BILANGAN 17
17
Nai Harun in tias
1 Uisneno nakua a'an neu Nai Musa nak, 2“Amlenu atoni Israel anfe neu ko tias bo'es am nua, uf mese te tias mese, le nakaf uf nane es mes nana'at nani. Amtui kanaf anakaf uf mese-mese neu in tias, 3ma Nai Harun in kanan neu tias uf Lewi. Neu nakaf uf mese-mese mes anmu'i kun in tias. 4Meki tias-tias nane neu Au Um-ume ma amtao sin anbi Peti Fef Bela in matan bale le Au u eku ma utef ok ki. 5Tias atoni le Au beti ani of nasuf. Nok lasi nane te of Au usnasab han sakoit le piut-piut sin na'munu ma naakan ki.”
6Lasi nane Nai Musa nanaoba neu atoni Israel. Oke te ale sin anakaf nana'at neu Nai Musa tias mese na'ko uf mese-mese. Bua'-bua' ok-oke tasi bo'es am nua ma Nai Harun in tias anbi ale tias-tias nane. 7Oke te Nai Musa antao tias-tias nane anbi Um-ume Uisneno in nanan anbi Peti Fef Bela.
8Noka fa onane te, leka Nai Musa antam neu Um-ume Uisneno in nanan, in nit neu Nai Harun in tias nane tias na'ko uf Lewi, in nasuf nalali. Tias nane sufa teme, sufan natbo ma napoitan fuan le namnasi ma namnatu! 9Nai Musa naiti ale tias nane ok-oke nalali te nalile ma naton sin neu atoni Israel. Sin nit sa' le anbol nalali, oke te anakaf mese-mese naiti nafani in tias. 10Nalali te Uisneno nakua a'an neu Nai Musa nak, “Mubela mufani Nai Harun in tias anbi Peti Fef Bela in matan. Tias nane mes mubela anfani on lasi amnaut ma ataka neu atoni Israel alaban nane sin of anmate kalu sin ka nasnas fa na'munu ma naakan.” 11Nai Musa nanaoba sa' le Uisneno naplenat.
12Oke te atoni Israel nak neu Nai Musa nak, “Kalu onane, hai mimle'u! Hai of amate! 13Kalu atoni le anhaumak Um-ume Uisneno mes anmate, onane te katit fa panet ma fnekat anteni neu kai!”
Currently Selected:
BILANGAN 17: AOZ
Highlight
Copy
Compare
Share
Want to have your highlights saved across all your devices? Sign up or sign in
