RUT 1
1
Bungkas si Elimelek dohot keluargana tu Moab
1Di hatiha na markuaso angka Hakim di Israel, masa ma haleon potir di tano Israel. Hara ni i kehe ma sada bayo sian Betlehem di Juda dohot dadaborunia, rap dohot dua anaknia giot tinggal di Moab sanga na sadia lolot. 2Goar ni bayo i si Elimelek, goar ni dadaborunia si Naomi, jana goar ni anaknia na dua i si Mahlon dohot si Kilion do; halak Efrata do halahi sian Betlehem na di Juda. Dung lalu halahi di Luat Moab, tinggal ma halahi disi. 3Hape taran disi dope halahi, mate ma si Elimelek, jana tading ma si Naomi rap dohot anaknia na dua i. 4Mambuat boru Moab ma halahi na dua, i ma si Orpa dohot si Rut. Dung sampulu taon, 5mate muse ma da anak ni si Naomi na dua i, i ma si Mahlon dohot si Kilion. Jadi, tinggal mamunjung noma si Naomi.
Mulak si Naomi dohot si Rut tu Betlehem
6Dung adong sadia lolot dibege si Naomi ma na dung mamasumasu Tuhan tu bangsoNa marhite suha ni panen na denggan. Jadi hara ni i gabe disangkaphon si Naomi ma laho kehe rap dohot parumaennia na dua i manadingkon Moab. 7Rap kehe ma halahi laho mulak tu Juda. Tapi di tonga dalan 8didok si Naomi ma tu parumaennia na dua i, “Mulak ma da hamu tu bagas ni inanta hamu. Sai burju ma Tuhan tu hamu songon haburjuonmunu tu au dohot tu angka mandiang i. 9Jana sai lomo ma roha ni Tuhan anso laing dapotan rongkapna be hamu jana marripe mangulahi.”
Dung didok si Naomi songon i, diummai ia ma halahi songon na manjalangi. Tapi mamungka ma tangis si Orpa dohot si Rut, 10jana didok halahi ma tu si Naomi, “Nada le namboru! Dohot do hami mulak dohot namboru tu bangso ni namboru.”
11“Ulang songon i, maen!” ning si Naomi mangalusi, “angkon mulak do hamu.#1:11 ANGKON ..... HAMU: Mangihutkon adat ni halak Jahudi muda adong sada bayo na mate na so adong anakna halaklahi, angkon marbagas do tinggal-tinggalanna i dohot anggi ni mandiang halaklahina i. (Ligi Pang. 25:5-6) Aha ma gunana hamu mangihutkon au? Tarbaen dope lakna au manubuhon anak halaklahi na gabe halaklahimunu? 12Angkon mulak do hamu, angke madung matobangtu au muda na giot marbagas. Jana sugari laing adong dope arop ni roha di au, gabe marbagas au laing sadari on jana sorang anak halaklahi, 13patut ma he na tarbaen hamu marbagas dohot halak na asing patunda ni na angkon painte-intehon lopus magodang halahi? Nada songon i da maen, nada adong songon i! Madung muruk Tuhan tu au jana ibo do rohangku mida hamu.”
14Dung i tangis ma halahi mangulahi, diumma si Orpa ma namborunia i laho manjalangsa, lalu kehe ma ia mulak. Tapi anggo si Rut nada ra marsirang sian si Naomi. 15Jadi gabe didok si Naomi ma tusia, “Ligi ma Rut! Ma kehe angkangmu tu bangsonia dohot tu angka debatania. Tole ma, ihutkon ia!”
16Tapi dialusi si Rut ma, “Namboru, ulang ma da suru au mulak dohot manandingkon ho namboru! Ihutkononku do namboru. Sanga na tu dia namboru kehe, laing disi do au tinggal. Bangsomu noma bangsongku; jana Debatamu laing i muse ma Debatangku. 17Sanga na di dia marujung ngolu ni namboru, laing disi ma giotku mate dohot dikuburkon. Sai diuhumi Tuhan i ma au, lobi dope tehe sian i, muda adong sanga aha pe na manyirang au sian namboru, asing ni hamatean i!”
18Diida si Naomi laing manggogo do roha ni si Rut anso dohot, jadi gabe nada adong be tardok ia sanga na aha.
19Jadi dipatorus halahi ma pardalanan ni halahi lopus tu Betlehem. Disi lalu halahi di Betlehem, manigor gaor ma na sahuta i. Dipardokkoni angka dadaboru na disi ma, “Si Naomi dehe i?”
20“Ulang goari au si Naomi,” ning si Naomi,#1:20 NAOMI: Di hata Ibrani “Naomi” astuanna “Na Pasonangkon”. “si Mara#1:20 MARA: Di hata Ibrani “Mara” astuanna “Paet”. ma au goari hamu, angke madung dipadiar Debata Na Markuaso i do au mangolu gok hapaeton. 21Di na kehe au sian on tuk do di au, hape saonnari dioban Tuhan au mulak tuson martangan na rumar. Jadi, indangkon be sai dokkon hamu au si Naomi, dibaen madung diuhumi Tuhan Na Markuaso i au dohot bahat parkancitan!”
22Songon i ma baritana hamumulak ni si Naomi sian Moab rap dohot si Rut, parumaennia bangso Moab i. Di parlalu ni halahi di Betlehem i, na baru mamungka dope musim panen ni burir-burir.
Currently Selected:
RUT 1: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society