RUT 4
4
Marbagas si Boas dohot si Rut
1Jadi kehe ma si Boas tu inganan parsuo-suoan di pintu horbangan ni kota i. Dung juguk ia disi, mamolus ma bayo na nidok ni si Boas kahanggi ni si Elimelek na sumolkot. Jadi dipio si Boas ma ia, “Ro jolo tuson kahanggingku, juguk dison!” Ro ma bayo i lalu juguk. 2Dung i dipiohon si Boas ma sampulu halak hatobangon ni kota i anso rap juguk muse disi. Dung marjuguhan halahi, 3didok si Boas ma hatania tu bayo kahangginia i, “Ma mulak si Naomi sian Moab. Saonnari giot gadisonnia ma tano bagian ni si Elimelek, kahangginta i. 4Jana didok rohangku angkon botoonmu do salaho tusi. Muda nada, torus torang ma dokkon, angke hum hita na dua sajo do nampuna hak taringot tusi; ho do na sumolkot, baru au.”
Dialusi bayo i ma, “Olo, na giot tobusanku ma i.”
5Jadi ninna si Boas, “Antong denggan ma i anggo songon i. Tapi muda ditobusi ho tano i sian si Naomi, angkon laing buatonmu muse do si Rut na mabalu na sian Moab i. Harana anggo tano i angkon hot do gabe nampuna ni pomparan ni halak na dung jumolo monding i.”
6Dialusi bayo i ma, “Antong anggo songon i do, hupalua ma hakku laho manobusi tano i. Harana muda hutobusi i, laing na so pomparanku do hape nampuna i. Dumenggan ma ho manobusi i, ulang au.”
7Di hatiha i, muda digadis sanga ditukarkon halak sanga na aha nampunania, somalna dibuka sipanggadis do sandalnia sian patnia lalu dipasahat ia ma i tu sipanobusi laho patandahon na dung sah pangalaho i. Songon i do carana dibaen halak Israel laho patandahon na dung sah sada parkaro ni na manggadis tano.
8Hara ni i, di na nidok ni bayo i tu si Boas, “Ho sajo ma da manobusi i,” ditalduskon ia ma sandalnia sian patnia lalu dipasahat ia tu si Boas. 9Jadi didok si Boas ma tu angka hatobangon dohot tu sude halak na deba nari na adong disi, “Sadari on hamu ma sudena na gabe saksi bahaso na dung hutobusi sian si Naomi sude sinadongan ni si Elimelek dohot angka dakdanaknia, i ma si Kilion dohot si Mahlon. 10Jana tamba ni i, hubuat muse ma si Rut, boru Moab, tinggal-tinggalan ni si Mahlon i gabe dadaborungku. Jadi dung songon i laing hot ma tano i gabe nampuna ni sisolkot ni na dung monding i. Jana pomparannia pe laing tongtong adong di tonga-tonga ni koum sisolkotna dohot di kota bona buluna. Ingot hamu ma, na gabe saksina ma hamu sadari on.”
11Didok angka hatobangon dohot halak na deba nari i ma, “Olo, hami ma saksina. Sai dibaen Tuhan ma dadaborumi songon si Rahel dohot si Lea na manubuhon bahat anak di si Jakob. Sai gabe mamora ho nian di tonga-tonga ni angka halak na sian horong ni Marga Efrata jana gabe tarbonggal ho di Betlehem on. 12Sai gabe songon keluarga ni si Peres anak ni si Juda dohot si Tamar i ma nian angka dakdanak na giot silehenon ni Tuhan di ho sian boru na poso on.”
Si Boas dohot pomparanna
13Jadi gabe dibuat si Boas ma si Rut gabe ripenia. Dipasupasu Tuhan ma ia gabe denggan pamatangnia jana sorang ma sada anaknia halaklahi. 14Didok angka dadaboru ma tu si Naomi, “Di Tuhan ma da puji-pujian: Madung dilehen Ia di ho pahompu di ari sadari on laho markasayahon ho. Sai tarbonggal ma goar ni si Uncok i di Israel! 15Dihaholongi parumaenmi do ho. Madung dilehen ia di ho lobi sian na tarlehen ni pitu halak anak halaklahi. Saonnari madung dilehen ia muse di ho sada pahompu halaklahi na giot mangalehen semangat na imbaru muse di ho laho mangolu, jana na giot markasayahon ho dung matobang ho.” 16Dibuat si Naomi ma dakdanak i lalu dipature-ture ia sian gok ni holong ni rohania songon dakdanaknia sandiri.
17Digoari angka dadaboru na maringanan donok disi ma goar ni dakdanak i si Obed. Didokkoni halahi ma tu halak, “Ma adong do sada anak ni si Naomi halaklahi!”
Si Obed on ma di pudian ni ari na gabe amang ni si Isai, i ma amang ni si Daud.
18Jana on ma tarombo ni si Daud mamungka sian si Peres, i ma: Si Peres, manubuhon si Hesron, 19si Hesron manubuhon si Ram, si Ram manubuhon si Aminadab, 20si Aminadab manubuhon si Nahason, si Nahason manubuhon si Salmon, 21si Salmon manubuhon si Boas, si Boas manubuhon si Obed, 22si Obed manubuhon si Isai, jana si Isai manubuhon si Daud.
Currently Selected:
RUT 4: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society