HAMALIMON 25

Taon papituhon

(Pang. 15:1-11)

1Didok Tuhan ma tu si Musa di Dolok Sinai laho manyuru ia, 2mangalehen angka paraturan deba nari tu halak Israel. “Dung masuk hamu tu luat na giot lehenonku di hamu ganop taon papituhon nada tola karejohononmunu tano di luat i. Songon i ma hamu pasangap Tuhan. 3Onom taon honokna suanonmunu angka ladangmunu, manggunting ranting ni anggur bope palagutkon batuna. 4Tapi anggo taon papituhon di Tuhan i do i. Di bagasan na sataon i, padiaron ma songon i nada tola karejohononkon. Angka ladangmunu i ulang suani hamu, hayu anggur i pe ulang gunting hamu. 5Salang gandum na tubu sandiri so disuan nada tola sabion, bope batu ni anggur sian bona ni anggur na so nigunting i pe ulang palagut hamu, angke taon paradianan do taon i di tano i. 6Haru songon i pe lehenon ni tano i do suhana na gabe panganon di hamu, di hatobanmunu, di halak na nigajianmunu bope di halak na leban na tinggal rap dohot hamu. 7Songon i muse pahan-pahananmunu dohot binatang panyoro di angka padangmunu. Sude suha ni tano i tola do buatonna.”

Taon Haluaan

8Etong ma pitu noli pitu taon gabe opat pulu sambilan taon 9jadi di tanggal sampulu bulan pitu i ma ari hasesaan ni dosa. Dokkon ma sahalak kehe tu angka inganan mamalu sarune di sude luat on. 10Songon i ma baen hamu hasurungan ni taon palimapuluhon i, jana paboa haluaan di sude pangisi ni luat on. Salolot ni na pitu taon i, sandok arta teanan na dung targadis angkon paulahon tu nampuna hian sanga tu pomparanna. Sanga ise na dung targadis gabe hatoban, angkon dipaulak tu keluargana. 11Ulang suani hamu ladangmunu sanga manyabi gandum na tubu sandiri sanga palagut batu ni anggur na so niguntingan rantingna. 12Salolot taon i gabe taon na badia ma i di ho. Suha ni sanga aha na tubu sandiri di ladangmu, i sajo do na tola panganonmunu.

13Di bagasan taon i, sude arta, barang na dung targadis angkon paulahon tu nampunasa hian. 14Jadi muda digadis hamu tano tu donganmu sabangso, sanga manobusi tano sian ibana, ulang baen hamu na so tigor disi. 15Arga ni tano i angkon ditontuhon mangihutkon bahat ni suha ni tano i tu lolotna lopus Taon Haluaan na giot ro dope. 16Muda bahat bilangan ni taonna mur godang ma arga ni tano i. Tapi anggo saotik do bilangan ni taonna, argana pe ummura, harana na nigadis i, i ma bahat ni na nisabi suha ni tano i. 17Ulang tipu donganmu sabangso, tapi habiari ma Tuhan Debatamu.

Sibaenon di Taon Papituhon

18Ihutkon hamu ma sude aturan dohot parenta ni Tuhan anso sonang ngolumunu di luat on. 19Tano na di luat i mangalehen suhana mambaen tuk panganonmunu gabe sonang hamu disi.

20Tapi ra adong do na giot manyapai taringot tu sipanganon salolot ni taon papituhon i, dung disuani tano i hape suhana nada dipalagut. 21Di taon paonomkon pasupasuon ni Tuhan ma tano i gabe tuk panganon tolu taon suhana i. 22Dung i hatiha disuan hamu ladangmunu di taon pasalapankon pe, suha ni sabion sian taon paonomkon laing marlobi do i anso adong panganonmunu. Angka panganon na nisimpanmunu pe angkon laing tuk tu na palagut suha ni sabion di taon pasalapankon i.

Hamumulak ni arta, barang

23Nada tola gadisonmu tanomu lalu manalduskon hakmu sian i, angke nada ho nampuna tano i. Tuhan Debatamu do nampunasa. Songon sada halak na dung dapotan isin do hamu mangkarejohon tano i.

24Muda digadis sabagian tano i, angkon okuan do hak ni nampuna parjolo tola manobus. 25Muda gabe miskin sada halak Israel, gabe tarpaksa angkon gadisonnia tanonia, angkon tobusan ni sisolkotnia na sumolkot do tano i. 26Halak na so adong sisolkotna giot manobus tano i, betak tartobus ia sandiri do i di pudi ni ari dung adong disia, dung tuk hepengnia tusi. 27Di bagasan ni i angkon gararonnia ma tu halak na manobusi tano i bahat ni hepeng asam ni suha ni tano salolot ni angka taon na lobi dope lopus tu taon haluaan na mangihut. Di bagasan taon i bagi na bia pe angkon mulak tano i tusia. 28Tapi dung tuk hepengnia manobus tano i markuaso do halak na manobusi tano i lopus tu taon haluaan na mangihut. Di bagasan taon i paulahon ma tano i tu nampunasa hian.

29Muda digadis sada halak sada bagas di kota, bagas na mardinding batu humaliang, marhak dope ia manobusi bagas i mulak, lolot ni sataon nietong mamungka sian ari panggadisan. 30Tapi muda so ditobusi ia mulak bagas i di bagasan na sataon i, mago ma haknia manobus tano i mulak. Gabe hak milik ni sipanobusi i bope pomparanna noma tano i. Di hatiha taon haluaan nada paulahon be bagas i. 31Bagas na di huta na so martembok humaliang dos do paraturan i songon na tu ladang, marhak do nampuna hian manobus, jana angkon paulahon bagas i di taon haluaan. 32Tapi anggo halak Levi di sude hatiha marhak do halahi manobus arta ni halahi di angka kota na dung ditontuhon di halahi. 33Muda digadis sada halak Levi sada bagas di sada kota hape nada ditobus ia mulak, angkon paulahon do bagas i tusia di taon haluaan. Angke bagas ni halak Levi di kota inganan ni halahi, arta ni halahi do i na dung ditotopkon ditonga-tonga ni halak Israel. 34Tapi padang ruput humaliang kota inganan ni halak Levi, nada tola gadison. Halak Levi do nampuna i ro di salolotna.

Painjamkon tu halak na pogos

35Muda adong sada sian halak Israel na dung gabe pogos na rap dohot hamu, jabat nada dapot ia be ngolunia, angkon lehenonmunu disia sabahat ni na tarlehen hamu di halak na niupaan. Muda songon i gabe mangolu ma ia rap dohot hamu. 36-37Ulang mangido bunga ni hepeng sian hepeng na nipainjamkonmu tu halak i, tapi angkon habiari hamu ma Debata, jana padiar ma halahi mangolu rap dohot hamu. Ulang muse mambuat labo ho sian sipanganon na nigadismu disia. 38On ma parenta ni Tuhan Debatamu, na maroban hamu haruar sian Mesir, jana mangalehen tano Kanaan di hamu, anso Au gabe Debatamunu.

Paluahon hatoban

39Muda adong sada halak Israel na donok tu hamu gabe pogos, gabe digadis ia dirinia tu ho gabe hatobanmu, nada tola suruonmu halahi mangkarejohon karejo ni hatoban. 40Tinggal ma ia rap dohot hamu songon sada halak upaan, markarejo ma ia di hamu lopus tu taon haluaan. 41Di hatiha i tinggalkononnia dohot angka dakdanaknia ma bagasmu jana mulak ma ia tu koum sisolkotna tu tano na niteannia sian ompungna. 42Bangso Israel, halak ni Tuhan do i, Ia do na maroban halahi haruar sian Mesir, jana hara ni i ma nada tola gadison halahi songon hatoban. 43Jadi halak Israel na gabe hatobanmu nada tola marpangalaho na kasar ho tusi. Habiari ma Debata. 44Muda porlu ma di hamu hatoban, tola do tobusanmunu sian angka bangso na humaliang hamu. 45Tola muse do tobusanmunu dakdanak sian bangso na leban na maringanan rap dohot hamu. Dakdanak ni halak na leban na sorang di luatmunu tola do gabe hatobanmunu, 46tola muse teanon ni dakdanakmu gabe hatoban ni halahi salolot mangolu. Tapi tu halak Israel nada tola baenonmunu na songon i.

47Umpamana adong ma sahalak bangso sileban rap dohot hamu gabe mamora, hape hamu halak Israel na pogos gabe digadis ia dirinia gabe hatoban tu halak na leban i sanga tu sahalak sisolkot ni bangso sileban i, 48dung digadis pe laing marhak do halak Israel i ditobus. Sada sian kahanggina halaklahi, 49sanga udana, sanga dongan saama-sainania sanga halak na asing sian koum na sumolkot tola manobus. Sanga pe muda dung tuk hepengnia sandiri, tola do ia sandiri manobus haluaannia. 50Angkon martahi ma hatoban i dohot na dung manobusi i. Etongon ni halahi ma bahat ni taon dung digadis halakna i gabe hatoban lopus tu Taon Haluaan na giot ro. Dung i tontuhonon ma asam ni haluaanna. Asamna i ditotopkon tu gaji na nilehen tu halak na ni upaan. 51-52Angkon paulahon ni hatoban i do sabagian sian arga panobusi mangihutkon bahat ni taon na lobi. 53Songon na dung disuru, karejo ma ia gabe upaan na nigarar sasataon. Nada tola kasar pangalaho ni tuanna tusia. 54Muda nada tarpalua dope ia dohot angka dakdanaknia marhite dalan na songon i, di Taon Haluaan na giot ro angkon paluaon do ia dohot angka dakdanaknia. 55Nada tola gabe hatoban halak Israel salolot mangolu, angke halak Israel, halak ni Tuhan do i, Tuhan do maroban halahi haruar sian Mesir. Ia do Tuhan Debata ni halahi.

Currently Selected:

HAMALIMON 25: LAIAKB

Highlight

Copy

Compare