BAPOROMTAM ATAKAM 22
22
Jiine baememaar ju bwi atakam
1Emesare, malaikat, ju aporomen. Era ju bwi iojafa emanameknak tamen. Oweam era bwi andetas, are jiine aememaartemas. Era ju, Allaham, Domba Jiiam, owe baomep fe baemap asan bomon aeekendae. 2Era ju bwi, era kota bokotpu waut ajirindae. Era ju pima jamnuk jiine baememaar pak wus aemememis. Era wus, tahun taka, eek, bare 12 apeomteptetera ajaiemis. Pir taka, eek, bare taka apeomtepa ajaiemis. Era wus enese tapirmiin tapirmiin damo pota owe baoromtaer pak are. 3Me Allah pota apore pak takes, ere era asan apok. Me Allaham, Domba Jiiam, owe baomep fe baemap asan, era asan aemaptem. Me Allah bambi karai baetam oweam Armat Ipit asitimtemas. 4Are Armat Ipit bi aportemas. Armat Ipit juas wao era owe bipisji aeaptem. 5Era asan eam boem apoknak are. Tuhan Allah asare taka, era owe asan asaramtiitem. Erarawa era asan, lampu apaye, jee apaye, basaramtii apoknak. Era oweam raja owe aememtemas. Are owe aoomeptemas.
6Emesare, malaikatam atakam dera akoromen. “Ara atakam, ere anakot. Are atakamnak. Me Tuhan Allah, atakam, aatakam bakoretam owe aoesimtame. Armat Ipitam abambi karai baetam owe, fef andaeto pak bapor, akoten. Erarawa are amalaikat, era pak, era owe baporomtam, ambirimemome.” Emes atakam aesime.
Yesus andaeto atakam
7Me Yesusam atakam akore. “Baporay! Dere fefnak andaetemin. Ara buku era andaeto pak atakam are. Ara buku atakam ji bae owe, ere asan akot aemapmas.” Emes atakam aesime.
8Emesare, dere Yohanes. Dere ara atakam takes jane ajio. Denom era pak takes aporo. Me era pak atakam jane ajio. Me era pak aporo. Derarawa, era pak aporomtamen malaikat bipu bi fop andaejiapo. 9Me malaikat ere, atakam dera aokoromen. “Wore emes bas! Allah atakam bakoretam owe, ere wojoo owe. Deraye woraye, Allah atakam bakoretam oweam, ara buku atakam ji bae oweam, Yesus karai takan aetammarom. Erarawa Allah taka asitimey.” Emes atakam aesime.
10Emesare, malaikat atakam dera aokoromen. “Ara buku atakam, ere ajinaoto pak are. Me era aamsekunato bare, ere setep. Erarawa wore ara buku atakam batukumtii bas. 11Era jaos owe, ajaos pak emes baememaartas. Era pota oweam, apota pak emes baememaartas. Era akot oweam, aakot pak emes baememaartas. Era turunak oweam, aturunak pak emes baememaartas.” Emes atakam aesime.
12Yesus arawa, atakam akore. “Baporay!” Dere fef andaetemin. Denom akot pak atoomdaetemin. Derarawa, owe era aemaaris pak jipu, taka taka biti ajietetertemin. 13Dere bonaknak aememo Ipit, Derare. Denom asepnak aememtey Ipit, Derare. Dere era bonaknak Ipit, Derare. Denom era asepnak Ipit, Derare.
14“Emesare, apakaian bwi aeosommas owe, asan akot aemapmas. Allah, era owe, era jiine wus eek banda, atetamtem. Are, era owe, era kota tiri jimsap bajii, atakam aesimtamtem. 15Me, era juuri tamen bafire oweam, era ta pak baem oweam, era asan pota pak baem oweam, era owe atemas oweam, era eto basitim oweam, era pote atakam jak baseseromem oweam, era pote atakam bakore oweam, ere era kota tasan aememtemas.
16Dere Yesus. Dere, demalaikat, era atakam tara bakoretam, ambirimemomo. Era atakam, Dera basitim ajarisiapmas owe jane bajie atakam are. Emesare, Dere Daut wurpis. Denom era asaramtiiemar jo baet tamen are.” Yesus emes atakam aesime.
17Emesare, Allah Jipam, era oorey ajuutto taotam, atakam akoremas, “De!” emes atakam aesimmas. Era jane ajimas oweam, “De!” emes atakam baesimtas. Era bwito owe bamaremtas. Era bwi banda jak aseseromemmas owe, era bwi bambi bandetas. Are era bwi andetas, jiine aememaartemas.
18Emesare, dere Yohanes. Ara buku atakam, ere ajinaoto pak are. Dere ara buku atakam jane bajie owe ataane aweommin. Owe, ara buku atakam aokaimtas, Allaham, era buku bomon asan potanak pak, era owe aokaimtem. Ere asan potanak pak era buku atakam jipu are. 19Wanam, owe ara asep aemto pak buku atakam poman apamosomtas, Allaham era owe ara buku akoretame apoman pak apamosomtem. Ere, owe jiinenak baememaar wus eekam, era dosa apok kota baamtaer pak are. 20Ara atakam takes akoremar Ipit, atakam akorem. “Emesare. Dere fef andaetemin.” Emes atakam aesimum. Emesare, ere atakamnak. Tuhan Yesus! Andaey!
21Tuhan Yesus, Allah aowe takes, asan akot baemomemtan.
Currently Selected:
BAPOROMTAM ATAKAM 22: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
