YAKOBUS 4
4
Ara aemansa tapirmi pak basenom atakam
1Me tarmamon owentakam atamamemakamam, atakam ajamkoramemakamam, wama tamenem? Ere tajak basenomem daytu pak jipu erare. 2Tare pak bataet jak aseserommakam. Me, tare era pak baemetaet asan apok. Erarawa tare apak boporetaet, owe batatii aemememakam. Tanom wan owe pak jak asenomememakam. Emesare, tare era pak baemetaet asan apok. Erarawa tare atakam ajamkoramemakamam, owentakam atamamemakamam, are. Tare atakam Allah bajanim apok. Erarawa tare bambi kuus aemememakam. 3Tare atakam Allah ajanimmakam. Me, tare pota emes ajanimemakam. Tare ta jak basenomem pak jipu taka atakam ajanimemakam. Erarawa tare era pak baemetaet asan apok. 4Tare Allah aowe. Erarawa tare ara aemansa tapirmi pak jak asenomememakam, ere tare banamo pimare owe aware. Tare ara tapirmi pak jak asenomemmakam apaye, ere tare Allah bifane afeomemmakam. Tare emes tamsam apokane? Ara tapirmi jak asenomememas owe, Allah bifane afeomememas. 5Me Alkitabam: “Allah aJip dajak bomon ataapomtamteterero. Dararawa, ara tapirmi pak jak asenomemtam apaye, Allah Jip itim daytu akemem.” Emes atakam aeapoma. Tanom: “Era atakam, ere bambi atakam,” emes bimak binip tetarammakamane? 6Emesare, Allah, era pota jak basenomem pak, emes bawotapem fiak pak daytinak atetammaro. Alkitab emes atakam are: “Allah amba aemetemtememas owe bifane afeommem. Me, Armat Ipit, asan akot, era amba baemetemtem apok owe, aemommem.” 7Emesare, Allah atakam ji aekoromay. Tanom Bii Kapar Ipit awotapemay. Me Bii Kapar Ipit arawa, beken ajiosteterteman. 8Tare Allah setep aememtakam, Are setep aememteman. Me ara aemapakam dosa owee! Era pota pak akorompimay. Era aemompakam bimak binip arke owee! Tajak bomon dosa akoromosomay. 9Era pota aemekem pak, jak pota aemapay. Tanom jak apok aemapay. Tanom bate ambatay. Waa wote awotmakam. Me, bate ambatay. Waa jak akot aemapmakam. Me, jak pota aemapay. 10Tanom Tuhan bipu, tamba baemetemtem apok owe aememay. Armat Ipit arawa, tare oup atemetetaemomteman.
Tame bajamtamat atakam
11Dejoo owe akotnak! Tanom tame bajamtamat bas. Owe ajoo owe tame atakam ajamtamattas apaye, aoemar pak pota emes atakam asakamtiitas apaye, are, “Allah basakamtam atakam potanak” emes tamen aememas. Tare Musa Basakamtam Atakam pota emes atakam asakamtiitakam, tare era Basakamtam Atakam ji bae owe apok. Tare, era Basakamtam Atakam pota, emes atakam basakamtii owe aememmakam. 12Era Basakamtam Atakam ataetiitame ipit, ere takakor. Era Basakamtam Atakam basakamtii ipitam takakor. Armat Ipit owe bajortaer apaye, owe danais baemtii apaye, emes fiak pak aptam. Erarawa tare tajoo owe pota pak atakam baemesakamtii asan apok.
Tamba baemetemtem atakam
13Baporay! Me tare wan oweam: “Waa apaye, to apaye, dare era kota aesostemarom. Dare era asan tahun taka aemaptemarom. Danom pak jow bauumamtaa aemtemarom. Dararawa, dapok tanane ambetemtiitemarom.” Emes atakam aesimemakam. 14Tare ere, era asep bare aemtakam pak tamsam apok. Tanom tajiine pak tamsam apok. Tare amun emes tamen are. Era amun kope andaesapotapem. Wanam ametefiosem. 15Tare ere, emes atakam bakore: “Tuhan akot aporto, dare dambir batem apok aemtemarom. Akot aporto, dare emes aemtemarom.” Emes atakam aesimay. 16Me tabimak binip ere, “Damsamnak,” emes bimak binip atetaramteteremakam. Tanom tamba aemetamtememakam. Me tamba aemetemtemmakam pak, ere potanak. 17Owe akot pak baem amsam apaye, me are akot pak baem apok aemmas apaye, are ere, dosa.
Currently Selected:
YAKOBUS 4: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
