EFESUS 6
6
Arisaream, ajiiam, asan akot bajamemam atakam
1Jiie! Tarisare atakam ji aeay. Emes baem, ere Tuhan bajamkai owe pak. Ere akot pak. 2,3Emesare, Alkitabam: “Wuritipitam, worsootam, asitimey. Emes aemtem, wore asan akot aemaptemarem. Wonom ara tapirmi jiine jirao aetemarem.” Emes atakam akorem. Era basakamtam atakam, ere ataaji atakam aptam. Era ataaji aptam atakam damon, era basakamtam atakam, ere bonak.
4Duturu owee! Tajii jak ambapnak baem bas. Tare ere, tajii Tuhan atakam aememtamay. Tanom tajii Tuhan bajamkai ataane aoweay.
Bambi karai baetam owe anama karai armat owe atakam
5Bambi karai baetam owee! Tare takarai armat owe atakam ji aeay— tare Kristus atakam ji aemakam emes tamena. Tanom era owe asitimkoromay. Ombaream ambaray. Era atakam ji ere, pir bae bas. 6Tare aatakam ji bae, abipu taka bas. Tare asamot oweiin jak akot baem bas. Emesare, tare Kristus abambi karai baetam owe. Erarawa tare Allah era akot apormar pak baem jati daytu aeay. 7Tare asamot oweiin bambi karai baetam taka apok. Tanom karai Tuhanam aetammakam. Erarawa era karai jak akot aptam aeay. 8Tanom tamsam. Tuhan, owe era karai akot aetamtas jipu, asan akot era owe poreemema ajies atetamtem. Are era asan akot bambi karai baetam owe atetamtem. Are era asan akot apa karai aemas owe atetamtem.
9Karai armat owee! Tanom emes tamen asan akot takarai baetam owe ajamemomay. Jokoman atakam era owe bakorom akariemay. Era owe aTuhanam, taTuhanam, Surga oup aapeta. Armat Ipit owe takes awar aporem. Tare emes tamsam.
Bii Kapar Ipit jii bajamom pak atakam
10Emesare, dere ara atakamkope tara akorommin: Tare Tuhan ajamkaimakam are. Erarawa fiak aememaaray. Me Tuhan adaytinak fiak pak atoomemkoromaaray. 11Tare Allah atetamtan jii bajamom pak takes atoomemkoromay. Bii Kapar Ipit tara bakumimosom-ombar. Me Bii Kapar Ipit pir tara bae, bimak binip akukuretiim. 12Emesare, dare jii asamot owe bajamom apok. Dare jii, bii pemerintah oweam, bii kapar oweam, ajamomemmarom. Danom jii waa aemapmarom jiiti tapirmi atakam asakamtamemas bii oweam ajamomemmarom. Danom jii era wonamo oup juein owe afiak pak ajamomemmarom. 13Emesare, Allah atetamemar jii bajamom pak takes ataay. Emes aemtakam, era pota bare aemamesto, tare jii owe biti ajitemakam. Tanom jii ajamomkoromtakam, tare tii awotemtemakam.
14Emesare, tare emes fiak ajakajiremkoromay. Tare Allah atakamnak ataetay. Ere tare asemak banam pak bajikem emes tamen are. Tanom turunak owe aememay. Ere tare sai baju bajiimomem emes tamen are. 15Tare jii bajamom ajasosoememas emes tamen aememay. Ere era Bafaim Atakam bakore jak akot baemem are. Tare sepatu bola bajiimomem emes tamen are. 16Wanam, Kristus eemnak ambesemkoromay. Ere tare jamase jow bauuom emes tamen are. Emes aemtakam, tare era Asan Pota Ipit, era ajimar jisimak aptam tas takes, asapimapomkoromtemakam. 17Kristus tara bajortaer aememem. Tanom era bajortaer pak atoomay. Ere tare jii bajamom topi bajiimapom pak emes tamen are. Me Allah atakam, ere Allah Jip atetame atakam are. Era atakam, jii warim emes tamen are. Tanom era atakam ataetay. 18Atakam Allah ajanimaaray. Allah pi tara bajat, emes atakam ajanimaaray. Me Allah Jip bimak binip tara atetamman pak jipu, atakam Allah ajanimaaray. Emesare, atakam fiak ajanimaaray. Bakariem bas. Atakam Allah era turunak owe takes ajanimtamaaray. 19Atakam Allah denom ajanimtamani. Atakam bakoretam aememtey, Allah ara atakam bimak binip dera batetam, emes atakam ajanimtamani. Tanom dere Allah Akot Atakam bomonnak pak, ombare apok jak aptam, baso bakoretam, emes atakam ajanimtamani. 20Denom Allah Akot Atakam bajomattam ipit. Erarawa owe rantai debanam, debaiam, banam ajikapomenis. Dere era atakam, ombare apok jak aptam bakore, emes atakam Allah ajanimtamani— Kristus dere era atakam bakore akot apormar pak jipu.
Asep atakam
21Emesare, akotnak dajoo ipit, ere Tikikus are. Are Tuhan karai akot baetam ipit. Armat ipit deatakam tara aokoretamteman. Ararawa tare, dere asan akot apaye, asan pota apaye, jane ajitemakam. 22Dere Armat Ipit tare emes ataejinaomtamo. Dere armat ipit, daatakam tara bakoretamam, jak fiak tara baemapomam, tara ataejinaomtamo. 23Emesare, Daritipit Allaham, Tuhan Yesus Kristusam, ji baem jak dajoo owe takes batetamtas. Are, owe bajamfaimamam, Kristus eemnak bamesemkoromam, emes bimak binip era owe batetamtas. 24Wan owe, Yesus Kristus daTuhan, bafaim bakari apok aememas. Emesare, Allah asan akot era owe baemto.
Currently Selected:
EFESUS 6: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
