MATEUS 7
7
Sipaingot taringot tu na manguhumi
(Luk. 6:37-38, 41-42)
1“Ulang uhumi hamu halak, anso ulang diuhumi hamu. 2Harana songon uhum na niuhumkonmunu, songon i do niuhuman hamu muse; jana parsuhatan na nisuhatkonmunu i do niparsuhatkon tu hamu muse. 3Biasi ma he angkon sai paligi-ligionmunu bancir-bancir na sansilbak di mata ni donganmu, hape hayu na sabalok na di matamu umpe diparrohahon ho? 4Patut ma he puluk ho mandok tu donganmu, ‘Dia tuson anso huendat bancir-bancir i sian bagasan matami,’ hape di bagasan matamu sandiri adong dope na sabalok na godang? 5O pangalancap! Paruar ma jolo balok na di matami sandiri, baru pe anso tangkas ho mangaligi. Dung i tarparuar ho ma bancir-bancir na di mata ni halak na asing.
6Ulang lehen hamu barang na badia tu anjing. Harana muda dilehen hamu i, marbalik ma anjing i laho manyarbut hamu. Dung i ulang lehen hamu berlian tu babi, angke dilonca-lonca babi i sajo do i.”
Pangido, jalahi, tuktuhi
(Luk. 11:9-13)
7“Pangido hamu ma, gabe manjagit ma hamu. Jalahi hamu ma, gabe dapotan ma hamu. Tuktuhi hamu ma pintu, gabe dibuka ma pintu i di hamu. 8Harana, angkon manjagit do halak na torus mangido. Angkon dapotan do halak na torus manjalahi. Jana na torus manuktuk pintu, angkon dibuka do pintu i disia. 9Adong dehe sahalak sian hamu na mangalehen batu tu anakna muda dipangido anakna i roti? 10Sanga na mangalehen ulok, muda mangido ihan anakna i? 11Haru songon i pe jahatmunu, laing diboto hamu do mangalehen na denggan tu dakdanakmunu, mur Amangmunu na di banua ginjang i ma. Tontu lehenonNia do angka na denggan i di halak na mangido tuSia!
12Baen ma tu halak na asing, sanga aha por ni rohamu baenon ni halahi tu hamu. Songon i ma impola ni angka Tona dohot hata ni angka panurirang.”
Pintu na sompit
(Luk. 13:24)
13“Sian pintu na sompit i ma hamu masuk! Harana anggo pintu na godang jana na bidang i, pintu tu narako do i! Na bahatan do halak mamolus sian i. 14Tapi anggo pintu na sompit dohot dalan na hohot i, i ma pamolusan ni halak tu hangoluan. Hum saotik sajo do halak na dapotan i.”
Bona ni hayu dohot parbatuna
(Luk. 6:43-44)
15“Jago-jago ma hamu tu angka panurirang pargabus. Songon biri-biri do idaon haroro ni halahi tu hamu, tapi anggo di bagasan satutuna songon sorigala panyoro do halahi. 16Sian parbatuna do tandaonmunu halahi. Bisa dehe lakna halak mamutik batu ni anggur sian tonga-tonga ni sihupi, sanga gala-gala sian tada-tada? 17Laing songon i do hayu na jeges marbatuhon na jeges, jana muda suan-suanan na so jeges, jatjat do parbatu ni i. 18Muda suan-suanan na jeges, nada marbatuhon na jatjat. Suan-suanan na so jeges, nada marbatuhon na denggan. 19Sude suan-suanan na so denggan marbatu, tabaon do i anso nitutung. 20Jadi sian parbatu ni halahi do tandaonmunu halahi.”
Nada hum hata, tapi pangalaho do
(Luk. 13:25-27)
21“Nada sude halak na mamiohon Au, ‘Tuhan, Tuhan’, giot masuk tu Harajaan Ni Banua Ginjang. Tapi hum halak na patuluskon hagiot ni Damang na di banua ginjang i do. 22Di ari parpudi bahat ma halak na mandok tu Au, ‘Tuhan, Tuhan, nada he mangasahon goarMu do hami manyurirangi? Nada he laing mangasahon goar ni Tuhan i do hami paorot angka setan, jana hami baen angka tanda hahomangan?’ 23Tapi anggo alusKu songon on ma, ‘Nada Hutanda hamu! Morot ma hamu sian Au, angka na jahat do hamu!’ ”
Dua halak na pajongjong bagasna
(Luk. 6:47-49)
24“Antong, sarupa ma tu halak na pistar na pajongjong bagasna di ginjang ni batu, sanga ise na manangihon bope na patuluskon angka hata nangkinan i. 25Haru ro pe udan, magodang dohot aek, ro muse alogo na gogo manondong bagas i, nada ra rumpak bagas i angke di ginjang batu do i dipajongjong.
26Dung i, halak na umbege hatangKu, tapi nada dipatulus ia, sarupa ma i tu halak na bodo na pajongjong bagasna di ginjang ni horsik. 27Muda ro udan, magodang ma aek, ro muse ma alogo na gogo manondong bagas i, marumpak ma bagas i. Hebat sajo ma hasegoanna.”
Kuaso ni Jesus
28Dung sidung Jesus mangajarkon hataNa sinangkinan i, homang-homang ma roha ni halahi na umbege pangajaranNia i. 29Harana nada songon pangajari ni angka Siboto Surat ni halahi i pangajar ni Jesus, tapi marsahala do.
Currently Selected:
MATEUS 7: LAIAKB
Highlight
Share
Copy
Want to have your highlights saved across all your devices? Sign up or sign in
Indonesian Bible Society