ZEPANYA 1
1
1On ma hata ni Tuhan tu si Zepanya anak ni si Kusi, i ma anak ni si Gedalya, i ma anak ni si Amarya, i ma anak ni si Hiskia, taran di tingki ni si Josia anak ni si Amon raja di Juda.
Ari paruhuman sian Tuhan
2Didok Tuhan ma, “AbiskononKu ma sandok na adong di tano on, 3sude jolma dohot binatang sude unggas dohot ihan. PutusanKu noma sandok jolma manusia, sahalak pe nada paloasonKu be mangolu. Au Tuhan, madung mandok songon i.
4UhumanKu ma sude na maringanan di Jerusalem dohot na di Juda sudena. Teba-teba ni parsombaan tu Baal pe abiskononKu ma sian i. Halupahonon noma sude angka malim na mangoloi Baal dohot angka debata na asing i. 5Ias haisonKu sude sanga ise na manaek tu tarup laho manyomba mataniari, bulan dohot angka bintang. AbiskononKu muse dope halahi na manyomba Au jana na marsumpa mandok setia tu Au, hape marsumpa muse halahi mangasahon goar ni Debata Milkom. 6AbiskononKu ma halahi na so ro tu Au sanga na so mangido panogu-noguon tu Au dohot na dung marbalik manadingkon Au jana na so ra be mangihutkon Au.”
7Mian ma hamu di jolo ni Tuhan Debata! Angke madung donok ari ni Tuhan. Tutu madung dipasingkop Tuhan sihaulkonon i jana madung diparbadiai angka na diontangNia i. 8Di ari panyambolan i, didok Tuhan, “UhumanKu ma angka halak na godang, angka anak ni raja, dohot sude jolma na mangihutkon adat dohot hasomalan ni halak sileban. 9UhumanKu ma sandok halak na marsomba songon na so mananda Au, dohot na manangko jana mamunu jolma laho manggohi bagas ni tokena dohot angka barang na dirampas.”
10Anggo di ari i, ninna Tuhan, “Habegean ma sora ni na tangis di Horbangan Ihan, habegean ma sora ni andung sian parkotaan na imbaru, dohot sora ni na matolbak godang marsaringar ma sian angka dolok.” 11Mangandungi ma hamu jana martangisan di na tarbege sora i tu hamu, ale pangisi ni kota parlombang, angke ma pola mate sude parboniaga hona bunu!
12Di hatiha i buatonKu ma obor jana galedaonKu ma kota Jerusalem. UhumanKu ma halak na disi na marpos ni roha jana puas dibaen dirina sandiri, jana na mandok di bagasan rohana, na so jungada sanga aha dibaen Tuhan na denggan sanga na jat. 13Hona rampas ma sinadongan ni halahi jana roncohonon ma bagas ni halahi. Pajongjongon ni halahi ma bagas, tapi nada ingananna. Karejohonon ni halahi ma kobun anggur tapi nada inumonna anggurna.
14Madung donok ari paruhuman ni Tuhan, olo da, madung donok sajo do, lalu ne ma i manigor. Gok hapaeton do ari i, salang angka ulu balang pe angkon gabe mangangguki. 15Ari haririmas do ari i, ari hamaolon dohot hasusaan, ari hadadabu dohot hasegoan, ari hagolapan dohot haholomon, ari na rambon jana na manyorop. 16Tarbege ma sadari i sora ni sarune dohot surak-surak ni porang sian angka parporang na mangaroro tu angka kota na marbenteng dohot angka palas-palas na gincat.
17Didok Tuhan ma, “ParoonKu ma bahat parmaraan tu jolma manusia lopus gapa-gapa halahi songon halak na so marnida. Mardosai do halahi tu Au, jana saonnari durus noma mudar ni halahi songon aek, jana marbusuhan ma angka bangke ni halahi di tano i.”
18Di ari na jorbut i pataridahonon ni Tuhan ma murukNa gabe nada tarbaen sere dohot perak ni halahi be paluahon halahi. Malala ma sude portibi on ditutung api ni hamuruhonNa i. Jadi ompot ma sintakkononNia sandok hosa na adong di tano on.
Currently Selected:
ZEPANYA 1: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society
