IBRANI 2
2
Asamot owe bajortaer atakam
1Emesare, dare era jane ajiom atakam bajamkaikorom. Dare era atakam bamompim-ombar. 2Allah, aanakotnak atakam, malaikat owe arkeparat atetamen. Me malaikat owe arkeparat arawa, era atakam, asamot owe aotetamesen. Era atakam, ere atakamnak. Allah, era atakam ji bae apok oweam, era atakam aooes oweam, era pak jipu ajurusumen. 3Dararawa, Allah dara bajortaer atakam jane apok aememtam apaye, dare baemejorem asan apoknak. Era bajortaer atakam, ere anakotnak. Erarawa Tuhan era atakam bonaknak Amba akoren. Me bonaknak Tuhan atakam jane ajies oweam, era atakam, atakamnak aporomtameroes. 4Allaham, era atakam, atakamnak aporomtamero. Armat Ipit, baporomtam pakam, jinim bae pakam, atatkupis fiak pakam, aeme. Are aJip atetamemar pak, abimak binip jipu, sai asaie.
Yesus dosa bimak binip bajanimemtam Ipit atakam
5Emesare, era tapirmi atakam akoremarom, andaeto ai tapirmi are. Allaham, amalaikat owe, era tapirmi baomep, emes atakam apok. 6Me, Alkitab wan atakamam:
“Tuhan Allah! Asamot owe, ere akot owe tamen apok. Erarawa Wore era owe bimak binip ajanimmarem, ere wama tamenem? Asamot owe, ere bambi Asamot owenak. Emesanare, Wore era owe asan akot aemomemmarem!
7Wore asamot owe, juas apok owe, bare tanane apok aemapomem. Erarawa era malaikat owe, juas aptam owe, bare tanane apok aemapomem.
Wore asamot owe, raja owe emes tamen, atakam akot akoromem. Wonom, ara raja owe emes tamen asitimem.
8Wonom, are takes baemomemkorom, emes ataemomem.” Era Alkitab emes atakam aeapoma. Allah, asamot owe, Are takes baemomemkorom ataemome ere, Are takesnak baemomemkorom, emes ataemome. Era baemomem apok pak, ere apoknak. Waa ere, asamot owe, Are takes baemomemkorom apok apormarom. 9Dare ere, Yesus apormarom. Allah, asan akot, asamot owe batetam aememe. Erarawa Are Yesus asamot owe takes dambir batemtam atetame. Erarawa Are Yesus, bare tanane apok, juas apok Ipit emes ataemome. Me malaikat owerawa, juas aptam emes aememes. Emesare, Yesus ajiriseme. Wanam dambir ateme. Emesare, Allah, Armat Ipit, owe baomep Ipit aotaemome. Are Armat Ipit akotipitnak pak atetame wanam tere aoeome. Anom Armat Ipit asitime. 10Emesare, Allah, takes, Ara basitim akenemapome. Are owe tanane, arereis baemem, akot ajie. Are owe tanane, aakotipitnak pak takan bajamemomem, akot ajie. Erarawa Are Yesus bajirisem atetame. Era bajirisem pak, Yesus, Bajortaer Ipit anakotnak baemapom pak are. Yesusam, era owe ara Bajortaer Ipit aememe. Allah aeme pak, ere akot. 11Emesare, Yesus, dosa bakokokomosom Ipit. Armat Ipit Aritipitam, era dosa akokostas owe Aritipitam, ere taka. Erarawa Yesus, “Era owe dereotais,” emes atakam bakore, damke apok aemum. 12Armat Ipitam,
“Allah! Dere woatakam era dereotais akoromtemin. Denom era ajarisiaptas owe, Wora basitim so bae, tare takan aeomtemarom.”
Emes atakam aesimen. 13Wanam,
“Dere jiirey Allah aeetemin.”
Wanam,
“Dere ara aememey. Allah atetamen biiam Dere takan ara aememmarom.”
Emes atakam aesimen.
14Era atakam akore jii, ere asamot owe. Erarawa Yesus era owe awar aememe. Are asamot ipit ajaoreme. Ere Bii Kapar Ipit bakumimosom are. Me Bii Kapar Ipit, owe batatii fiak pak aemome. Me, Yesus, Bii Kapar Ipit bakumimosom, dambir ateme. 15Me asamot owe juiin afaafeaarir, dambir ombare aememaaris. Erarawa are tau bataa owe emes tamen aemapaaris. Me, Yesus era owe basurumtam, dambir atemtame. 16Atakamnak, Armat Ipit, asan akot, malaikat owe baem apok. Are asan akot Abraham arurupis aeme. 17Emesare, Armat Ipit, areotais awarnak baemem, ere anakot pak. Era pak, Armat Ipit, era owe, Allah Tame Pak Baem Ipit Daytu baemem pak. Anom owe soro bajiomem turunak Ipit baemem pak. Era pak Allah karai baetam pak. Anom era owe adosa bimak binip bajanimemtam pak. 18Bii Kapar Ipit, Yesus, aempore. Yesusam ajiriseme. Erarawa Armat Ipit, asamot owe dosa baem atatapimtaaemar pak, pi bajat amsam.
Currently Selected:
IBRANI 2: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
