BILANGAN 36
36
Teanon ni angka dadaboru na marbagas
1Dung i kehe ma angka kapala ripe sian Marga Gilead anak ni si Makir pahompu ni si Manase anak ni si Josep, manopot si Musa dohot angka pamimpin ni halak Israel. 2Ninna halahi, “Disuru Tuhan i do hamu mambagi tano i di halak Israel gabe tano pusako marhite undi. Laing Ia do na manyuru hamu mangalehen tano pusako i tu kahangginami si Zelafehad bagihononna di boruna. 3Tapi porlu do ingoton muda marbagas halahi dohot halaklahi sian marga na asing, jadi marga na asing noma nampuna tano i. Muda songon i, tano na dung ditontuhon hian di hami gabe mur murak. 4Di Taon Paulakkon, di bangso Israel, dipaulak ma tu nampuna parjolo angka arta teanan na dung targadis, gabe hot ma tano ni boru ni si Zelafehad i gabe teanon ni halaklahi ni halahi, gabe agoan tano ma marga nami.”
5Dung i dipabolkas si Musa ma tu halak Israel angka parenta na sian Tuhan, “Sanga aha na nidok ni Marga Manase i tutu do. 6Jadi hara ni i didok Tuhan do bahaso angka boru ni si Zelafehad i tola marbagas sanga tu ise giot ni halahi, asal ma laing di bagasan marga ni halahi. 7Tano pusako ni halak Israel hot do i ganop di margana be. 8Ganop dadaboru na manean tano pusako di ganop Marga Israel, angkon laing tu marga i do ia marbagas. Muda songon i, sude halak Israel manean tano pusako sian ompungna 9hara ni i nada morot be tano pusako i sian marga na sada tu marga na asing. Ganop marga ni bangso i hot ma manean tano pusako ni halahi be.”
10Jadi songon na dung diparentahon ni Tuhan i tu si Musa, boru ni si Zelafehad na lima i, 11i ma si Mahla, si Tirsa, si Hogla, si Milka dohot si Noa marbagas tu iboto ni halahi. 12Marbagas tu angka marga na di bagasan Marga Manase anak ni si Josep ma halahi. Marhite na songon i gabe hot ma tano pusako na nitean ni halahi sian ama ni halahi.
13On ma angka aturan dohot hatontuan na nilehen ni Tuhan tu halak Israel marhite si Musa dompak maradian halak Israel di tano na hornop na di Moab mardonokkon Batang aek Jordan paadop-adop dohot Jeriko.
Currently Selected:
BILANGAN 36: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society
