1 KORINTUS 7
7
Petae bajiem atakam
1Wanam, dere, tare surat dera ataejinaomtamenkum atakam, atep ajitmin. Oorey owe petae apok baememaar, ere akot. 2Me, tani tamane bajamdamat owe tanane aomatisa. Erarawa oorey owe aememayes petae bajiemtetertas. Tapes aemapteteresam oorey bajuuttetertas. 3Armo era aremo akot apormar pak jipu baemto. Aremoam era armo akot apormar pak jipu baemto. 4Aremo era damo, ere apas apok. Are armo damo. Armoam era damo apas apok. Are aremo damo. 5Tanom wan damo baamwotapem bas. Me, atakam ajamsakamamtiitakam: “Emesare, dare emes bare ajiire ise takan apok aemamo. Dararawa atakam Allah ajanimaaramo,” emes atakam aesimtakam, ere akot. Wanam, era bare ise takan boemamesay. Tare jak fiak apok apaye, Bii Kapar Ipit, tare asan pota pak baem, batatapimtaa-ombar.
6Are petae anama oorey bajuut atakam akoremin ere, dere atakam tara basakamtam apok. Me, tare emes baem akot aportakam, ere emes aemay. 7Dere owe takes de tamen baemem, ere, akot ajimin. Me, Allah, era pak oweo aememayes apa pak atetamum. Era pak oweo aememayes atetamto awar apok.
8Emesare, dere atakam era oorey apok tapes anama petae apok owe, era tano tapesam, akoromin: Are, de tamen baememtas. 9Me, are jak fiak apok aememtas apaye, petae bajiemtas. Tapes, oorey jak basenomem daytinak ere pota. Oorey oweam, tapes jak basenomem daytinak ere pota. Me, are petae bajiemtas.
10Dere atakam era petae aptam oweam, era oorey aptam tapesam, asakamtammin. Ara basakamtam atakam ere, der apok. Me Tuhan, emes atakam aosakamtamum: Aremo era armo batuujis bas. 11Aremo armo atuujisto, are tano taot emes baemapto. Me, are tano taot baemap pota aporto, are armo takan boemapto. Armoam, era aremo batuumjisim bas.
12Denom atakam wan owe akoromin. Tuhanam emes atakam basakamtam apok. Dere ere, emes atakam, akot apormin: Emesare, Yesus bajamkai ipit, era aremo Yesus bajamkai apok taot aporto, wanam ara taot, era ipit takan baemap akot aporto, ere, are era aremo batuumjisim bas. 13Wanam, taot, armo Yesus bajamkai apok ipit aporto, wanam era ipit era taot takan baemap akot aporto, ere, are era armo batuujis bas. 14Allah ere, taot, Yesus bajamkai taot aporto, armat Ipitam era armo akot aportem. Wanam, Allah, jipit Yesus bajamkai ipit aporto, Allah era ipit aremo, akot aportem. Allah emes pak baem apok ere, Allah tajii, Yesus bajamkai apok owe ajii emes tamen aporem. Me, Allah era jii akot aporem. 15Emesare, Yesus bajamkai apok taot, era armo Yesus bajamkai ipit aporto, wanam are era ipit batuujis akot aporto, ere batuujisto. Yesus bajamkai apok ipitam, aremo Yesus bajamkai taot aporto, wanam are era taot batuumjisim akot aporto, ere batuumjisimto. Emes aemto, ere Yesus bajamkai ipit apaye, taot apaye, era batuumjisim apok basakamtam atakam damon apaye, batuujis apok basakamtam atakam damon apaye, boemap apok aemtem. Emesare, Allah tare asan akot baemap baemap ajaten. 16Wormo ipit Yesus bajamkai apok ipit apaye, wore ere, wormo ipit ajortaertemarem apeno. Wanam, woremo Yesus bajamkai apok taot apaye, wonom woremo ajortaertemarem apeno. Tare emes tamsam apok.
Owe Allah ajate bare aemaoteteres are, emes taka baemapaartas
17Emesare, oweo aememayes Tuhan ataemomtetere atakam jipu baemaartas. Are, Allah era owe ajate bare aemapteteres, emes taka baemapaartas. Denom emes atakam era samaniin samaniin Yesus basitim bajarisiap owe akoromin. 18Allah, wan we ajate ere, era owe Yahudi owe pak tai tamane pitini basakamosom owe aememes apaye, are tamane pitini basakamosom apok tamen baemem bas. Allah wan owe ajate ere, are Yahudi owe pak tai tamane pitini basakamosom apok owe aememes. 19Tamane pitini basakamosom apaye, tamane pitini basakamosom apok apaye, ere anakot pak apok. Me, Allah atakam ji baekorom, ere anakotnak. 20Owe, Allah ajate bare aemapteteres ere, emes taka baemapaartas. 21Me Allah tara ajateteteren bare, tare bambi karai baetam owe aememekem apaye, emes pak bimak binip jirao bas. Me, takarai armat ipit tara basurumtam atakam asakamtiito ere, tare ajisay. 22Tuhan wan owe ajatetetere bare, are bambi karai baetam owe aemapes. Tuhan ere, era owe, dosa fiak pak asurumtame. Era owerawa, Tuhan aowe. Tuhan wan owe ajatetetere bare, are bambi karai baetam owe baemap apok. Era owe ere, Tuhan bambi karai baetam owe aemapmas. 23Tuhan harga daytu pak atetame, wanam Are tara ajititen. Erarawa tare asamot owe bambi karai baetam owe baemap bas. 24Dejoo owe akotnak! Owe, Allah ara ajatetetere bare aemapes, ere emes taka baemapaartas. Allaham bajamkaiaartas.
Petae apok owe atakam
25Emesare, era petae apok owe aememtas ere, Tuhan basakamtam atakam dera basakamtam apok. Me, Tuhan soro dera ajiomen. Anom atakamnak ipit aemapomen. Erarawa dere era petae apok owe atetarammin bimak binip, atakam tara akorommin. 26Dare waa asan pota aemapmarom apormin are. Erarawa debimak binip ere, owe waa aemapmas, emes taka baemapaar akot. 27Petae aptam owe, era tapes batuumjisim bas. Petae apok oweam, tapes bataetpor bas. 28Tare ere, tapes ataettakam, tare dosa baem apok. Me aitawais tapesam oorey ajuuttas, are dosa baem apok. Era petae ajiemmas owe ere, ajirisemtemas. Denom tare emes bajirisem pota ajimin.
29Era atakam akoremin ere, dare Yesus Kristus karai baetam bare, ere bare arke apok aemansem. Erarawa era petae aptam owe, petae bajiem apok tamen baememtas. 30Era bate ambatmas oweam, bate apok tamen baememtas. Era jak akot aememmas owe, jak akot apok tamen baememtas. Era pak ajititmas owe, pak apok tamen baememtas. 31Are waa apormarom tapirmi, ere ajaniamestem. Erarawa ara aemansa tapirmi pak atakam bakore owe, ara aemansa tapirmi pak, bimak binip batetaram daytu apok tamen baememtas.
32Tare jak pota apok tamen baemem, akot ajimin. Petae apok owe, ere Tuhan karai baetam bimak binip daytu atetaramemas. Are Tuhan jak akot baporeememom akot aememas. 33Era petae aptam owe ere, atapesti jak akot baporeememom akot aememas. Erarawa are ara aemansa tapirmi pak bimak binip daytu atetaramemas. 34Emesare, are bimak binip arke. Era aitawais tapesam, Tuhan karai baetam bimak binip daytu atetaramemas. Are turunak baemem akot aememas. Era oorey aptam tapes ere, ara aemansa tapirmi pak bimak binip daytu atetaramemas. Are ambiis jak akot baporeememom akot aememas.
35Ara akoremin atakam, tara bakeekem pak apok. Ere tare asan akot baemem atakam. Ere tare era akot pak baem ataane baowe atakam. Ere tare Tuhan karai baetam bimak binip arke apok atakam.
36Emesare, jipit taot bataet aememto, wanam, “Dere era taot bataet tarai aememaaru. Me, dere bataet apok.” Era pak ere pota. Era taotam ao tarainak tape. “Dere era taot bataet akot.” Emes bimak binip atetaramto, are era akot aporto pak baemto. Era pak baem, ere dosa apok. 37Me, era ipit jak fiak aememto, wanam atakam amba asakamtiito, “Dere petae bajiem pota,” emes ajito, anom akot. Are era taot bataet apok aemto, are dosa baem apok. 38Are era taot ataetto, anom dosa apok. Me, are era taot bataet apok aemto, are akotnak pak aemtem.
39Taot armo ipit, dambir baem apok aemto, era taot wan ipit bajuut bas. Me, era armo ipit dambir aemto, era taot, akot aporto ipit, bajuutto. Me, era ipit Tuhan bajamkai ipit takar. 40Me debimak binip ere, era taot oorey bojuut apok aemto, are asan akot aemaptem. Debimak binipam, ara akoremin atakam, Allah Jip aakot apormar pak jipu.
Currently Selected:
1 KORINTUS 7: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
