atakam akoromen:
“Allaham: ‘Me Dera bandimarpor apok owe, ere ataermanis. Denom dera bajatepor apok owe bipu ajisomo.” ’
Emes atakam akorem. 21Armat ipit ere, Israel atakam akorome. “Allah emes atakam akorem. ‘Ju ajiraomar, Dere era owe bataer, ban ajiraomemin. Era owe ere, atakam baoo owe. Are jane apok owe.” ’ Emes atakam akorem.
Currently Selected:
ROMA 10: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
