IMAMAT 6
6
1 Uisneno anfe neu Nai Musa lekat lulut i. 2-3Atoni mese-mese mes natulu ma natnat fua tulu leka in nasanab neu Uisneno natuin in kan lomi fa hen fe nafani blua le in benuf anfe anlapat neune, ai na'moe ma anfuli atoni, ai nabak blua le namneku mes in nasuan nok supat. 4-5Atoni le nasanab nane mes anbaen nafani sa' le in napeni ok-oke neu blua tuaf in-ini, ansato nok lekat bati bo'nua. 6Neu tulu seka lukit atoni nane mes natulu ma natnat bibi kase mese ai bibi mese le kan mu'i fa in amle'un ma anfe osaf natuin osaf le anbi Um-ume Uisneno. 7Ana' fuat knino in natulu nani neu sanat atoni nane, ma Uisneno of ansako in sanat.
Fua tulu mnotu
8 Uisneno anlenu Nai Musa 9anfe neu Nai Harun ma in anah-anah sin lekat lulu i neu tulu le notu nani sin ok-oke. Ana' fuat knino mes antao tulu tnatas anbi baki tulu in tunan ma nabela nani sin anbi nane anbi fai mese in nanan, ma in ai mes anpin piut. 10Leka tulu nane anfani afu, Ana' fuat knino anpake nos hae tuka ma sobalu bet kone na'ko pilu muti, mes naiti afu le nok baluf nane na'ko baki tulu tunan, ma antao anbi baki tulu aon bian. 11Oke onane te in mes anseka in blua pake ma anpake blua pake teta, oke te neki afu nane anpoi na'ko um-ume, neu bale le nateta nani neune. 12-13Anbi noka-noka Ana' fuat knino mes antao hau hopit neu baki tulu tunan, antao tulu tnatas neu baki tulu tunan, ma notu baluf na'ko tulu tnatas halan. Ai anbi baki tulu tunan mes anpin piut ma ka nabe'i fa hen mate.
Fua tulu bukae
14Le i lekat lulut neu fua tulu bukae neu Uisneno. Es na'ko sanut mofut Nai Harun mes neki fua tulu nane neu baki tulu in matan. 15In mes naiti ut manula nima mese nok mina ma ale in fomeni, ma notu anbi baki tulu in tunan anfani taka' neu ale tulu tnatas nane ok-oke natulu nalali neu Uisneno. Fua tulu nane in fon anhalin Uisneno In nekan. 16-17Ut in nesin nane mes anmo'e anfani utunu' ka nok fa lalu haef ma ale Ana' fuat knino anbukae nani anbi bale le nateta nani esle' anbi Um-ume Uisneno po'an. Nane pa' ma nama' Ana' fuat knino le Uisneno anfe nani neu ale Ana' fuat knino na'ko fuat tulu bukae. Bukae nane aknino kun, onle tulu tnatas sako sanat ma tulu tnatas seka lukit. 18Of ante nabal-bal ale atoni mone sanut mofut Nai Harun nabe'i sin anbukae utunu' nane; nane sin pa' ma sin nama' nabala piut na'ko bukae le natulu neu Uisneno. Atoni bian le an on non neu bukae le natulu nalali nane, of napeni amle'ut natuin bukae nane in aknino kun.
19 Uisneno anfe neu Nai Musa lekat lulut i 20neu fua tulu namepan Ana' fuat knino mese na'ko sanut mofut Nai Harun. Anbi neno namepan in, in mes natulu ane kase in ut mafenan kilo mese neu Uisneno. Ut bian natulu anbi noka-noka ma in nesin anbi manas anmabe. 21Ut nane mes anselo nok mina, ma notu anbi bale se'it in fafon, oke te anheli anbati sin ma natulu on fua tulu bukae. Fua tulu nane in fon anhalin Uisneno In nekan. 22Of ante nabal-bal es na'ko sanut mofut Nai Harun le namepan anfani Ana' Fuat knino Amnanut mes natulu nani fua tulu nane. Fua tulu nane mes notu nani ok-oke neu tulu tnatas neu Uisneno. 23Ale fua tulu bukae le Ana' fuat knino natulu mes notu nani ok-oke, ka nabe'i fa hen bukae akle'o amsa.
Fua tulu sako sanat
24 Uisneno anlenu Nai Musa 25anfe neu Nai Harun ma in anah-anah sin lekat lulut i neu fua tulu sako sanat. Mu'it neu fua tulu sako sanat mes anlolo anbi bale lolo mu'it neu fua tulu mnotu. Fua tulu nane aknino le'uf kun. 26Ana' fuat knino le natulu fua tulu nane mes anbukae nani anbi bale le nateta nani, esle' anbi Um-ume Uisneno po'an. 27Sekau amsa ai sa' amsa le antom sisi mu'it nane of napeni amle'ut natuin in akninon ma in matanin. Kalu anpisil na' mu'it nane ma antoman sobalu mese, sobalu nane mes anfase nani anbi bale le teta kun. 28Nai' afu le anpake he nahan sisi tulu nane mes nape' nani. Kalu le anpake nane nai besi, nai' nane mes anfon oke te naknino neki oe. 29Atoni mese-mese anbi asal-nonot Ana' fuat knino nabe'i anbukae tulu le aknino le'uf nane. 30Mu'it neu luli besa sako sanat le naiti nan na' bian he neki neu Ke'an Knino, mes notu nani ok-oke ma ka nabe'i fa hen bukae.
Currently Selected:
IMAMAT 6: AOZ
Highlight
Copy
Compare
Share
Want to have your highlights saved across all your devices? Sign up or sign in
