1 KORINTUS 5
5
Yesus basitim bajarisiap ipit asan pota pak aeme atakam
1Owe atakam akores ere, tarmamon, asan pota owe aomatisa. Me Yahudi apok samanam, emes daytinak asan pota pak baem amsam apoken. Era asan pota pak ere, jipit taka aritipit aremo tani anden. 2Tare ere, tamba aemetemtememakam. Tare bate apok wama tamenem? Emesare, tare era asan pota ipit tarmamon ambarepatapimemay. 3Dere tare takan baemem apok. Dere ere, tare takan aememmin emes tamena. Erarawa dere emes aeme ipit adosa, ere atakam emesakamtiio. 4Tare ajarisiaptakam ere, denom tare takan ajarisiapmin emes tamena. Yesus daTuhanam, afiak pak atetammaro. 5Tararawa, ara ipit, Bii Kapar Ipit aotasimemomtamay. Bii Kapar Ipit arawa, ara ipit adamo danais baemto. Ere Tuhan andaeto bare, ara ipit bajoremomto.
6Me tamba aemetemtememakam, ere potanak. Roti eek kutukoser, era dat roti bino aptam, daytu aemtiim. Tare emes tamsam apok apaye? 7Emesare, ara tarai roti eek bakoromosomkoromay. Erarawa tare ai dati roti bino emes tamen aemaptemakam. Emesare, daPaskah Pakambwi domba jii, Kristus are. Owe era domba jii emetatiies. Erarawa, tare eek apok roti emes tamen are. 8Erarawa, dare era pakambwi andetam, dare era tarai eek aptam roti banda bas. Era pota pakam, era asan pota pakam, banda bas. Dare ere, era eek apok roti andamo. Era roti asan akotnak pakam, era atakamnak pakam, erare. 9Ara surat tara aeapomtamo ere, dere, tare era asan pota owe damo bakaiem bas, emes atakam tara akoretamo. 10Ara akoretamo atakam ere, dere Kristus bajamkai apok asan pota oweam, era pak basenomem oweam, era wosom oweam, era eto basitim oweam, dere emes owe atakam apok. Dere emes owe atakam akoretamo apaye, ere tare ara aemansa tapirmi beken bajios are. 11Ara surat tara aeapomtamo atakam ere, “Owe, ‘Dere Kristus tare takan ajamkaimarom,’ emes atakam aesimtas, me are asan pota owe apaye, pak basenomem owe apaye, eto basitim owe apaye, tame atakam bakore owe apaye, bir bwi banda jaytu owe apaye, wosom owe apaye, era tare era owe amos takan banda bas.” Emes atakam aesimo. 12,13Dere era tasan owe adosa atakam basakamtii apok. Emesare, Allah, era owe adosa, atakam asakamtiitem. Tare ere, Yesus basitim tare takan bajarisiap owe adosa, atakam asakamtiiay. Erarawa tare era dosa ipit bamirimosomay.
Currently Selected:
1 KORINTUS 5: LAIASC
Highlight
Copy
Compare
Share
Want to have your highlights saved across all your devices? Sign up or sign in
@LAI 1994
