BAPOROMTAM ATAKAM 2
2
Efesus surat atakam
1Wonom emes atakam, surat aeapomey. Wanam ara surat, Efesus Yesus basitim ajarisiapmas owe amalaikat, ataejirimtamey: ‘Jipit taka, baet poman ban jamnuk, ere abo ban atoommar. Armat Ipitam emas pelita bataapom asan era waut atawejarem. Are ara atakam tara akoromman:
2“Era aemaarukum pak demsam. Era karai daytinak aeaarukum pakam demsam. Era jak fiak aememaarukum pakam demsam. Tanom, ara pota pak aememas owe, jak jirao baemem asan apok. Wan oweam, ‘Dare Kristus atakam bakoretam bamirimemom owe.’ Emes atakam aesimemas. Me, Kristus era owe atakam basakamtam tamenam apoknak. Tanom era owe aoorporekem, wanam are pote owe aporekem. 3Emesare, tare jak fiak aememaarukum. Tare Dera ajamkaiaarukum. Erarawa owe tara ajurusumaarin. Tanom bamompim apok aemaarukum. 4Me, tare pota pakam aememakam apormin. Bonaknak ere, tare daytu Dera afaimenkum. Waarawa, tare kope emes Dera afaimmankum. 5Me bonak akot aemekem pakam, era japen pota aoemekem pakam, bimak binip atetaramporay. Era pota pak ambakemay. Era bonak aemekem pak arawa, boemay. Era pota pak bamakem apok aemtakam, Dere tara ambaromemtemin. Denom tapelita bataapom asan atomastemin. 6Me, tare wan akot pak aememakam. Tare Nikolaus ajamkaimas owe aememas pak, bifane afeomemmakam. Denom era owe aememas pak bifane afeomemmin.
7Emesare, Allah Jip, ara atakam Yesus basitim ajarisiapmas owe, akoromum. Owe takes ara atakam jane bajitas.
Emesare, asan pota pak akumimosomtas owe, Allah akotnak asan, aemaptemas. Denom era asan, jiine wus eek, era owe banda, atetamtemin.” Era ipit emes atakam aesimum. Emes atakam surat, Efesus Yesus basitim ajarisiapmas owe amalaikat, ataejirimtamey.
Simirna surat atakam
8“Emesare, wore ara atakamam surat aeapomey. Wanam ara surat, Simirna Yesus basitim ajarisiapmas owe amalaikat, ataejirimtamey: ‘Jipit taka bonaknak aememe. Are asepnak aememtem. Armat Ipit dambir ateme, wanam ajaorwasite. Are ara atakam tara akoromman:
9Era ajirisemmakam pak demsam. Era pak apoknak aemapmakam pak demsam. Me, tare anakot pak daytinak ara aemompekem. Emesare, wan oweam, ‘Dare Yahudi owe.’ Emes atakam aesimemas. Me, are Yahudi owe apoknak. Are Bii Kapar Ipit basitim ajarisiapmas owe arare. Era owe era tame atakam tara ateman demsam. 10Emesare, era ajirisemtakam pak ombare bas. Bii Kapar Ipit, tare wan owe, buji tame bomon ataejiimteman. Ere tara baempor pak. Oweam, ise ban amnuk takes tara ajurusumteman. Oweam tara batatii apaye, me, tare Dera bamompim apok aemtankum apaye, ere Dere kuus bajamapom akotnak pak tara atetamtetertemin. Tararawa, jiine aememaartemakam.
11Me Allah Jip, ara atakam, Yesus basitim ajarisiapmas owe akoromum. Owe takes ara atakam jane bajitas. Me pota pak akumimosomtas, dambir boem apok aemtemas. Are bajirisem apok aemtemas.” Era ipit emes atakam aesimum.’ Emes atakam surat Simirna Yesus basitim ajarisiapmas owe amalaikat, ataejirimtamey.”
Pergamus surat atakam
12“Emesare, owre ara atakamam, surat aeapomey. Wanam ara surat, Pergamus Yesus basitim ajarisiapmas owe amalaikat ataejirimtamey: Jipit taka, jii warim bande jamnuk atoommar. Are ara atakam tara akoromman: 13Era aemapmakam asan demsam. Era Bii Kapar Ipit owe aobaomep asan ere. Me, tare Dera bajamkai fiak aememmakam. Emesare, Antipas deateman batam ipit aememe. Are eemnak Dera bamesemkorom ipit aememe. Oweam armat ipit, tawaut atatiies, tanom Dera bapatim apok aemenkum. Emesare, taasan Bii Kapar Ipit aemapmar asan are. 14Me, tare ara potanak pak jandereskope aemmakam apormin. Era pota pak ere, tare wan aemapakam owe, Bileam atakam ji aemakam. Bonaknak ere, Bileam pota pak baem, owe juas Balak, aememtamen. Era Balak arawa, pota pak baem, Israel owe atatapimtaaen. Era baream, wan owe, banda pak, bii atetamesen. Me Balak arawa, Israel owe, era pak banda atatapimtaaen. Balakam, owe asan pota pak baem atatapimtaaen. Emesare, are emes asan pota pak baem, Israel owe atatapimtaaen. 15Wanam, tare wan aemapakam owe, Nikolaus atakam ji aeemakam. 16Erarawa, era pota pak ambakemay. Era pota pak bamakem apok aemtakam, Dere fef ambaromemtemin. Derarawa, deokone aemapmar jii warim jii tara ajamomtemin.
17‘Allah Jip ara atakam Yesus basitim ajarisiapmas owe akoromum. Owe takes ara atakam jane bajitas.
“Emesare, Dere Allah baso ajisitaapomto banda pak juas manna, era pota pak akumimosomtas owe, sai asaietamtemin. Denom eka kope fasar, era owe atetamtetertemin. Era eka taka taka, wao aptam. Era wao ai juas. Wan oweam era juas baemepor asan apok. Era eka ataattas owe ere, juas aportetertemas.” Era Ipit emes atakam aesimum.’ Emes atakam surat Pergamus Yesus basitim ajarisiapmas owe amalaikat, ataejirimtamey.”
Tiatira surat atakam
18Emesare, wore ara atakamam surat aeapomey. Wanam ara surat, Tiatira Yesus basitim ajarisiapmas owe amalaikat, ataejirimtamey: ‘Allah Andep abanamek jisimak jee tamen ambiimimara. Me abaiam, tembaga tamen asarampimeme. Are ara atakam tara akoromman:
19Era aemaarukum pakam demsam. Me afaimaarukum pakam demsam. Era eemnak ambesemkoromaarukum pakam demsam. Me ajanetomataarukum pakam demsam. Me jak fiak aememaarukum pakam demsam. Emesare, bonaknak aemekem pak, janderes emes apormin. Me japen aemekem pak arawa, tanane emes apormin. 20Me, tare emes pota pak aememakam apormin: Tare era taot juas Isebel bambi aporomepmakam. Era taotam, ‘Dere Allah atakam bakoretam taot ara aemapey,’ emes atakam aesima. Era taot ere, debambi karai baetam owe potet atutumum. Are era owe tani tamane bajamdamat emes pota pak baem aememtamum. Wan oweam banda pak bii ataetiitamemas. Era taotam, era banda pak banda, debambi karai baetam owe, aememtamum. 21Denom era taot, era aeme dosa bamakem, bare jirao atetetamo. Me, are era pota pak bamakem potan. 22Emesare, Dere damo pota era taot atetamtemin. Ararawa, tapini ten aemamestem. Are, apota pak ajamememas oweam, era aememas pak bamakem apok aemtas, are bajirisem daytinak aemtemas. 23Denom era taot arereis takes atatiitemin. Emesare, Dere asamot bimak binip pakam, asamot jak bomon pak, demsam. Denom era aemaarukum pak jipu biti aptam ajietiitemin. Era samaniin samaniin Yesus basitim ajarisiapmas owe, emes aportemas.
24Dere ere, atakam, tare wan Tiatira owe, akorommin. Tare era taot apota atakam ji bae apok aememakam. Wan oweam, ‘Era asan pota pak Bii Kapar Ipi akarao pak are,’ emes atakam aesimemas. Emesare, tare Bii Kapar Ipit pak bajamem apok aememakam. Erarawa, Dere wan atakam tara basakamtam apok. 25Me, tara andaeomemtey bare ajiire, aemomekem pak, emes aemompay. 26Emesare, wan owe, era pota pak akumimosomemas. Are asepnak bare ajiire, Dere akot apormin pak jipu aemeemaartemas. Dere ere, era samaniin samaniin atakam basakamtam fiak pak, era owe atetamtemin. 27Are besi waku pak tamen atoomemtemas. Ararawa, era samaniin samaniin atakam asakamtamtemas. Are, era samaniin samanin, eka aone tamen, danais aemtiitemas. Me atetamtey fiak pak, Deritipit, Dera atetamen fiak pak taka are. 28Emesare, denom era jo baet tara atetamtemin.
29“Me Allah Jip ara atakam Yesus basitim ajarisiapmas owe akoromum. Owe takes ara atakam jane bajitas.” Era Ipit emes atakam aesimum.’ Emes atakam Tiatira Yesus basitim ajarisiapmas owe amalaikat, ataejirimtamey.”
Currently Selected:
BAPOROMTAM ATAKAM 2: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
