HAMALIMON 16
16
Ari Pesta hasesaan ni dosa
1Dung mate anak ni si Harun na dua i, di hatiha na nipasahat ni halahi tu Tuhan api na so nihagiotanNia, didok Tuhan ma tu si Musa. 2Ning Ia ma, “Pabolkas ma tu angkangmu si Harun, anso hum di hatiha na dung ditontuhon do tola masuk ia tu Bilik Na Sun Badia di pudi ni hire-hire i, angke disi do giot patidahononKu diringKu di bagasan ombun di ginjang ni Poti Parjanjian i. Muda dilaosi si Harun do parenta i, hona bunu ma ia. 3Dung dipasahat ia lombu jantan na poso na gabe haul hasesaan ni dosa, dohot sada biri-biri jantan gabe haul situtungon, disi pe anso tola ia masuk tu Bilik Na Sun Badia i.”
4Dung i dilehen Tuhan muse dope angka paraturan. Taran so masuk si Harun tu Bilik Na Sun Badia i, angkon maridi ia jolo, dung i dipake ia pakean ni malim, i ma baju dohot saraor pendek sian abit linen, bobat dohot saroben.
5Dung i pasahaton ni bangso Israel ma tu si Harun dua hambeng jantan gabe haul hasesaan ni dosa, dohot sada biri-biri jantan gabe haul situtungon. 6Angkon pasahaton ni si Harun sada lombu jantan gabe hasesaan ni dosania dohot sude halahi sabagas. 7Hambeng jantan na dua i na sian bangso Israel i angkon obanon ni si Harun ma i tu pintu ni Bandar Parmianan Ni Tuhan. 8Marundi ma ia disi mamake dua batu, na sada ditandai “di Tuhan”, na asing “tu Asasel”.#16:8 ASASEL: Arti ni hata Ibrani on nada be binoto, ra do goar ni Tondi na jahat di Parhorsihan. 9Hambeng na tarpili tu Tuhan i, angkon dipasahat gabe haul hasesaan ni dosa. 10Hambeng na tarpili tu si Asasel angkon nipasahat mangolu tu Tuhan i, anso dipakehe tu si Asasel di parhorsihan anso disesa dosa ni bangso Israel.
11Hatiha dipasahat si Harun lombu jantan i gabe haul hasesaan ni dosania sandiri dohot keluargana, 12angkon buatonnia sian langgatan inganan ni api dohot banggar ni api, dohot duanggolom hamonyan na halus, lalu dioban ia tu Bilik Na Sun Badia. 13Di jolo ni Tuhan angkon baenonnia hamonyan i tu bagasan api. Digohi timus i ma tutup ni Poti Parjanjian i, anso ulang tarpaida si Harun – angke, muda diida ia i, mate noma ia. 14Dung i angkon buaton ni si Harun ma saotik sian mudar ni lombu i, lalu dipispiskon ia dohot jari-jarinia tu sabola sian jolo ni tutup ni Poti i dung i dipispiskon ia muse pitu noli tu jolo ni Poti i.
15Dung songon i, sambolon ni si Harun ma hambeng na gabe haul hasesaan ni dosa ni rayat i. Mudar ni hambeng i angkon obanon tu Bilik Na Sun Badia, lalu dipispiskon tu ginjang ni Poti Parjanjian i dohot tu jolo ni Poti i, songon na dung dibaen dos dohot mudar ni lombu jantan i. 16Songon i ma pangalahona laho paiaskon Bilik Na Sun Badia sian haramunon ni bangso Israel dohot sian sude dosa ni halahi. Bandar Parmianan i angkon badia baenon, angke ingananna di tonga-tonga ni halahi i do, jana hona tu haramunon ni halahi. 17Mamungka sian dung masuk si Harun tu Bilik Na Sun Badia i mangkarejohon pangalaho habadiaan lopus tu na haruar ia, sahalak pe inda tola masuk tu Bandar Parmianan, dung salose patulus upacara taringot tu dirina sandiri, tu halahi sabagas dohot tu sude halak na bahat i, 18haruar ma si Harun kehe tu langgatan ni haul situtungon laho pabadiahon langgatan i. Angkon buatonnia saotik sian mudar ni lombu dohot hambeng i, anso diusehon tu ginjang ni angka tanduk na di suhi-suhi ni langgatan i. 19Dohot jari-jarinia dipispiskon ia saotik sian mudar i pitu noli tu ginjang langgatan i. Songon i ma angkon baenonnia paiaskon langgatan i sian angka dosa ni bangso Israel, anso gabe badia langgatan i.
Hambeng tu si Asasel
20“Dung salose si Harun patulus karejo habadiaan ni Bilik Na Sun Badia dohot angka bagian na asing sian Bandar Parmianan Ni Tuhan bope langgatan, angkon pasahatonnia ma tu Tuhan hambeng na mangolu na dung dipili tu si Asasel. 21Diampehon ia ma tangannia dua-dua tu ginjang ni ulu ni hambeng i lalu mangoku sude hasalaan, dosa, bope pangalaosion ni bangso Israel. Marhite na songon i, sude hajahatan ni bangso Israel dipayakkon tu ginjang ni ulu ni hambeng i. Dung i adong do sada halak na dung nitontuhon hian mangayak hambeng i tu parhorsihan. 22Obanon ni hambeng i ma dosa ni bangso Israel tu sada luat na gariang na so diingani jolma.
23Dung salpu songon i masuk ma si Harun tu bagasan Bandar Parmianan mambuka pakean malim na nipakenia taran so masuk tu Bilik Na Sun Badia i anso ditinggalkon ia pakean i disi. 24Dung i angkon maridi ia di sada inganan na badia mamake pakeannia sandiri. Dung i haruar ma ia lalu pasahatkon haul situtungon na gabe hasesaan ni dosania sandiri dohot angka dosa ni bangso Israel. 25Tabo-tabo ni pahan-pahanan na gabe haul hasesaan ni dosa i angkon tutungonnia di langgatan i.
26Halak na mangayak hambeng i tu si Asasel di halongonan angkon basuonnia pakeannia jana maridi taran so mulak ia tu parbandaran i. 27Lombu jantan dohot hambeng na gabe haul hasesaan ni dosa i, na dung dioban mudarna tu Bilik Na Sun Badia gabe hasesaan ni dosa, angkon obanon tu balian ni parbandaran lalu ditutung. Bobakna, juhutna dohot pangisi ni butuha ni pahan-pahanan na dua i angkon sude tutungon. 28Halak na manutung i, angkon mamasu pakeanna lalu maridi taran so mulak ia tu parbandaran.”
Sibaenon mamestahon Ari Hasesaan Ni Dosa
29-31“Angka aturan on pe angkon patuluson tu zaman na giot ro sapanjangna. Di ari sampulu bulan pitu, sude halak Israel dohot angka halak na leban na rap dohot halahi, angkon marpuaso do jana nada tola mangkarejohon sanga aha pe, angke ari na sun badia do ari i. Di ari i angkon baenon do pesta paiaskon bangso Israel sian sude dosa ni halahi, anso ias halahi mangihutkon aturan ni ugamo. 32Malim Godang na dung nitontuhon jana na nipili ni Debata laho manggonti amana angkon patuluskon karejo haiason i. Angkon pakeonnia pakean ni malim, 33lalu mandalankon upacara laho paiaskon Bilik Na Sun Badia dohot bagian na asing na masuk tu Bandar Parmianan Ni Tuhan, dohot langgatan bope angka malim dohot sude rayat di Israel. 34Pesta on angkon baenon sanoli sataon laho paiaskon Israel sian dosa ni halahi. Songon i ma angka aturan na nigoaran i angkon patuluson ro di salolot-lolotna.”
Si Musa pe dikarejohon ia ma songon na dung diparentahon ni Tuhan i.
Currently Selected:
HAMALIMON 16: LAIAKB
Highlight
Copy
Compare
Share
Want to have your highlights saved across all your devices? Sign up or sign in
Indonesian Bible Society
