AMOS 5
5
Han honet neu te'un nekaf
1Amnen nai hoi to Israel! Au he si neu ki sit nu'ut mese:
2Israel fe ao teme nane anmofu nalali,
in of kan fen anteni fa.
Mes nafetin in anbi in nain fafon kun,
ma tit fa es hen bab in hen fen anhake.
3 Uisneno Anesit Afinit nakua a'an nak, “Meo pa'e nifun mese anpoi na'ko kot mese anbi Israel hen maken, mes alsin le anfani nem alsin natun mese; meo pa'e natun mese le anpoi na'ko kot bian neu makenat, ma le anfani nem alsin bo'mese.”
4 Uisneno nakua a'an neu to Israel nak, “Amli' ma mo'e baniom ma amfani aim meu Kau, ma of hi mipeni honis. 5Kais amnao he miluli ma mibes anbi Bersyeba. Kais mami Kau anbi Betel, natuin Betel of namneku. Kais amnao amsa meu Gilgal, natuin amaika anbi kot nane of naiti sin neu bale mapolin.”
6Amfani aim nai meu Uisneno, he nati' hi mipeni honis. Leka hi kam fani aim fa meu In, In of nem onle ai le anpin ma notu nani to Israel. Kan mu'i fa atoni mese anbi Betel he namate ai nane. 7Amle'ut neu ki, hi le miklelo amnonot ma amtali amneot nane ma mile'un atoni in pa'ma in nama'!
8 Uisneno es anlek ma anlulu afkun-afkun abit neno tunan –
faif nome ma afkun maiko,
In es nabaina mes'okan afani meusine, ma manas anfani fai.
In es an opan oe tasi neu pah meto.
Le anmo'e lasi le nane esle' Uisneno.
9In nale'un atoni akuasat ma in matanin.
10Him nek nanan atoni le anlaban lasi susu' ma le namolok nok amneot anbi lef lasi. 11Hi misusu' atoni amamu'it ma hi misik man sin aen kase. Es nane te of hi ka mitua fa anbi hi um-ume amsat sin le hi mifena milali sin. Of hi ka minu fa tua min kase na'ko lene-lene tua min kase le him sen mani sin. 12Au uhin ulali hi maufinu nane le in anaen ma hi sanat in amfaun. Hi minisi atoni alekot; him simo noni poh fefaf ma hi mifetin atoni amamu'it anmo'e sin ka nok fa amneot ma amnonot anbi tabu lef lasi. 13Natuin hi mo'et onane, atoni-atoni ahinet sin naben leko nesi sin anta' anbi maufinu onle i.
14Anmo'e alekot nai, ma kais anmo'e maufinu, he nati' hi mipeni honis. Nok nane te Uisneno Akuasat Afin-finit of nabala nok ki anbi hi atnanam onle hi mimolok milali. 15Mito'an maufinu ma amnek mo'et alekot, ma amna' mitau amneot. Oni Uisneno In nek nani atoni-atoni le nabala na'ko uf Israel.
16 Uisneno Akuasat Afinit nakua a'an nak, “Anbi lanan-lanan na'ko kot in nanan, atoni of ankul ma of an oel natuin nekan antu'. Ma ale atof lene of ankae ma ankul neu atoni amates. 17Anbi ale lene tua min kase, atoni of ankae ma ankul natuin Au aum ma kas ki. Au, Uisneno, ukua ulali Au a'ak.”
18Namneo amle'ut neu ki le amhat ma ampao Neno Uisneno! Neno nane in otan sa' neu ki? Neno nane anfani neno mesokan, ma ka neno le neki fa meusine neu ki. 19In amo'en onle atoni le naen na'ko meo asu, mes naeku nok asu fui. Ai onle atoni le anfani nem na'ko ume ma antao in niman neu baki lape, ma kauna anlau in! 20Uisneno In neno nane nahenu nok mesokan ma ka meusine fa – neno le nahenu nok nope le namesok.
21 Uisneno nakua a'an nak, “Au nek nanan ma hapestae leka Au kiso leka ho munaeb ho neno naek sin! 22Leka hi meki fua mnotu ma fuat ane kase, of Au ka simo fa. Of Au ka simo fa ho mu'it apokat sin le nane le ho mutulu sin neu Kau anfani tulu halan.
23Musnasab ho sit sin naluik Kau, Au ka lomi fa he nen ho leku in hanan. 24Leko nesi, so nati' amneot nane ansai onle oe, ma amnonot nane onle noe le kan meti fa.
25Hoi to Israel, anbi tabu le Au topu ki amnao mituin mnela snaen anbi ton bo'ha in nanan, Au ka toti fa tulu ma fuat na'ko ki. 26Mes tabu le i hi mibes neu Sakut le hi mibaina anfani kesel, ma Kewan, afkun le hi miluli ma mibes neune. Es nane te ale lasi le hi mo'e le nane so nati' hi maiti mani sin anmes kun. 27Leka Au polin ki neu pah mese le na'lo nes na'ko Damsyik. Au Uisneno le Au kanak Uisneno Akuasat Afin-finit es ukua ulali Au a'ak onane.”
Currently Selected:
AMOS 5: AOZ
Highlight
Copy
Compare
Share
Want to have your highlights saved across all your devices? Sign up or sign in
