BILANGAN 31
31
Makenat seunbanit neu atoni Midian
1 Uisneno nakua a'an neu Nai Musa nak, 2“Anmo'e seunbanit neu atoni Midian natuin sa' le sin anmo'e nalali neu to Israel. Oke onane te of ho mate.”
3Oke te Nai Musa nak neu to Israel nak, “Miloitan nai he nati' hi amaken; hi mes amlaban atoni Midian he minaoba kasat Uisneno neu sin. 4Na'ko uf mese-mese to Israel, hi mes miloitan solalus atoni nifun mese he nao mat he anmaken.”
5Onane te uf mese-mese na'ko to Israel sin anbeti atoni nifun mese, amfaun ok-oke atoni nifun bo'es am nua le naloitan he anmakenan. 6Nai Musa anlenu sin he anmakenan bua'-bua' nok Nai Pinehas Ana' fuat knino Nai Eleazar anmone. Nai Pinehas in neki ale bale knino ma to'is-to'is he anfe ataka-ataka. 7Matom nok plenat Uisneno neu Nai Musa, atoni Israel sin anmaken nok atoni Midian ma namate ale sin atoni mone sin, 8nok kesel Midian sin nim, esle' Nai Ewi, Nai Rekem, Nai Zur, Nai Hur ma Nai Reba. Nai Bileam Nai Beor anmone, namate amsa.
9Atoni-atoni Israel sin anheke ale bife ma li'ana Midian, ma nasik nan ale sin mu'it ma ale sin amaus ok-oke. 10Ale sin kot ma ale sin um-ume notu nani sin amsa. 11Oke te atoni-atoni Israel sin naiti ale osaf le sin nasik, esle' ale sa' le sin anheke nan sin ma ale mu'it sin, 12oke te sin neki neu Nai Musa ma Ana' fuat knino Nai Eleazar ma neu to Israel ok-oke. Anbi nane sin fe nasnas anbi mnela Moab, anbi Noe Yordan ninen, anhaumak kot Yerikho.
Solalus Israel sin anfani nem
13Oke te Nai Musa, Ana' fuat knino Nai Eleazar ma ale anakaf bian na'ko to Israel sin anpoi na'ko um-ume hen senu solalus Israel. 14Nai Musa nato'an ale solalus nakaf amnanut, ale solalus nakaf ma nakaf apalat le fe sin anfani nem na'ko makenat. 15Nai Musa nak neu sin nak, “Nansa' hi mifetin ale bife nane sin anmoni? 16Ait bife-bife nane sin es ka natuin fa Nai Bileam fainekat, talante sin anfuli to Israel anbi Peor he nasaitan Uisneno? Ma lasi nane es neki lasi amle'ut neu to Uisneno. 17Es nane te mimate nai ale li'anmone sin ma ale bife le ka ao temef fa anteni. 18Mes ale bife le fe ao temef nabe'i hi maiti neu ki. 19Ma hi al-al ki le mimate milali atoni ai le him le'o amates aon nitu mes hi mimaika anbi um-ume kotin neno hitu in a'lon. Anbi neno tenu ma neno hitu hi ma ale bife-bife le him heke man sin nane minaoba luli besa miknino aom. 20Ale blua pake mese-mese ma sa' am sa' na'ko pasu, bibi in funun ai hau, mes miknino sin amsa.”
21Ma Ana' fuat knino Nai Eleazar nak neu atoni-atoni le fe sin anfani nem na'ko makenat nane nak, “I lekat lulut le Uisneno anfe nani neu Nai Musa. 22-23Ale sa' le ai ka notu nabe'i, esle' mnatu, noni muti, noni molo, besi, atnopas muti ma tnopas metan, mes naknino sin, antao sin neu ai nanan. Oke te ale blua nane mes naknino sin amsa nok oe luli besa knino he nati' ka malahi anteni fa. Ale blua bian le ka nalan nabe'i fa ai mes naknino sin nok oe luli besa knino. 24Anbi neno hitu hi mes amfase hi bale pake, ma nok nane te hi ka milahi amteni fa, ma nabe'i hi amtam meu um-ume snasat nanan.”
Anbati bale le nasik nan sin
25 Uisneno nakua a'an neu Nai Musa nak, 26“Ho ma Ana' fuat knino Nai Eleazar, mok ale anakaf bian na'ko to Israel, mes amso'i osaf le hi misik man sin, nok ale atoni le him heke man sin ma mu'it sin. 27Osaf le hi misik man sin nane mes him bati nua le amfaune papmese; aon bian neu ale solalus le sin nao nok ki ma anmaken, ma aon bian anteni neu to ok-oke. 28Ma le him beti miteta hem fe neu Kau, Uisneno, na'ko pa' ale solalus sin ini nane ho maiti man mese na'ko natun nim mese-mese – leko na'ko atoni le him heke man sin, ai na'ko bijae, bikase luke mnanu, bibi kase ma bibi. 29Mina'at sin neu Ana' fuat knino Nai Eleazar anfani on fua tulu le anbeti nateta neu Kau, Uisneno. 30Na'ko pa' le anfe neu to Israel, ho mes maiti man mese na'ko bo'nim nane mese-mese, leko na'ko atoni-atoni le him heke man sin, ai na'ko bijae, bikase luke mnanu, bibi kase ma bibi. Mina'at ale nane ok-oke neu atoni Lewi le anmepu anbi Au um-ume.” 31Nai Musa ma Ana' fuat knino Nai Eleazar sin anmo'e onle Uisneno naplenat nani.
32-35Naik na'ko sa' le solalus sin naiti nalali neu sin, osaf le sin nasik nan amfaun ok-oke: bibi kase ma bibi 675.000, bijae 72.000, bikase luke mnanu 61.000, ma li'anfeto ao temaf 32.000. 36-40Na'ko osaf aon bian le nane anfe sin neu ale solalus le maso'it on i: bibi kase ma bibi 337.500, ma na'ko tulu le nane anbeti naikan neu Uisneno bibi kase ma bibi 675; bijae 36.000, ma le anbeti nateta naikan neu Uisneno bijae 72; ma bikase luke mnanu 30.500, ma le anbeti naikan neu Uisneno bikase luke mnanu 61; li'anfeto ao temef 16.000, ma le anbeti nateta neu Uisneno li'anfeto ao temef 32. 41Oke te Nai Musa nana'at tulu le anbeti nateta nane neu Ana' fuat knino Nai Eleazar he natulu neu Uisneno, onle Uisneno naplenat nani.
42-46Pa' neu to papmese nok pa' neu solalus sin; bibi kase ma bibi 337.500, bijae 36.000, bikase luke mnanu 30.500, ma li'anfeto ao temef 16.000 47Onle Uisneno naplenat nani, Nai Musa naiti nan mese na'ko atoni bo'nim le anheke nan sin ma mu'it, oke te in nana'at sin neu atoni-atoni Lewi le sin anmepu anbi Um-ume Uisneno.
48Nalali te ale solalus anakaf le sin na' solalus Israel, sin nem neu Nai Musa 49ma sin nak, “Usi, haim so'i milali hai solalus sin le haim na' sin. Sin amfaukenu nabala, katit fa es amsa le he namneku. 50Es nane te hai meki ale bale pake noas mnatu, niti nimaf, niti haef, kleli, falo ma a heke le mese-mese in naiti nalali. Ale i ok-oke hai mina'at mani neu Uisneno anfani hai fua tulu, he nati' In naneo ma nahfo kai piut.” 51Oke te Nai Musa ma Ana' fuat knino Nai Eleazar ansimo mnatu le nane, al-al sin namasbon anbi bale pake noas. 52Fua tulu na'ko ale solalus anakaf nane mafenan ala kle'ot kilo natun nua. 53Mes ale solalus nane mese-mese sin naiti osaf bale sikat neu sin aokenu. 54Nai Musa ma Ana' fuat knino Nai Eleazar sin neki mnatu nane neu Um-ume Uisneno he nati' Uisneno naneo ma nahafo to Israel.
Currently Selected:
BILANGAN 31: AOZ
Highlight
Copy
Compare
Share
Want to have your highlights saved across all your devices? Sign up or sign in
