HAMALIMON 3
3
Haul haluaan
1Muda giot sombahonon ni sada halak sada lombu gabe haul haluaan, angkon lombu jantan sanga boru-boru na so martihas. 2Halak na maroban haul, angkon dipayakkon do tanganna tu ginjang ni ulu ni lombu i lalu disambol di pintu ni Bandar Parmianan Ni Tuhan. Dung i dipispiskon angka malim pomparan ni si Harun ma mudar ni lombu i tu na opat topi ni langgatan i. 3Songon haul sipanganon di Tuhan angkon nisombahon goar-goaran ni juhut ni pahan-pahanan i. Tabo-tabo na mamaluti butuhana, 4pia dohot tabo-tabona, dohot bagian na dumenggan sian ate-atena. 5Sudena i rap dohot haul situtungon na asing i, tutungon ni malim ma i di ginjang ni langgatan i. Uap ni haul sipanganon i ma pajop roha ni Tuhan.
6Muda biri-biri sanga hambeng do na nisombahon gabe haul haluaan, tola do jantan sanga boru-boru tapi ulang na martihas. 7Muda disombahon sada halak sada biri-biri, angkon boanonnia do i tu jolo ni Tuhan. 8Jana angkon payakkononna ma tanganna tu ginjang ulu ni biri-biri i lalu disambol ia ma i di jolo ni Bandar Parmianan. Lalu diduruskon malim i ma mudarna i tu na opat topi ni langgatan i. 9Songon haul sipanganon tu Tuhan angkon sombahonon ni malim i ma goar-goaran ni juhut na nilapa i. Tabo-tabona, sude lalaina na marisi tabo-tabo jana digotap donok tu hayu tanggurungna, tabo-tabo na mamalut butuhana, 10pia dohot tabo-tabona, dohot bagian na dumenggan sian ate-atena. 11Angkon tutungon ni malim na markarejo disi sudena i di ginjang ni langgatan gabe haul sipanganon di Tuhan.
12Muda hambeng do na giot sombahononna 13angkon payakkonon ni na maroban haul i ma tanganna tu ginjang ulu ni hambeng i lalu disambol ia ma i di jolo ni pintu ni Bandar Parmianan Ni Tuhan. Pispiskonon ni malim i ma mudar ni hambeng i tu na opat topi ni langgatan i. 14Songon haul sipanganon di Tuhan pasahaton ni malim i ma goar-goaran ni juhut ni hambeng na nilapa i. Sude tabo-tabo na mamalut isi ni butuha, 15pia dohot tabo-tabona dohot bagian na dumenggan sian ate-atena. 16Tutungon ni malim i ma sudena i di ginjang ni langgatan, gabe haul sipanganon na pajop roha ni Tuhan. Sude tabo-tabona i di Tuhan do i. 17Sahalak pe sian halak Israel nada tola mangankon tabo-tabo dohot mudar. Hot do aturan on ro di salolotna angkon sioloan ni ganop halak Israel sanga di dia pe halahi maringanan.
Currently Selected:
HAMALIMON 3: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society
