GALATIA 2
2
Paulusam, era wan bamirimemom oweam, atakam
1Emesare, tahun 14 aememaaru. Derarawa, Barnabasatin Yerusalem aoememomum. Denom Titus aesomaso. 2Allaham dere era asan baesos atakam asakamtamen. Erarawa dere era asan aesoso. Me wan owe Yesus bajamkai owe akapar owe aememes. Denom era owe takan ajarisiapom. Derarawa, era Yahudi apok owe akoretammin Akot Atakam, era oweam aokoretamo. Ere, era owe, ara atakam baoorpor atakam are. Era aemo pak, era bonak karai aeaaru pakam, era japen karai aeaaru pakam, bambi baemames-ombar. 3Era takan aemjaraarum ipit juas Titus, Yunani saman ipit. Me, era owe Titus Yahudi owe pak tai tamane pitini basakamosom atakam basakamtam apok. 4Wan owe Titus Yahudi owe pak tai tamane pitini basakamosom atakam akores. Era owe Kristus Yesus bajamkai pir bae owe. Are, Kristus Yesus ajamkaimarom owe, Yahudi basakamtam atakam damon boemap apok apores. Are era pak baoorpor, jak aseseromes. Are dare era daytinak basakamtan atakam damon baememaar akoten. 5Emesare, ara Kistus Akot Atakam, atakamnak. Danom owe, era atakamnak pote atakam emes tamen baemapom, pota ajiom. Emesare, dare era owe atakam ji bae apoknak aemom.
6Ere wan owe era asan Yesus bajamkai owe akapar owe aememes aren. Era owe ere, ai atakam dera baememtam apok. Debimak binip ere, era owe, kapar owe apaye, bambi owe apaye, ere awar. Allah, owe biin baoorpor apok. Are owe jak bomon pak aoorporeme. 7Bonak ere, Allah dere Kristus Akot Atakam era Yahudi apok owe bakoretam ipit ataemomen— are Petrus Kristus Akot Atakam era Yahudi owe bakoretam ipit ataeme emes tamen are. Era kapar oweam emes apores. 8Emesare, Allah Petrus, Yahudi owe Yesus atakam bakoretam ambirimemome. Are dere era Yahudi apok owe Yesus atakam bakoretam ambirimemomen. Are emes karai tastu pak atetamteterero. 9Yakobusam, Kefasam, Yohanesam, Yesus bajamkai owe akapar owe aememesen. Era owe bamintep, Allah emes pak baem dera atetamen apores. Ararawa, Barnabasam, denom, ban ajiimemeroes. Era pak, dare karai are takan bae baporom pak arare. Danom atakam ajamsakamamtiiom. Dere Barnabasatin era Yahudi apok owepu baesos, wanam era owe bamintep era Yahudi owepu baesos, emes atakam ajamsakamamtiiom. 10Are ere, wan atakam takaam akoromeroes. Dare era pak apok owe bimak binip bajanimem bas, emes atakam akoromeroes. Denom emes taka baem jak aseseromo.
Paulus Petrus ajatemotaere atakam
11Me, Petrus, Antiokia ajinaoe ere, dere atakam baso armat ipit apapaimtiitamo. Armat Ipit pota pak aeme aporo. 12Bonak ere, armat ipit era Yahudi apok owe amos takan anda ajie. Me, Yakobus era asan ambirimemome owe ajinaoes ere, Petrus aotasieme. Are era Yahudi apok owe amos takan bonda apok aeme. Bonak ere, wan owe era Yahudi apok owe Yahudi pak tai tamane pitini basakamosom atakam akores. Petrusam era owe ombare aememe. 13Me era asan aememes Yahudi oweam, Petrus pir takan aees. Barnabaskoram era pir bae pak ajamkaie. 14Emesare, Kristus Akot Atakam atakamnak. Me, era owe aemas pak, era atakamnak jipu pak apok aporo. Derarawa, atakam Petrus era owe takes bipu akoromo: “Wore Yahudi saman ipit. Me, era aemmarem pak Yahudi saman atakam jipu apok. Era aemmarem pak Yahudi saman atakam jipu erare. Emesare, wore Yahudi apok owe, Yahudi owe emes tamen baem, wama tamen jitinomatmarem?” Emes atakam aesimo.
Allah, Kristus eemnak abesemkorommas owe takes, ajortaere atakam
15Emesare, dae Yahudi sama owe ajisamsom. Era Yahudi oweam, “Era Yahudi apok owe dosa owe.” Emes atakam aesimemas. Dararawa, Yahudi apok saman bas. 16Emesare, Allah, era Yahudi owe basakamtam atakam buku atakam ji bae owe, turunak owe, emes atakam basakamtii apok aemum. Me, Are Yesus Kristus eemnak ambesemkorommas owe taka, turunak owe, emes atakam asakamtiim. Dare emes pak damsam. Me, dare Kristus Yesus eemnak ambesemkoromom. Ere Allah, dare turunak owe, emes atakam basakamtii are. Era Yahudi owe basakamtam atakam buku atakam ji aeom pak, Allah dare turunak owe, emes atakam basakamtii pak apok. Me, Kristus ambesemom pak, Allah, dare turunak owe, emes atakam basakamtii pak. Emesare, Allah Yahudi basakamtam atakam ji bae owe, turunak owe, emes atakam basakamtii apoknak. 17Dare, Allah, dare turunak owe, emes atakam basakamtii, emes jak aseseromom. Me, Yesus eemnak ambesemkoromom, ere era pak taka. Emes aemom, dare dosa owe, emes aporom. Dare era Yahudi apok saman dosa owe emes tamen aememom aporom. Erarawa, Kristus dare dosa owe emapomeroe? Emes apoknak! 18Bonak ere, dare emes atakam ajamkaiom: “Allah, era Yahudi basakamtam atakam ji bae owe, turunak owe, emes atakam asakamtiim.” Emes atakam ajamkaiom. Dare ere, era atakam ataetiiosom. Emesare, dare era atakam aojamkaitam apaye, dare dosa owe, emes aporomtemarom. 19Dere ere, Musa Basakamtam Atakam Buku atakam dera bajortaer apok aporo. Erarawa dere Musa Basakamtam Atakam jipu boem apok aemo. Dere dambir aemo emes tamen are. Era pak ere, dere Allah akot apormar pak baemeem are. Emesare, dere Kristus takan, era salib wus oup dambir aemo emes tamen are. 20Erarawa era jatiaptam aememtey pak, dere apok. Ere Kristus dejak bomon aemapomman pak are. Emesare, dere Allah Andep eemnak ambesemkorommin. Erarawa waa aemtey pak aemmin. Armat Ipit dera afaimen. Are dambir atemtamen. 21Emesare, dere Allah era asan akot bambi atetamaro pak bawotapem apok. Allah, Musa Basakamtam Atakam Buku atakam ji bae owe, turunak owe, emes atakam basakamtii ere, Kristus dambir bambi ateme.
Currently Selected:
GALATIA 2: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
