BILANGAN 18

Sikarejohonon ni malim dohot halak Levi

1Didok Tuhan ma tu si Harun, “Ho Harun, dohot angka anakmi, bope angka halak Levi angkon tanggungonmunu do patunda ni angka hasalaan barang aha pe na mardomu dohot panghobasion di Bandar ParmiananKu tapi hum ho dohot anakmu sajo do na mananggung patunda ni karejo hamalimon. 2Oban ma tuson sisolkotmu Marga Levi, anso markarejo rap dohot ho jana mangurupi ho hatiha markarejo ho dohot anakmi di Bandar ParmiananKu. 3Angkon karejohonon ni halak Levi na porlu di hamu, mangkarejohon tugas ni halahi di Bandar Parmianan, tapi nada tola dais halahi tu barang Inganan Na Badia sanga di langgatan. Muda dais halahi tusi, bope ho, angkon mate. 4Angkon markarejo halahi rap dohot ho mangkarejohon angka karejo ni halahi na mardomu tu panghobasion di Bandar ParmiananKu, tapi sanga ise na so dilehen hak tusi nada tola markarejo rap dohot ho. 5Hum ho do Harun dohot anakmu na angkon markarejo di Inganan Na Badia dohot di langgatan, anso ulang gabe marungut-ungut be Au tu bangso Israel. 6Au do mamili sisolkotmu halak Levi i sian halak Israel gabe silehen-lehen tu ho. Madung mardohonan halahi di Au, anso tarbaen dohot halahi markarejo di bagasan Bandar ParmiananKu. 7Tapi hum ho dohot anakmu sajo do na tola mandalankon karejo ni malim na mardomu dohot langgatan bope dohot barang aha pe na adong di Bilik Na Sun Badia i. I ma karejomu, dibaen madung Hubaen hamu gabe malim. Ganop halak na so dapotan hak na songon i angkon mate uhumon muda donok tu angka barang na badia i.”

Tean-teanan ni angka malim

8Didok Tuhan tu si Harun, “Ingot ma ho! Sude silehen-lehen na mardohonan na nilehen tu Au na so pola ditutung songon haul, i ma bagianmu. I ma bagianmu na dung ditontuhon ro di salolot-lolotna. Hulehen i di ho dohot di pomparanmu. 9Sian angka silehen-lehen na lobi badia na so pola situtungon di langgatan, bagianmu ma i. Haul gandum, haul hasesaan ni dosa dohot haul gonti ni rugi. Barang aha pe na dihaulkon tu Au gabe haul na badia, i ma bagianmu dohot bagian ni angka anakmu. 10Etong ma i songon sada na badia, pangan ma i di inganan na badia. Hum halaklahi do na tola mangankon.

11Songon tambana, sude silehen-lehen na mardohonan na asing na dihaulkon ni halak Israel di Au, laing bagianmu do i. Au mangalehen di ho, di angka anakmu halaklahi, di angka borumu. Jana ro di salolot-lolotna do paraturan on. Sude halak na di bagas i na dung ias mangihutkon ugamo tola do mangankonsa.

12Hulehen di ho sude na dumenggan sian suha ni tano parjolo na dihaulkon halak Israel di Au ganop taon, miak zetun, aek ni anggur dohot gandum. 13Sudena i gabe bagianmu. Sude halak di bagas i na dung ias mangihutkon ugamo, tola dohot mangankonsa.

14Sude na adong di tano Israel, nada adong uba ni i na dung mardohonan i di Au, na di hamu do i.

15Sude anak dohot pahan-pahanan na parjolo sorang, na dihaulkon ni halak Israel tu Au, bagianmu do i. Jadi angkon jagitonmunu hepeng partobus ni ganop anak siangkaan dohot ganop pahan-pahanan na haram na parjolo sorang. 16Tobuson do dakdanak i hatiha marumur sabulan. Arga na dung ditontuhon tusi, i ma lima hepeng perak mangihutkon ukuran na rasmi. 17Tapi anggo lombu, biri-biri dohot hambeng, na sorang parjolo nada tola tobuson. Pahan-pahanan na songon i Au do nampunasa jana angkon dihaulkon. Siramkon ma mudarna i tu langgatan jana tutung tabo-tabona i gabe haul sipanganon. Uap ni haul i pajopkon rohangKu. 18Juhutna i gabe bagianmu, dos dohot andora dohot pat siamun parpudi sian na dihaulkon i bagianmu muse do.

19Ro di salolot-lolotna, sude silehen-lehen na mardohonan na nioban ni halak Israel di Au, Hulehen di ho dohot di angka anakmu halaklahi dohot dadaboru. Songon sada pudun-pudun ni parjanjian na so tola digotap antara Au dohot ho bope pomparanmu.”

20Didok Tuhan muse tu si Harun, “Nada adong lehenon di hamu bagi aha tean-teanan. Sabagian tano pe nada adong di luat na Hujanjihon i nada adong ho puna. Au do Tuhan, Au do bagian siteanonmu.”

Tean-teanan di halak Levi

21Didok Tuhan ma tu si Harun, “Saparsampulu sian sude na nilehen ni halak Israel di Au, madung Hulehen di halak Levi. On ma upa ni halahi pature-ture Bandar ParmiananKu. 22Angka halak Israel na asing i nada tola donok tu Bandar Parmianan ulang gabe patunda ni i ro uhum hamatean tu halahi. 23Mamungka saonnari, hum halak Levi do na tola mangurus Bandar ParmiananKu, bope mamorsan tanggung jawab na gok hara ni karejo i. Aturan i mardalan do i tu pomparanmu ro di salolotna. Nada adong siteanon ni halak Levi di Israel, 24angka na gabe teanon ni halahi, madung Hulehen di halahi saparsampulu sian sude bagian na dihaulkon ni halak Israel di Au na gabe silehen-lehen na mardohonan. Hara ni i ma dibaen na Hudok tu halak Levi i bahaso na so adong tean-teanan di halahi di Israel.”

Saparsampulu sian silehen-lehen ni halak Levi

25Disuru Tuhan si Musa 26pabolkaskon parenta on tu halak Levi, “Muda dijagit hamu saparsampulu sian halak Israel, i ma bagian na nilehen ni Tuhan i di ho gabe ho puna, angkon lehenonmu saparsampulu bagianmi tu Tuhan gabe silehen-lehen na mardohonan. 27Silehen-lehen na mardohonan on etongon do i sarupa dohot silehen-lehen gandum na baru, aek ni anggur na baru sian sahalak partani. 28Marhite pangalaho i, saparsampulu sian sude na nijagitmunu sian bangso Israel, angkon lehenonmunu muse gabe silehen-lehen na mardohonan di Debata. Silehen-lehen na mardohonan na tu Debata i, angkon lehenonmunu tu si Harun. 29Lehen ma na dumenggan i sian barang aha pe na nijagitmu. 30Dung dilehen ho bagian na dumengganna i lobina i tola ma buatonmu dos dohot sahalak partani mambuat sanga aha na lobi dung ditaruhon ia silehen-lehennia. 31Na lobi i tola ma panganonmu dohot hamu sabagas sanga di dia sajo, angke i ma upamunu hara ni na marhobas ho di Bandar ParmiananKu. 32Nada pola sala hamu muda dipangan hamu i, asal ma na dung dihaulkon hamu bagian na dumenggan i tu Tuhan. Tapi nada tola paramunon silehen-lehen na badia ni halak Israel marhite na mangan aha sajo sian i, taran so dihaulkon na dumengganna i tu Au. Muda dilanggar hamu parenta on angkon mate uhumon hamu.”

Currently Selected:

BILANGAN 18: LAIAKB

Highlight

Copy

Compare