BILANGAN 20
20
Lasi-lasi le anbol anbi Kades
(Kel. 17:1-7)
1Anbi funan ahunut to Israel ok-oke sin nem antia anbi mnela snaen Zin ma sin namaika nabala anbi Kades. Bi Miryam anmate ma sin ansub in anbi nane.
2Anbi tabu mese anbi bale snasat nane sin kan mu'i fa oe. Sin nibun nabuabon nem neu Nai Musa ma Nai Harun oke te sin na'munu ma naakan nak, 3“Leko nesi kalu hai mate ambi Uisneno In human In matan bua'-bua' mok hai bia hai benu sin! 4Nansa' hi meki kai neu bale i? Ai he nati' hai mate bua'-bua' mok hai mu'it sin? 5Neu sa' hi meki kai ampoi mi'ko Mesir neu bale susal nukat i le kat sen fa sa'-sa'? Anbi i kan mu'i fa ane kase, kan mu'i fa palelo sena, tua min kase ma lin kase. Ma oe mninu amsa katit fa.” 6Nai Musa ma Nai Harun sin anao na'lo na'ko atoni-atoni nane oke te sin anhake anhaumak Um-ume Uisneno. Sin naluli nabes, oke te Uisneno In pinan nalil'on neu sin.
7 Uisneno nakua a'an neu Nai Musa nak, 8“Maiti nai tias le anbi Peti Fef Bela, oke te ho ma Nai Harun mes amnibun to ok-oke. Anbi to ok-oke sin human sin matan, ho mes mu'uab neu tubu fatu le anbi nane he nati' in napoitan oe. Onle nane ho mupoitan oe na'ko tubu fatu nane he nati' to ma sin mu'it napeni oe sin ninun.” 9Nai Musa in anao ma naiti tias nane onle Uisneno anfe plenat neune.
10Nai Musa ma Nai Harun sin nibun nabuab to ok-oke anbi tubu fatu nane matan. Oke te Nai Musa in na'uab nak, “Amnen nai, hoi to alaban! Ai hai mes he mipoitan oe na'ko tubu fatu i neu ki ka?” 11Oke te Nai Musa naiti tias nane ma in antepo tubu fatu nane neki tias hae nua. Ma oe anaek anpoi na'kone, talantia atoni ok-oke ma mu'it nabe'i sin ninun.
12Mes Uisneno nakua a'an neu Nai Musa ma Nai Harun nak, “Natuin hi ka miteb neu Kau fa nok alekot he miton Au kuasat le aknino nane neu to Israel sin matan, hi of kam topu ma kam na' fa sin hem tam meu pah le Au ba'an neu sin.”
13Nane oe mata Meriba. Anbi bale nane atoni-atoni Israel na'munu ma naakan Uisneno, ma anbi nane amsa Uisneno nalile In kuasat le aknino neu to nane.
Kesel Edom ka nafetin fa to Israel he nao nok in pah
14Namuni na'ko Kades, Nai Musa ansonu haef anao neu kesel Edom. Sin nak, “Hai mi'ko uf-uf Israel le fe amu'i malutas bia-benu mok hai Usif ko. Hai Usif oni ho muhin susal nukat le anhafen kai. 15Hai be'i ma hai na'i sin anao neu Mesir ma namaika anbi nane talante ton-ton in a'lon. Hai amfenu ma hai amsa atoni Mesir antao ma anmo'e kai ka naleko fa, 16ma hai amsakoi neu Uisneno hen bab kai. In a nen hai sakoit ma ansonu ahake neno tunan mese neu kai. Ahake neno tunan nane in antopu ma in na' kai ampoi mi'ko pah Mesir. Tabu le i hai aim amtia Kades, kot mese le nanak nok hai Usif ho pah. 17Haiaim toti ko Usif he mufetin kai fa he haiaim fini ma amkono amnao mok pah le i. Hai ma hai mu'it sin of kan beo fa na'ko lanan ma of kan taman fa neu mnuke ai lene tua min kese. Hai of ka minu fa oe na'ko hai Usif ho oe mata sin. Hai al of amnao mok lan opat talantia hai ampoi mi'ko hai Usif ho pah.”
18Mes atoni Edom sin natae nak, “Hai ka mifetin ki fa hem nao mok hai pah. Kalu him lelnom, hai of amsenu ki ma amlaban ki!”
19Atoni Israel sin natae nak, “Hai of amnao mituin lan opat, ma kalu hai ai hai mu'it sin ninu hi oe, hai of ambaen. Hai al hem nao mok hi pah.”
20Mes atoni Edom sin na'uab anteni nak, “Ka nabe'i fa!” Oke te sin anpoi neki solalus le nabe'i nok matani hen laban to Israel. 21Onane te atoni Israel sin nabain'ok anfani ma sin nami lanan anteta natuin atoni Edom sin kan lomi fa he nafetin sin nao nok sin pah.
Nai Harun anmate
22To Israel ok-oke nasaitan Kades oke te sin nem antia Tubu Hor, 23anbi pah Edom in nakat. Anbi nane Uisneno nakua a'an neu Nai Musa ma Nai Harun nak, 24“Nai Harun of kan tam fa neu pah le Au ba'an ulali neu to Israel; in of anmate natuin hi nua ki amlaban milali Au plenat anhaumak oe mata Meriba. 25Meki Nai Harun ma Nai Eleazar, in anmone, amnao meu Tubu Hor. 26Amkasu mani Nai Harun in blua pake ma ampake Nai Eleazar meki blua pake nane. Nai Harun in of anmate anbi bale nane.” 27Nai Musa in anmo'e sa' le Uisneno anfe plenat neune. Nai Musa, Nai Harun ma Nai Eleazar sin anao neu Tubu Hor ma to ankiso ma ansaksi ok-oke. 28Oke te Nai Musa ankasu Nai Harun in blua pake ma anpake Nai Eleazar neki Nai Harun in blua pake ma nane. Anbi Tubu Hor in tunan nane Nai Harun in nasaebon, nalali te Nai Musa ma Nai Eleazar sin ansanu anfani. 29To ok-oke sin anen neu Nai Harun anmate nalalien, ma sin ok-oke ankulu ma ankae neu in, neno bo'tenu in a'lon.
Currently Selected:
BILANGAN 20: AOZ
Highlight
Copy
Compare
Share
Want to have your highlights saved across all your devices? Sign up or sign in
