AEMAARIS PAK 16

Timotius Paulus anama Silas ajamkaie atakam

1Emesare. Paulus, kota Derbe aite wanam kota Listra ambaremen. Era asan ere, Yesus eemnak bamesemkorom ipit juas Timotius aemapen. Arsootam, Yesus eemnak bamesemkorom Yahudi taoten. Aritipit ere, Yunani ipitin. 2Listra anama Ikonium Yesus bajamkai owe, Timotius, owe akot, emes atakam akoresen. 3Paulus Timotius bajate akoten. Me, Timotius aritipit Yunani ipitin. Era tapirmi Yahudi owe emes amsamen. Paulus era owe emes amsam aporen. Erarawa are Timotius tamane pitini basakamosom Yahudi pak tai aemtiien. 4Emesare, are era kotaiin kotaiin aesoses, are Yerusalem Yesus atakam bakoretam bamirimemom oweam, Yesus basitim bajarisiap armat baemem oweam, era ajamsakamamtiies atakam, era owe akoromesen. Are era owe, era ajamsakamamtiies atakam ji bae akoromesen. 5Erarawa, Yesus basitim bajarisiap owe Yesus eemnak ambesemkoromesen. Era oweam juiin afaafeaye betema betema ajiesen.

Paulus Troas aemape, are pak taka bambi apore atakam

6,7Emesare. Allah Jip Paulus anama Silas atakam Asia tapirmi owe bakoretam atii aten. Erarawa, Frigia tapirmiam, Galatia tapirmiam, aip ajiire ambarememis, wanam Bitinia tapirmi baemtuk aemememisen. Yesus Jip era Bitinia tapirmi baemtuk baooen. 8Emesare, are Misia tapirmi aofes, wanam kota Troas ambaremesen. 9Eam arawa, Paulus pak taka bambi aporen. Era apore pak, emesare, Makedonia tapirmi ipit taka aememe, wanam atakam Paulus fiak ajanimen. “Makedonia ajinaoey. Pi pajataro.” Emes atakam aesimen. 10Paulus emes pak taka bambi aporerawa, dare Makedonia bajir fef taka aemporom. Danom, “Allah, Yesus Akot Atakam, era owe bakoretam, emes aereremartaamaro.” Emes atakam aesimom.

11Emesare. Dare Troas aendaejuuom, wanam woo juas Samotrake imtuu taka aemjirom. Era ajoferawa, dare kota Neapolis aseteom. 12Neapolis aseteom arawa, Filipi aesosom. Filipi, Makedonia tapirmi wan asan, kota daytun. Era kota, Roma pemerintah akotaen. Danom era asan bare bamintep aemapom. 13Yahudi Owe Samayen Bare ere, dare era kota afojimes tiri jimsap ajisom, wanam era jupima andaeom. “Era asan atakam Allah bajanim bajarisiap asan arare apeno.” Emes atakam aesimom. Emesare, danom era asan bap andaeapom, wanam atakam era ajarisiapes tapes akoromom. 14Era asan ere, kota Tiatira taot juas Lidia, daatakam jane ajie. Era taot, esakam kain jow bauumamtaa taot. Are Allah basitim taot. Emesare, Tuhan, Paulus atakam ji bae, bimak binip era taot atetame. 15Owerawa, era taotam, atame oweam, bwi akupimtaeres. Ararawa, atakam akoromero. “Tare dere Tuhan eemnak bamesemkorom apormankum apaye, tare de! Ise detame paesitay,” Emes atakam fiak akoromero.

Paulus anama Silas Filipi buji tame bomon aemapemis atakam

16Emesare. Are bare taka, dare atakam Allah bajanim asan aesosom, wanam bambi karai baetam taot bimnuk aemamtaerom. Era taot jak bomon, biin. Era bii, asep bare aamsekunaoto, atakam era taot aesimtama ajiaaririn. Era taot arawa, era atakam owe aesimtama ajiaaririn. Era owerawa, uang daytu, era taot armat owe atetama ajiaarisin. 17Era taot Paulusajie da fe asaramero. Are atakam afaketaa ajie. “Ara aememares owe oupnak Allah bambi karai baetam owe arare. Are era bajortaer atakam tara akoretamman.” Emes atakam aesima ajaie. 18Are bare tanane emes aeme. Emesare, Paulus jak pota aememe, wanam bimin awaieme. Are atakam era taot jak bomon bii akorome. “Dere Yesus Kristus juas ajietaermin. Emesare wore era taot jak bomon bajis, atakam asakamtammin.” Emes atakam aesime. Emesare, era bii ajise. 19Erarawa, era taot armat owe uang daytu botetam apok apores. Ararawa, Paulus anama Silas ajipirtaeres, wanam era kota owe bajarisiap asan ajimomtines. Are pemerintah owe bipu ajimomtines. 20Are era ipit amnuk, pemerintah kapar owe bipu ataemes, wanam atakam akoromes. “Ara ipit amnuk Yahudi owe arare. Are dakota atutumamis. 21Are ere aapak tai, atakam akoremas. Dararawa, Roma owe. Aapak tai dabasakamtam atakam aoom. Erarawa dare era pak tai baemetaet asan apok.” Emes atakam aesimes. 22Emesare, era owe tanane, Paulus anama Silas bajurusum aememes. pemerintah kapar owe era ipit amnuk apakaian, atirikomtaeres, wanam owe, era ipit amnuk, wus wusup bata, atakam asakamtames. 23Are wusup daytu ates, wanam buji tame bomon ataejiimes. Are era buji tame banamek batai ipit, era ipit amnuk, banamek fiak batai, atakam asakamtames. 24Era tame banamek batai ipit emes atakam jane ajierawa, are era ipit amnuk, buji tame bomon nak kamar aotaejiime. Are abai, wus daytu waut, banam ajikapome.

25Eamnak arawa, Paulus anama Silas, atakam Allah ajanimemis. Are Allah basitim so aeemis. Era buji tame bomon aemapes owe emes jane ajies. 26Emesare, ajie daytinak ametesime. Era buji tame fesisam asesemes. Era jimsap takes amba ambuemtetere. Era owe banam ajikapomes rantai takes amba asurendaes. 27Emesare, era buji tame banamek batai ipit ajasipiewasite. Are era tame jimsap takes amba ambuemtetere apore, wanam awarim asumtaere. Are amba bamitames aememe. Era buji tame bomon owe takes emeesos jiraoemen. 28Paulus ere, atakam daytu akorome. “Womba bamitames bas. Dare takes ara asan apatuma.” Emes atakam aesimen. 29Emesare, era buji banamek batai ipit, sese bamatemomem ajate, wanam era bomonnak kamar ametejiieme. Are ombare damo di tamen andieme. Are Paulus anama Silas bipu jindi andaepuape. 30Ararawa, era ipit amnuk, tasan ametetomjise, wanam atakam akorome. “Ara aememakam duturu ipit amnuka! Dere bajorem akot. Dere ere, wama pak emtey?” Emes atakam aesime. 31Era ipit amnuk arawa, “Wore Yesus Kristus eemnak ambesemkoromey. Erarawa wore, wotame oweam, ajoremtemakam.” Emes atakam aesimemis. 32Ararawa, Tuhan atakam, armat ipitam, atame owe takesam, akoretamemis. 33Eam arawa, armat ipit, era ipit amnuk ataere, wanam adaso takes bwi aesomkorome. Era eamam, Paulus anama Silas armat ipitam, atame oweam, bwi akupimtaeremis. 34Armat ipitam, era ipit amnuk, atame atoomjiie, wanam amos atetame. Armat ipitam, atame owe takesam, jak akotnak aememes. Are Allah eemnak ambesemkoromes apores are.

35Emesare. Jo apuerawa, pemerintah kapar owe apolisi owe ambirimemes. Are atakam akoromes. “Era ipit amnuk basurumay.” Emes atakam aesimes. 36Era buji banamek batai ipit arawa, emes atakam Paulus akorome. “Era pemerintah kapar owe tara basurum, atakam asakamtamares. Emesare tanom bajisami. Asan akot aesosami.” Emes atakam aesime. 37Paulus ere, atakam era owe akorome. “Dare Roma owe. Era owe ere, dara baoorpor apok aemes, wanam ara owe tanane bipu, wusup ateroes. Are buji tame bomon ajitaapomeroes. Waarawa, are tiruu dara bamirimosom atakam asakammas. Dare emes potanak. Are bajinaotas, wanam amba bataejisimtaroas.” Emes atakam aesime. 38Era polisi owerawa, emes atakam, pemerintah kapar owe akoromes. Era oweam, ‘Paulus anama Silas, Roma owe,’ emes atakam jane ajies, are ombare aememes. 39Ararawa, era ipit amnuk bipu ajinaoes. Are atakam akoromes. “Dormoo! Tare era aemom pak, ere potanak.” Emes atakam aesimes. Are era ipit amnuk tasan atoomjises. “Tare te! Baesosami!” Emes atakam fiak ajanimesen. 40Emesare, are era buji tame aejisemis, wanam Lidia tame ajiiemis. Are Yesus bajamkai owe bimnuk aemamtaeres. Are era owe jak fiak baemem ataane aweomemis, wanam aesosemis.

Currently Selected:

AEMAARIS PAK 16: LAIASC

Highlight

Copy