KELUARAN 13
13
Tulu tnatas li'anmone nael
1 Uisneno nakua a'an neu Nai Musa nak, 2“Mitulu ale li'anmone nael neu Kau. Ale li'anmone nael atoni Israel, ma ale mu'it ankeso le nahonis nahunun nane Au ini.”
Tolas Utunu' Ka Nok fa lalu haef
3Nai Musa nak neu to Israel nak, “Anbi neno le i Uisneno nafetin ki neki In kuasat le anaek, talante nabe'i him poi mi'ko Mesir, bale an aten ki anbine. Es nane te, mimnau nai neno le i. Kais miah utunu' le malalu haef. 4Anbi neno le i, fun mese antam neno mese, hi misaitan pah Mesir. 5Nok han supat Uisneno anta'en nalali neu hi na'if sin he nati' anfe nani neu ki pah uf Kanaan, Het, Amori, Hewi ma Yebus. Leka Uisneno neki nalali ki neu pah athoes ma maafa nane, ton-ton anbi fun mese, hi mes anmo'e tolas le i. 6Anbi neno hitu in nanan hi mes ambukae utunu' le ka malalu haef fa, ma anbi neno hitu mes hi mo'e tolas he miluli ma mibes neu Uisneno. 7Anbi neno hitu in nanan ka nabe'i fa he him bukae utunu' le malalu haef, ma anbi hi pah anfun natef ka nabe'i fa hen mu'i lalu haef sa' amsa.
8Anbi ahunut tolas le nane hi mes mitonan hi anmone sin mak ale lasi le hi mo'e nane natuin ale sa' le Uisneno anmo'e nalali neu ki anbi tabu hi misaitan pah Mesir. 9Tolas le i anfani mnaut neu ki onle taka' le anfutun nalali anbi hi nimam ai le antao nani neu hi ilam. Tolas le i namnauba ki he nati' hi minoina Uisneno In plenat sin piut, natuin Uisneno napoitan ki na'ko Mesir neki In kuasat anaek. 10Minaeb tolas le nane anbi ton-ton anbi tabu le anlek nani.”
Li'anmone ahunut
11Nai Musa nak neu to Israel nak, “Uisneno of neki ki neu pah Kanaan le In anta'en nalali neu ki ma hi na'if sin. Leka pah nane anfani hi ini, 12hi mes mitulu ale li'anmone ahunut ma ale mu'it ankeso le nahonis nahunun. Ale nane ok-oke Uisneno ini kun, 13mes ale bikase luke mnanu ankeso le nahonis nahunun mes amsoi na'ko Uisneno esle' mitulu bibi kase ana' mese anfani in a'sekan. Kalu hi kam lomi fa hem seka bikase luke mnanu nane, am ipu in to'an ai in neon. Ale li'anmone le hi mihonis mihunun sin mes him soi mani sin. 14Kalu anbi neno amunit hi anah natan ale lasi nane in otan sa', hi mes mitae sin mak on i, ‘Nok Uisneno In kuasat le anaek In neki kit atpoi ta'ko pah Mesir, bale an aten kit anbine. 15Leka Kesel Mesir namanub in nekan ma in kan lomi fa he nafetin kit he hit atnao, Uisneno namate ale li'anmone unu anbi pah Mesir, leka mansian in anah ma mu'it in ana'. Nok Lasi nane hit tatulu neu Uisneno mu'it in ankeso le nahonis nahunun, mes hit atsoi tani hit anmone unu sin.’ 16Lasi nane anfani mese neu kit anfani taka' le mafutun anbi hit nimak ai anbi hit ilak. Lasi nane namnauba kit piut nak Uisneno napoitan nalali kit na'ko pah Mesir neki In kuasat le anaek.”
Ni nope ma ni ai
17Leka Kesel Mesir nafetin nalali to Israel sin anao, Uisneno ka neki fa sin he nao natuin lanan pah atoni Filistin, maski nak nane lanan le na'pal. Uisneno natenab nak, “Kaisa-kaisa atoni-atoni nane sin antofon leka sin nit nak sin mes hen makenan, oke te sin anfani neu Mesir.” 18Es nane te Uisneno neki sin anfun natuin mnela hufui anao neu Tasi Gelagah. Anbi tabu sin nasaitan Mesir, atoni-atoni Israel nane neki auni ma kenat onle hen tam anbi makenat.
19Nai Musa in neki Nai Yusuf in nuif sin, natuin anbi leku fe anmoni Nai Yusuf anlenu atoni Israel sin ansup hen mo'e onane. Nai Yusuf in ba'an on i, “Anbi tabu Uisneno nafetin ki, au nuif sin mes hi meki sin na'ko bale i.”
20Atoni Israel sin nasaitan Sukot ma sin anmo'e um-ume anbi kot Etam, anbi mnela hufui in ninen. 21Anbi tabu ne-neno Uisneno In nao nahunun sin anbi sin matan anbi ni nope ma anbi fa-fai Uisneno In nao nahunun sin anbi ni ai he natonan sin lanan. Nok lanan nane nabe'i sin nao anbi manas ma fai. 22Anbi neno teme ni nope nane anhake anbi to nane sin matan ma anbi fai ni ai nane nok sin.
Currently Selected:
KELUARAN 13: AOZ
Highlight
Copy
Compare
Share
Want to have your highlights saved across all your devices? Sign up or sign in
