EFESUS 4
4
Kristus, karai Ara baetam tastu pak batetam atakam
1Emesare, dere Tuhan abambi karai baetam ipit. Erarawa owe buji tame bomon ajitaapomenis. Denom ataane tara aoweommin: Allah tara ajateteteren ere, Are asan akotnak tara aemen. Erarawa tare emes asan akot baemem owe awar aememay. 2Tare tamba baemetemtem bas. Tanom tayieakot owe aememay. Jakam jirao aememay. Tanom ajamfaimamay. Asan akot ajamemamatay. 3Me Allah Jip, bimak binip awar atetamum. Emesare, tarmamon ajamkipimamemporaaray. Emes aemtakam, tare bimak binip awar atetaramaartemakam. 4Emesare, dare takes damo taka. Me Allah Jipam taka. Allaham, tare jiirey taka baee ajateteteren. 5Tuhanam takakor. Me eemnak ambesemkorommarom pak taka. Me bwi bakupimtaer pak taka. 6Allaham takakor. Danom takes Daritipit takakor. Are dare takes aemomemmaro. Danom takes abambi karai baetam owe. Are dare takes dajak bomon aemaptetermaro.
7Me, Kristus, karai Ara baetam tastu pak, dara atetamteterero. Ere dare Kristus akot apore pak batetam jipu erare. 8Erarawa, era Alkitabam:
“Armat Ipit Surga oupnak atemete ere, Are owe tanane atoomtemete. Are tastu pak, owe atetamtetere.”
Emes atakam aeapoma. 9Era atakam, “Armat Ipit oup atemete,” wama tamenem? Ere Armat Ipit bonak bap andae atakam are. Emesare, Armat Ipit ara bapnak tapirmi andae. 10Era bap andae Ipit, ere era oupnak atemete Ipit taka erare. Era wonamo oup asan, ere bap. Me Armat Ipit atemete asan ere, oupnak are. Era pak aeme, Are samaniin samaniin takes aememe. 11Me Armat Ipit, tastu pak, owe atetamtetere Ipit arare. Are wan owe, Yesus atakam bakoretam bamirimemom owe ataemome. Wan ere, Allah Akot Atakam bakoretam owe ataemome. Wan ere, Allah Akot Atakam bakoretam owe ataemome. Wan ere, Allah atakam baememtamam, Yesus basitim bajarisiap owe banamek bataiomat oweam, emes owe ataemome. 12Era owe aeme pak ere, Allah aowe, Allah karai akot baetam emes baemapom are. Era pak Kristus basitim bajarisiap owe Kristus bajamkai fiak baemapom are. 13Emesare, dare takes, era eemnak ambesemkorommarom pak, bimak binip takan atetaramtemarom. Erarawa dare Allah Andep damsam. Era damsam pak, bimak binip takan atetaramtemarom. Dararawa, sira awotemkoromtemarom. Dare Kristus turunak emes tamen aememtemarom. 14Erarawa dare jii tamen boemem apok aememmarom. Waaam dare atoomatmaroas emes tamen boem apok aememarom. Kuuram dare era asana barefufumtiia, ara asana jinaofufumtiia, emes tamen boem apok aememaro. Emesare, era pote atakam bapipikimtaa owe, pote atakam akukuramtiiemas. Are era atakam aememtamemas. Dare ere, era atakam jane bojie apok aememmarom. 15Dararawa, atakamnak ajamkaimarom. Danom owe afaimmarom. Danom Kristus ajamkaimarom. Erarawa dare sira awotemmarom emes tamen are. Emesare, Kristus ere, kuus tamen. 16Dararawa, adamo anakot pak emes tamen are. Dare poreemema ajiom adamo anakot poman emes tamen are. Me adamo anakot pak ere fima aptam. Era fima ere adamo anakot poman pak takes akekemtaaem. Emesare, era damo anakot aptam, Kristus jiirey taka aeem. Me damo anakot poman pak poreemema ajiom, akot pak aemtetertas, era damo anakot aptam, sira awotemtem. Me damo anakot poman pak takesam ajamfaimammas.
Ai jak baemomem atakam
17Emesare, dere Tuhan ajamkaimin. Erarawa dere emes atakam fiak tara akoretammin: tare Allah amsam apok owe emes tamen boem bas. Era owe abimak binip ere bambi taka. 18Abimak binipam jiitinak. Are amsam apok. Are jane sakenak. Erarawa are Allah atetammar jiine pak amsam apok. 19Are damke bokem apok aememas. Are era potanak pak baem, ji aeemas. Are era asan pota pak kupis takes aemkoromemas.
20Tare emes baemem apok. Tare Kristus bajamkai eteememekem. 21Tare Armat Ipit atakam jane etejiekem. Tanom Armat Ipit ajamkaiekem. Owerawa, Yesus atakamnak tara aememtamen. 22Emesare bonak aemaarukum pak takes bakoromosomteteray. Tatarai jak bafamtiiteteray. Tatarai jak basenomem pak, ere potet tara atutuman. 23Allah tajakam, tabimak binipam, ai bajaoromtamaartan. 24Tare poreemapa ajiekem ai jak batoomemteteray. Emesare, Allah era ai jak apa jak jipu aemtame. Me ai jak aemomemtas owe, turunak oweam, akotnak oweam, aememmas.
25Tanom pote atakam bakore bas. Dare poreemema ajiom, Kristus adamo anakot poman emes tamen are. Erarawa tarmamon, atakamnak taka ajamkoramay. 26Tare jak ambap aememtakam, dosa baem bas. Jak ambap, jee basapiepu ajiire baemem bas. 27Bii Kapar Ipit tare dosa baem atatapimtaatan, tanom era pak awotapemkoromay. 28Me wosom owe, wosom boe bas. Are karai fiak baetas. Are karai akot baetas. Erarawa are pak era pak apok owe baporesaietam are. 29Tanom pota atakam bakore bas. Tare ere, owe atakam akot akoromay. Me woatakam jane ajitas owe asan akot boem pak jipu taka akoromay. Era owerawa, asan akot aemaptemas. 30Tare, Allah Jip, jak pota baemapom bas. Allah Jip, tare Allah aowe, emes aporomtamum. Erarawa, Allah asep bare tara ajortaerkoromtan apormakam are. 31Tare era owe bifane pakam, era jokoman baemem pakam, era jak ambapam, era owentakamam, era tame atakamam, era pota pak takesam, ajiosomay. 32Me, tarmamon asan akot ajamemamay. Bafaimam ajamfaimamay. Emesare, tare Kristus ajamkaiekem. Erarawa Allah era aemekem dosa, bimak binip ajanimemtame. Emesare tanom, era tarmamon owe, pota pak tara aemen, bimak binip emes tamen ajanimemtamay.
Currently Selected:
EFESUS 4: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
