FILIPI 3
3
Turunak anakot pak atakam
1Dejoo owe akotnak! Ara atakam, asep atakam. Emesare, Tuhan ji baem jak tara batetamtan. Me bonak surat aeapomtamo atakam, aoeapomtammin. Dere ere, emes baem pota apok. Ere asan akot tara boem surat. 2Emesare, tare tadamo pitini danais baemtii aememas owe, turuar. Are juuri tamen. Are pota pak baem owe. 3Dare tamane pitini basakamosom anakot owe. Allah Jip, Allah eemnak bamesemkorom bimak binip atetammaro. Danom Kristus Yesus ajamkaimarom. Erarawa jak akot aemapmarom. Danom damba baemejorem asan apok apormarom. 4Me, wan owe ere, dare damba bajorem amaye emes bimak binip atetaramtetermas apaye, dere ere, ere depakpunake. 5Emesare, dere jimim kope aemanso ere, ise poman ban bamintep aemanso. Ise poman ban bamintep aemanso, owe tamane pitini asakamosomenis. Emesare, dere Israel tapirmi ipit ajimsamso. Desaman, Benyamin samankor. Derisare Ibrani owe. Derarawa, Ibrani ipit anakot aememe. Denom Parisi ipit aememaaru. Erarawa dere Yahudi owe basakamtam atakam ji aeaaru. 6Denom Kristus basitim bajarisiap owe ajurusumaaru. Denom Masa Basakamtam Atakam Buku atakam ji takesnak aekoromporaaru. 7Bonak ere, dere, “Era pak takes anakot pak,” emes bimak binip atetaramaaru. Asep arawa, dere Kristus bajamkai akot aporo. Dere era bonak pak takes anakot pak apok aporo. 8,9Me, era taka apok. Kristus Yesus, ere deTuhan. Dere Armat Ipit demsam. Erarawa akotnak apormin. Me wan pak takes anakot pak apok apormin. Dere Armat Ipit ajamkaio. Erarawa dere depak takes ajiosomo. Dere Kristus bataetkorom jak aseserommin. Denom Armat Ipit bajamkaikorom jak aseserommin. Erarawa dere wan pak takes tanokos pak emes tamen apormin. Denom, “Dere Musa Basakamtam Atakam Buku atakam ji aemin. Erarawa dere turunak ipit dema aememmin,” emes bimak binip batetaram apok aemmin. Dere ere, Kristus eemnak ambesemkoromo. Erarawa Allah dere turunak ipit atakam asakamtiie. 10Dere Kristus eemnak bamesemkorom jak aseserommin. Denom era ajaorwasite fiak pak basamo batakorom jak aseserommin. Dere era ajiriseme pak emes tamen bajirisem jak aseserommin. Dere Armat Ipit dambir ateme pak, emes tamen baem jak aseserommin. 11Emes aemtey, Allah era dambir owe ajaoromwasumtumto, Are dera ajaoromwasumtumteman.
Tare takes era aememin pak jipu batawejiaar atakam
12Dere ere, waa aemansa era pak takes baemkorom apok. Denom turunak ipit anakot baememkorom apok. Me, Kristus dera ataeten. Emesare, dere era pak takes baemkorom, jati daytu aeemin. 13Dejoo owe akotnak! Dere era pak baemkorom apok apormin are. Me, dere asep banep bojiepor apok. Dere bimin ajiomemmin asan bamaretey, po fiak ajimin emes tamen are. 14Dere ere ti putet bataefioskorom asanpu bamaretey, bimin ajiapmin. Dere era bonak bamaretey owe ataetmas pak, bataer aemin. Ere era Surga oup baemap are. Allah Kristus aemtamaro pak apormar are. Ararawa, dare era pak bataet ajatetetermaro.
15Me dare Kristus bajamkai fiak owe takes emes bimak binip atetaramamo. Tare wan bimak binip atetaramtakam apaye, Allah era pakam tara aporomtamteman. 16Emesare, waa aemansa ajaraarum bokot, emes ajaraaramo.
17Dejoo owe akotnak! Tare takes era aememin pak jipu atawejomaaray. Dare tabokot afimtiitamom emes tamen are. Me aememmarom pak jipu baem owe aporkoromay. 18Emesare, owe tanane era aememas pak, Kristus salib wus oup dambir ateme atakam, bifane afeomemas emes tamen are. Dere emes atakam tanane bonak tara akoretama ajimin. Denom waa bate manames aptam emes atakam tara aokorommin. 19Emesare, era owe danais aemamestemas. Are Tuhan Allah basitim apok. Are era andemas pak taka asitimemas. Era aememas pak, ere damke pak. Era oweam, “Era aememarom pak, ere akotnak,” emes atakam daytu akoremas. Are ara aemansa tapirmi pak bimak binip daytinak atetaramemas. 20Me, datapirmi Surga oup are. Danom dara bajortaer Ipit era asan aendaeto banamek apemmarom. Are Tuhan Yesus Kristus are. 21Armat ipit ere fiaknak. Erarawa Are takes aemomemkoromum. Emesamare, Are dadamo pota, adamo akotipitnak awar ajaoromtamtetertemaro.
Currently Selected:
FILIPI 3: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
