PODA 2
2
Guna ni na maniop habisuhon
1Jagit ma angka pangajaranku, ale anakku, jana paingot-ingot ma angka sipaingotku tu ho. 2Parrohahon ma sanga aha na bisuk jana parayak ma mangastuisa. 3Olo, ale anakku, halungunkon ma parbinotoan jana pangido ma pangastuion. 4Jalahi ma i songon na manjalahi sere, jana kojar ma i songon na mangkojar arta na buni. 5Muda songon i botoonmu ma sanga aha arti ni biar maradopkon Tuhan jana maruli parbinotoan ma ho taringot tu Debata. 6Tuhan do na mangalehen habisuhon; sian Ia do dapot jolma parbinotoan dohot pangastuion. 7Dilehen Ia do tu halak na daulat pangurupion dohot parlinggoman. 8Dijagohon Tuhan do angka halak na manghaholongi Ia jana dijagohon Ia do halak na tigor pambaenanna.
9Muda dioloi ho do au, ale anakku, botoonmu ma sanga aha na tigor, na jujur dohot na denggan. Laing botoonmu muse ma sanga na songon dia ho patut mangolu. 10Gabe marbisuk ma ho jana lehenon ni parbinotoanmu ma hasonangan di ho. 11Jagohonon ni pangastuionmu dohot hamaloonmu ma ho, 12jana sundatanna ma ho mangkarejohon na sala, boti muse padaoonna ma ho sian angka jolma na patubu-tubu parbadaan. 13Nada ra be halahi mangolu mangihutkon dalan na sintong, hara ni na mangihutkon parngoluon na gok dosa. 14Dihajopkon roha ni halahi mambaen hageduhan jana dijalahi halahi do hapuasan ni rohana di bagasan parbuatan na jat. 15Panipu do halahi jana nada tarhaposi.
16Anggo ho, ale anakku, tartulak ho do elek-elek ni dadaboru na so ture, dohot boru sileban na manggogo mangela ho marhite hata-hata na tabo. 17Dadaboru na so setia do i tu halaklahina sandiri jana madung dihalupahon ia janjina tu Debata. 18Muda kehe ho tu bagasna, dos do i na kehe ho tu hamatean. Kehe tusi sarupa dohot na kehe tu inganan ni jolma na mate do i. 19Sanga ise na mandapotkon i nada jungada mulak be i tu dalan na manuju hangoluan. 20Hara ni i, ale anakku, tiruan ni halak na denggan ma ihutkon, jana jagohon ma dalan-dalan ni halak na tigor. 21Angke, halak na jujur do na mangingani tano, jana halak na bulus marroha do na angkon tongtong tinggal disi. 22Tapi anggo halak na jahat dohot parjehe paruaron do sian luat on, songon duhut na niumpat sian tano.
Indonesian Bible Society