2 KORINTUS 7
7
1Dejoo owe akotnak! Dare Allah ataaji aeero pak apormarom. Erarawa dare era aememarom asan pota pakam, dajak bomon asan pota pakam, bajiosomamo. Danom Allah ombare aememamo. Erarawa dare turunak owe aememtemarom.
Paulus jak akot aememe atakam
2Emesare, tanom afaimaroay. Dare, pota pak, owe baem apoknak. Danom owe bajurusum apoknak. Danom pak bataet, owe potet batutum apoknak. 3Era akoremin atakam ere, tare dosa baem owe, ere emes atakam basakamtii pak apok. Dare tara afaimemarom. Erarawa dare jatiaptam aememtam apaye, dare tare takan aememtemarom. Dambir atemtam apaye, danom dambir tare takan atemtemarom. Bonak ere, dere emes atakam tare emekoretamo. 4Dere tara ambesemkorommin. Dere, tare owe akot, emes atakam daytu akoremin. Emesare, owe dara ajurusumemaroas. Me, jak fiaknak aemememin. Jak akotnakam aemememin.
5Makedonia tapirmi aseteomam, dare asan akot baemap apok aemom. Era samaniin samaniin, ere ajirisapom. Oweam atakam dara ajamkorameroes. Danom ombare aememom. 6Allah ere, era jak pota owe, jak fiak aemtameme. Emesare, Armat Ipit Titus ataejinaomtamero. Erarawa Allah dare jak fiak aemtamero. 7Titus ajinaomero, jak fiak aememom. Me, era taka apok. Armat Ipit tare jak fiak ara aemtamekem pak, atakam aokoromero. “Me Korintus Yesus bajamkai owe, wobi bapor jak aseseromemkorommas. Era pota aemes pak, ere jak pota aemapmas. Are, wora ambetenis.” Titus emes atakam aesimero. Derarawa, jak akot aoememkoromo.
8Bonaknak ere, dere surat aeapomo, wanam era surat tara atetamo. Era surat atakamam jak pota aemapomen. Dere ere, era pak, jak pota apok. Emesare, era surat atakam tare jak pota baateemem apok aemapomporen. Bonak ere, dere tajak pota aporo, denom jak pota aememo. 9Waa ere, dere jak akot aememmin. Dere tare jak pota aemapomen, ere jak akot aememo— ere emes apok. Me, tare jak pota aememekem, wanam dosa ambakemekem. Dere emes aporo, wanam jak akot aememo. Era jak pota aememekem pak, ere Allah akot apore pak jipu. Erarawa dare tara bajurusum apok. 10Allah wan owe jak pota baemem, akot apormar are. Era owe jak pota aemememas, are dosa ambakememas. Erarawa are ajorememas. Oweam era pak akot apormas. Me, owe ara aemansa tapirmi atakam jipu jak pota aemememas, are dambir atememas. 11Tare Allah akot apormar pak jipu jak pota aememekem. Erarawa tare asan akotnak aememekem. Emesare, tare Kristus bajamkainak jak aseseromekem. Tanom era dosa pak takan baem apok. Tararawa, era pak owe baporomtam jak aseseromekem. Tanom era dosa pak, jak ambap daytu aememekem. Tanom ombare daytu aememekem. Tanom dere tara bajinaomem jak aseseromekem. Tanom akot pak baem jak aseseromekem. Tanom era dosa bitit aeme ipit ajurusumekem. Era aemekem pak takes, ere pota apoknak.
12Denom era surat tara aeapomtamo, dere era pota pak aeme ipit bimak binip daytu apok. Era ipit, dosa aeme. Denom, era owe bimak binip daytu apok. Me, tare dara afaimkoromeroekem. Denom era pak, Allah bipu tara baporomtam, jak aseseromo. Emesare, dere era surat tara aeapomtamo 13Tare dara afaimkoromeroekem aporom. Erarawa jak fiak aememom.
Dare ere, era jak fiak aememom, era taka apok. Tanom Titus jak akot aemapomekem. Dare Titus jak akot aporom, danom jak akot aoememom. 14Denom atakam armat ipit akoromo, “Era Korintus owe akot,” emes atakam aesimo. Tanom pota pak aemekem, wanam damke dera akamemenkum— ere emes apok. Era atakam tara akoromaarum atakam, atakamnak. Me taatakam Titus akoromom atakam, ere atakamnak. Oweam emes apormas. 15Tare Titus ataerekem ere, tanom armat ipit asitimkoromekem. Tanom takes aatakam ji aeekem. Armat ipit emes bimak binip atetarammar ere, are tara bafaim ambetemkoromum. 16Emesare, tare turu owe apormin. Erarawa jak akot aemememin.
Currently Selected:
2 KORINTUS 7: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
