BILANGAN 33
33
Pardalanan sian Mesir tu Moab
1Dung ditinggalkon halak Israel tano Mesir di bagasan barisan ni marga-margana be, na niuluhon ni si Musa dohot si Harun, maradian do halahi di angka inganan na nitontuhon. 2Diparentahon Tuhan ma tu si Musa anso disuratkon ia sude inganan paradianan ni halahi muda giot marbandar.
3Ditinggalkon halak Israel tano Mesir di tanggal lima bolas bulan sada, sadari dung Pesta Paskah parjolo. Marhite pandonganion ni Tuhan i ditinggalkon halahi ma Ramses, disaksihon halak Mesir, 4di hatiha mananom anak siangkaan ni halahi na dung dibunu Tuhan i. Marhite na songon i ma dipatidahon Tuhan i, na gumogo do Ia sian angka debata ni halak Mesir.
5Dung ditinggalkon halak Israel Ramses, marbandar ma halahi di Sukot. 6Dung i marbandar di Etam di topi ni parhorsihan. 7Sian i mulak halahi tu Pi Hahirot, sabola Habincaran ni Baal Zefon, lalu marbandar donokkon ni Migdol. 8Dung i ditinggalkon halahi ma Pi Hahirot torus manaripari Laut Rara dung i torus tu Parhorsihan Zur dung tolu ari di pardalanan, marbandar ma halahi di Mara. 9Sian i torus halahi tu Elim lalu marbandar disi angke adong disi dua bolas mual dohot batang ni kurma pitu pulu kambona.
10Dung i ditinggalkon halahi ma Elim marbandar ma halahi donokkon ni Solok Suez. 11Dung sian i marbandar halahi di Halongonan Sin. 12Sian i marbandar ma halahi di Dopka. 13Sian Dopka, marbandar ma halahi di Alus. 14Sian Alus, marbandar ma halahi di Rafidim, tapi nada adong inumon di inganan i.
15Sian Rafidim, marbandar ma halahi di Halongonan Sinai. 16Sian Halongonan Sinai marbandar ma halahi di Kibrot-Taawa (sanga “Kuburan Ni Nahisapan).” 17Sian Kibrot-Taawa marbandar ma halahi di Haserot. 18Sian Haserot marbandar ma halahi di Ritma. 19Sian Ritma marbandar ma halahi di Rimon Peres. 20Sian Rimon Peres marbandar ma halahi di Libna. 21Sian Libna marbandar ma halahi di Risa. 22Sian Risa marbandar ma halahi di Kehelata. 23Sian Kehelata marbandar ma halahi di Dolok Siater. 24Sian Dolok Siater marbandar ma halahi di Harada. 25Sian Harada marbandar ma halahi di Makelot. 26Sian Makelot marbandar ma halahi di Tahat. 27Sian Tahat marbandar ma halahi di Tarah. 28Sian Tarah marbandar ma halahi di Mitka. 29Sian Mitka marbandar ma halahi di Hasmona. 30Sian Hasmona marbandar ma halahi di Moserot. 31Sian Moserot marbandar ma halahi di Bene-Jaakan. 32Sian Bene-Jaakan marbandar ma halahi di Hor Gidgad. 33Sian Hor Gidgad marbandar ma halahi di Jodbata. 34Sian Jodbata marbandar ma halahi di Abrona. 35Sian Abrona marbandar ma halahi di Esion-Geber. 36Sian Esion-Geber marbandar ma halahi di Halongonan Sin i ma Kades. 37Sian Kades marbandar ma halahi di Dolok Hor di parbalohan ni tano Edom.
38Mangihutkon parenta ni Tuhan i, Malim Harun manangkok tu Dolok Hor. Disi ma marujung ngolunia di tanggal sada bulan lima taon paopat puluhon dung ditinggalkon halak Israel tano Mesir. 39Di hamamate ni si Harun marumur ma ia saratus duapulu tolu taon.
40Hatiha i bolkas ma barita tu raja Arad sabola Selatan ni Kanaan bahaso halak Israel ro adop luatnia.
41Mardalan ma halahi sian Dolok Hor, marbandar ma halahi di Zalmona. 42Sian Zalmona marbandar ma halahi di Punon. 43Sian Punon marbandar ma halahi di Abot. 44Sian Abot marbandar ma halahi di Lobu ni Abarim di Luat Moab. 45Sian Abarim marbandar ma halahi Dibon Gad. 46Sian Dibon Gad marbandar ma halahi di Almon-Diblataim. 47Sian Almon-Diblataim, marbandar ma halahi di Dolok Abarim na di lambung Dolok Nebo. 48Sian Dolok Abarim, marbandar ma halahi di tano na hornop di Moab mardonokkon Batang aek Jordan paadop-adop tu kota Jeriko. 49Marbandar ma halahi di topi ni Batang aek Jordan di holang-holang ni Bet-Jesimot dohot Rura Akasia.
Angka parenta taran so manaripari Batang aek Jordan
50Di tano na hornop na di Moab donok tu Batang aek Jordan paadop-adop dohot kota Jeriko, dilehen Tuhan i ma parenta tu si Musa 51i ma angka parenta tu bangso Israel, “Muda ditaripari hamu Batang aek Jordan laho masuk tu tano Kanaan, 52angkon paorotonmunu sude halak na mangingani luat i. Roncohon hamu sude gana-ganaan ni halahi na sian batu dohot logam dohot angka inganan parsombaan ni halahi. 53Angkon rampason jana ingananmunu do tano i, angke madung Hulehen i di hamu. 54Dung i angkon bagi-bagionmunu do tano i tu ganop marga-marga ni Israel marhite na mambaen undi. Tu marga na gumodang lehen hamu tano na umbidang gabe pusako ni halahi, tu marga na ummenek tano pusako na so pola bidang. 55Muda so ra na mangingani luat i dipaorot hamu gabe i ma na manyusai hamu songon horsik di mata sanga songon duri di pat muse gabe porangan ni halahi ma hamu. 56Muda nada dipaorot hamu halahi gabe hamu ma pusaonKu songon na dung ditahi rohangKu hian laho mamusa halahi.”
Currently Selected:
BILANGAN 33: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society
