BILANGAN 13
13
Dua bolas halak mata-mata
(Pang. 1:19-33)
1Didok Tuhan ma tu si Musa, 2“Sian angka pamimpin di bagasan na dua bolas marga i, pili ma sahalak sian ganop marga. Dokkon ma halahi gabe mata-mata na kehe paresohon tano Kanaan, na giot lehenonKu di halak Israel.” 3-15Di patulus si Musa ma parenta ni Debata, sian Parhorsihan Paran i ditongos ia angka na gabe mata-mata, i ma pamimpin na nidok dison:
| MARGA | PAMIMPINNA |
|---|---|
| Ruben | Samua anak ni si Zakur |
| Simeon | Safat anak ni si Hori |
| Juda | Kaleb anak ni si Jefunne |
| Isakar | Jigal anak ni si Josep |
| Efraim | Hosea anak ni si Nun |
| Benyamin | Palti anak ni si Rafu |
| Zebulon | Gaddiel anak ni si Sodi |
| Manase | Gadi anak ni si Susi |
| Dan | Amiel anak ni si Gemali |
| Aser | Setur anak ni si Mikael |
| Naftali | Nahbi anak ni si Wofsi |
| Gad | Gauel anak ni si Maki |
16Angka on ma mata-mata na nisuru ni si Musa patangkaskon taringot tu luat i. Hosea anak ni si Nun, digonti si Musa goarna gabe si Josua.
17Di na nisuru ni si Musa halahi kehe, ditonahon si Musa hian tu halahi, “Anso mardalan halahi tu Utara, tu Selatan ni tano Kanaan, dung i torus tu luat na martor. 18Pareso hamu ma sanga bia luat i, sadia na mangingani jana sadia do hagogoon ni halahi. 19Pareso hamu, denggan do luat i sanga nada, di dia do inganan ni pangisi ni luat i, di angka kota do umbahat sanga di angka kota na marbenteng. 20Ligi hamu sanga napu do tanona jana bahat do hayu na marbatu. Ulang hamu lupa maroban saotik sian batu ni hayu angka na tubu disi.” (Laho mamungka ma musim ni anggur hatiha i.)
21Dung i kehe ma halahi adop Utara paresohon luat i mamungka sian Parhorsihan Zin di Selatan torus tu Rehob donok tu Dalan Hamat di sabola Utara. 22Parjolo, kehe halahi tu Selatan ni luat i jana lalu ma di kota Hebron inganan ni halak Ahiman, Sisai dohot Talmai, pomparan ni sada bangso na marpamatang raksasa, i ma na nidok halak Enak. (Kota Hebron dipajongjong pitu taon andorang so kota Zoan di Mesir.) 23Dung i bolkas ma halahi tu Rura Eskol. Dibuat halahi ma disi sarranting batu ni anggur, hara ni boratna angkon dua halak mamorsan. Laing dioban halahi dope batu ni dalimo dohot batu ni hayu ara na gabe silua. 24Digoari do inganan i Rura Eskol, hara ni ranting ni anggur na nigotap ni halahi disi.
25Dung dipareso halahi luat i lolot ni opat pulu ari, mulak ma angka mata-mata i. 26Dipaboa halahi ma i tu si Musa, si Harun dohot tu sude halak Israel na marlagut di Kades di Parhorsihan Paran. Dibaritahon halahi ma angka na niida ni halahi. Batu ni hayu na nioban ni halahi dipatidahon halahi ma tu halak Israel. 27Ninna halahi ma tu si Musa, “Madung hami pareso luat i, tutu do tano na mora do i jana na napu, jana on ma saotik batu ni hayu na hami oban sian i. 28Tapi halak na gogo do mangingani luat i. Angka kota ni halahi godang jana togu bentengna. Na jumorbut dope, hami ida disi jolma pomparan ni raksasa. 29Di Selatan ni luat i maringanan halak Amalek. Di partoran, maringanan halak Het, Jebus dohot halak Amori. Di lambung ni Laut Tonga dohot sapanjang topi ni Batang aek Jordan maringanan halak Kanaan.”
30Tapi dipasonang si Kaleb ma roha ni na marungut-ungut tu si Musa. Ninna si Kaleb, “Angkon kehe do hita mambuat jana mangarampas luat i laing saonnari, angke tuk do gogonta mangalo halahi.”
31Tapi ninna angka halak na rap mulak dohot si Kaleb i ma, “Nada, angke nada tuk gogonta mangalo halahi. Gumogo do halak luat i sian hita.” 32Dipardokkon angka mata-mata i ma hata gabus di tonga-tonga ni halak Israel taringot tu luat na dung dibolus halahi i. Ning halahi ma, “Nada sadia suha ni luat i, hum di halahi na di luat i pe nada tuk. Angka jolma na hami ida disi halak na ginjang-ginjang situtu. 33Hami ida dope jolma na marpamatang raksasa i, i ma pomparan ni halak Enak. Songon siapor noma pamatangnami hami hilala, jana musti songon i pikiran ni halahi tu hami.”
Currently Selected:
BILANGAN 13: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society
